هر سحر گوزگوده گؤروشوروک
هئچ بیر کیمسه اولمادان،
هئچ بیر کیمسه دویمادان.
هر سحر گوزگوده گؤروشوروک؛
دیلله‌شیریک آرزولاریمیزدان
پیچیلداشیریق سئوگیمیزدن؛
بعضا، دونه‌نین ناغیل‌لاریلا
بئینیمیزی شیرینله‌‌دیریک،
بال دادی وئریر
عؤمور- گونوموزه آتیلان آلمالار؛
گوزگو ده شیرینله‌شیر
شرینله‌شیر هر نه وار.
هر سحر گوزگوده گؤروشوروک؛
خیسین- خیسین پیچیلتیلاریمیز
یوللارا قووشان ایللریمیزه دؤنور،
له‌لک- له‌لک آرزولاریمیز
گؤیرچینلرین اوچوشونا بورونور.
گؤزلریمیزده
قوش اوره‌یی چیرپینیر،
باخیشلاریمیزدا
سونو گؤرونمه‌ین بیر یولون یولچولوغو گؤیه‌ریر.
هر سحر گوزگوده گؤروشوروک؛
بعضا، بیر بوجاغینا سیغینیب
اوخویا بیلمه‌دیییمیز کیتابلارین،
دینله‌یه بیلمه‌دیییمیز نغمه‌لرین حسرتینی
اوره‌ییمیزده تامسینیریق.
شیرینلییی دورولان نغمه‌لره
قانادلانانماق ایسته‌ین کیتابلارا
قیسقانیریق.
هر سحر گوزگوده گؤروشوروک؛
نه گوزگو بیزدن اینجی‌ییر
نه بیز گوزگودن یورولوروق؛
گوزگولشیریک، هیچ بیر کیمسه اولمادان؛
اؤزگورلشیریک، هیچ بیر کیمسه دویمادان!
بهمن ۱۴۰۳ تهران
