منی پاییز دوغوب
هم کدریندن
هم ده یارپاقلاری‌نین رنگارنگ شعریندن.
یاغیشلی سئکانس‌لارین گولله یاراسی
اؤپوش ملودیاسی
هردن
هره‌سی بیر جور
اوره‌ییمین ایستی‌سینه قوناق اولوب.
اؤیونورم ده
دؤیونورم ده
بیر یانی کؤرپودور دلبر باهارا
بیر یانی شهریور
تره‌زییه قویماق اولمور بونو.
شاعره قالسا
چیچه‌یه قانلی یاناشیر
قوش‌لارین یوواسی
آللاهین اومودونا قالیر
سونرا پوزولور.
عینی حالدا
گؤی‌لرین گورولتوسو
چای‌لارین میدان اوخوماسی
ایشیقلی بیر آدامین
دؤزومسوز چیخیشی‌دیر ائله بیل
ناحاقجا یارانمیش ناحاق‌لارا.
سئوگیلی‌لر آمما
یاغیش آلتیندا
دلیجه سربست
حیاتین ان گؤزه‌ل حادثه‌سین یارادیرلار.
۱۴۰۴/۰۲/۱۵
