«اورمو گؤلوندن بیر شکیل گؤردوم؛ دۆم‌آغلیغینا و دوزلاق‌لیغینا قیپ قیرمیزیلیق قاریشمیش‌دیر…»
گلین‌لیک دوْنودور
یوخسا کفن‌دیر
بو گؤلون اَینین‌ده دوم آغ‌دیر بئله !
بس بو آغ ایچینده او قیرمیزی نه –
اۆزون اؤز قانییلا یوماق‌دیر بئله ؟!…
کیم بیلمز یارایا دوز تؤکمک نه‌دیر !
بو یارا کؤهنه‌دیر بو دوز کؤهنه‌دیر
بو سو اوره‌ییمین گؤزون گؤینه‌دیر
باجارمیر یومماغی اوشاق‌دیر بئله…
او دوْنقار دیمدیک‌لی فیلامینقولار،
دادینا تامسینا تامسینا قالار.
دؤنر یالقوزاغا بیر نیسگیل اۇلار
حیات بو یئرلرده یاساق‌دیر بئله!…
سن گونش دئییلسن؛ آدین کولگه‌دی
بو، تای‌سیز اینجی‌یه، دیلین چؤل دئدی
نه بولود آغلادی نه گؤی کیشنه‌دی
گؤیلر ده بیزلردن اوزاق‌دیر بئله…
سوواتین ایتیریب قاییدان قوشون،
گؤرمک ایسته‌مه‌دین گؤزونون یاشین.
آت، گؤی اوزونه آتدیغین داشین،
بیر گون اؤز باشینا قوناق‌دیر بئله.
بو ائلین بو یوردون یازی گلمه‌دی
عئینی آچیلمادی اۆزو گولمه‌دی
بوردا تیکان بیتمز هله گۆل نه‌دیر!
چوخداندیر اللرین اوراق‌دیر بئله.
سن دنیز گؤیلومو بو شورانلیغا،
آلدادا بیلمزسن آی بَی، آی آغا.
نه قده‌ر بو یوردا قارانلیق یاغا،
یئردن بیتن‌لری چیراق‌دیر بئله!..
