چوخ تاسفله تبریزین مهربان اوغلو استعدادلی صنعتکار و جمعیت آراسیندا «عاشیق علی» عنوانی ایله تانینان فداکار انسان «علی جلیل‌زاده پلسنگی» یاشادیغی تبریز شهرینده گؤزلنیلمه‌دن حیات‌لا ابدیلیک وداعلاشدی.
1340-جی ایل تبریزین دوه‌چی محله‌سینده دونیایا گؤز آچان علی جلیل‌زاده ابتدایی و اورتا تحصیلینی تبریز شهرینده بیتیرمیش، ۱۳۶۰-جی ایل ایران عراق محاربه‌سینده فداکارجاسینا دؤیوشموشدور.
ائل ایچینده اؤز صمیمیتی، مهربالیغی و فداکارلیغی ایله تانینان سئویملی انسان، گنج چاغلاریندان عاشیق صنعتی‌نین وورغونو اولموش، بو صنعتین سیرلرینی اوستاد «عاشیق عیسی دشن»ین نزدینده اؤیرنمیش و عؤمرونون سونونا کیمی بو صنعتله سیخ باغلیلیغینی ساخلامیشدیر.
چوخ تاسفله عاشیق علی (علی جلیل‌زاده پلسنگی)نین سئوه‌ن اوره‌یی فروردین آیی‌نین ۴-جی گونو ابدیلیک دایاندی و بیر گون سونرا صنعتکارین جنازه‌‌سی بیر چوخ انسانلارین اشتراکی ایله مشایعت اولوب، ساز صداسی آلتیندا تورپاغا تاپشیریلدی.
ایشیق- آذربایجان ادبیات و اینجه صنعت سایتی- امکداشلاری آدیندان سئویملی انسان، عؤمرونو بشری ایدئاللار و آزادلیق عشقی ایله باشا ووران تبریزین مهربان اوغلو علی جلیل‌زاده پلسنگی (عاشیق علی)نین ایتگیسینی حؤرمتلی عائله‌سینه، قیزی دورنا خانیما، یولداشلارینا و بوتون آزادلیق سئور انسانلارا باش ساغلیغی وئریر و شرفلی خاطیره‌سینی عزیزله‌ییریک.

ایشیق- آذربایجان ادبیات و اینجه صنعت سایتی
۰۶/۰۱/۱۴۰۴