ایران یازیچیلار اوجاغی‌نین ده‌یرلی عضوی، اورمولو شاعر «حسن صانعی» مرداد آیی‌نین بئشینجی گونو بیر مدت خسته‌لیکدن سونرا حیاتلا ابدیلیک وداعلاشدی.
حسن صانعی ۱۳۲۲-جی ایل اورمو شهرینده آنادان اولوب، گنجلیک ایللریندن آزادلیق و اجتماعی عدالت عشقیله اجتماعی سیاسی فعالیته و بو فعالیتلرله یاناشی شعر یازماغا دا باشلاییبدیر. او ایران یازیچیلار اوجاغی‌نین قدیمی بیر عضوی کیمی، ادبی مدنی جمعیتده چوخ حؤرمتله قارشیلانان شخصیتلردن اولوبدور. ایندییه کیمی اوچ شعر مجموعه‌سی: «شکوفه می‌نوشد باد ۱۳۸۸(چیچک کولک ایچیر)»، «این رودخانه مال من است ۱۳۹۰(بو چای منیمکی‌دیر)» و «جمع‌آوری آب در آبکش ۱۳۹۷(سوزگجده سو توپلاماق)» آدلاریندا فارس دیلینده یاییلیبدیر. آذربایجان دیلینده‌کی شعرلری کیتاب شکلینده چاپ اولماسا دا، او بو اثرلرینی خصوصیله ده تهراندا فعالیت گؤسترن ادبی درنک‌لرده و ییغینجاقلاردا یایماغا چالیشیبدیر.
حسن صانعی تهرانداکی آذربایجانلی ادبی انجمنلرین، ائله‌جه‌ده آنا دیللی مطبوعاتیمیزین همیشه‌کی حمایه‌چیسی و اشتراکچیلاریندان ایدی و بو درنگ و درگیلرین آیاق اوسته قالمالارینا امکانلارینی اسیرگه‌میردی.
«ایشیق» – آذربایجان ادبیات و اینجه‌صنعت سایتی- امکداشلاری آدیندان سئویملی یولداشیمیز اوستاد «حسن صانعی»نین ایتگیسینی حؤرمتلی عائله‌سینه، ادبی مدنی اجتماعیاتیمیزا و ایران یازیچیلار اوجاغی‌نین اداره هئیتی و عضولرینه باش ساغلیغی وئریر، خاطیره‌سینی عزیزله‌ییریک.
«ایشیق» – آذربایجان ادبیات و اینجه‌صنعت سایتی
۶ مرداد ۱۴۰۴
.
