دوست ائوی هاردادیر؟
گون دوغان واختیایدی،
سوروشدو آتلی.
گؤی سوسدو.
یولچو،
دوداغیندان نور بوداغینی
وئرهرک قوملارین قارانلیغینا
بارماقلا گؤستریب قوواق آغاجین؛
بئلهجه سؤیلهدی دوست عنوانینی:
گئدهرسن آغاجا بیر آزجا قالمیش
اؤیله بیر یامیاشیل باغیولو وارکی
تانری یوخوسوندان دا داها یاشیلدیر
سئوگینین اورادا، او باغ یولوندا
دوزلوک قانادیجان بویاسی گؤیدور.
چاتارسان سونونا یئتکینلیندن
اۆزونه آچیلمیش بیر کوچهنین سن،
دؤنرسن «یالقیزلیق» گؤلونه دوغرو
دئدیییم او گؤله ایکی آددیم قالمیش،
یانیندا دورارسان بو یئر اۆزونون،ابدی اساطیر فووارهسینین.
سنی بیر دومدورو قورخو بورویر
فضانین صمیمی سیاللیغیندا
بیر سس ائشیدَرسن
خیشیلتی سسی.
اوجا بیر آغاجدان گؤیه دیرماشان
بیر اوشاق گؤرَرسن
دیرماشیرکی او،
بیر جوجه گؤتورسون نور یوواسیندان
اوندان سوروشارسان
دوست ائوی هاردا؟…
� شعری ترجمه ائتمک، اؤزهللیکله گوجلو شعرلری، اولدوقجا چتین ایشدیر. کیمدنسه بئله گؤزل بیر سؤز وار: «شعری ترجمه ائتمک، قُمری قوشونو اَتی اوچون اوو ائتمهیه بنزَیَر.»
ائله بیر قوشون بوتون گؤزللییی اونون سَسیندهدیر. شعرین ده بوتون گؤزللییی اونون روحوندا، سؤزلرین سسلشمهسینده و ریتمیندهدیر. ترجمهدن سونرا او گؤزللییی آختارماق، اوو ائدیلن قُمریدن اَت آختارماق کیمی بیر شئیدیر.
بو چَتینلییی بیلَرَک، من دیلیمیزین گوجونون دالغالاریندا اوزمَک، اونون ایمکانلارینی یئنیدن یوخلاماق اوچون هَردَن بیر شاهاَثری ترجمه ائدیرَم.
سُهراب سپهرینین «نشانی» شعری حاققیندا رضا براهنی بئله دئییر:
«نشانی» تصویرگری و آختاران انسانین روحونو عکس ائتدیرمهسی باخیمیندان بیر شاهاَثردیر.
شعرین محتواسیلا یاناشی، اونون ریتمینی ده قوروماغا چالیشاراق بئله بیر ترجمه اورتایا چیخدی.
ترجمهنین نئجه آلیندیغی حاقدا فیکیرلَرینیزی بؤلوشهبیلرسینیز…
