قوجا کیشی، هامی‌نین یاتماسیندان و سس‌سمیرین سونا چاتماسیندان آرخایین اولاراق، ائله ایللر بویو یاشادیغی زئرزمیدن و اوتوردوغو یئردن، زئرزمی‌نین یوخاری حیصه‌سینده یئرلشن و گورونمه‌ین قاپی‌جیکه ساری سوزه‌لندی و کیچیک، گؤرونمز قاپینی آچدی. کیچیک قاپی‌نین آرخاسیندا یئرلشن بؤیوک آنبارین گؤرونمه‌سینه، هئچ بیر ایشیق لازیم دئییلدی. آنبارین ایچریسینده اولان ور- وساییلین او قده‌ر پاریلتی‌سی وار ایدی کی همن قارانلیقدا دا گؤرونوردو. آنجاق هامیدان اؤنملی، آنبارین ایچینده اولان وسیله‌لر ایدی.
بو قیویر- زیویری آنباردا ساخلاماق، او یاشدا بیر قوجایا، عجیبه بیر ایش ایدی: بالاجا حربی گمی، تانک، جوربه‌جور اندازه‌لرده راکت‌لر، بالا- بؤیوک سیلاحلار، قومپارا، ال بومباسی، توفنک و توفنک گولله‌لری و حتی مختلف اندازه‌لرده پیلوت‌سوز اوچوش آپارات‌لاری.
ائله نظره گلیردی کی وسیله‌لرین هامیسی قیزیلدان‌دیرلار یا خود قیزیل سو ایله بویانیب‌لار.
قوجا کیشی، هر گئجه کی عادتی اوزه‌ره، بیر داها آنبارین ایچریسینه باخدی و دوداق‌لاری قاچمادان، گولومسندی. آنجاق بیر آز سونرا هنده – ورینده بیر کسین اولماماسینی دوشونه‌رک، اوجا سسله قاققیلدادی، آنبارین قاپی‌سین باغلادی و ایللر بویو یاتدیغی و میتیله دؤنموش یورغان- دؤشه‌یین اورتاسینا گیره‌رک، آز بیر زاماندا یوخویا جومدو.
بو وسیله‌لری آنبارا دولدورماغین سببی معلوم دئییلدی و او یاشدا بیر قوجایا بو وسیله‌لرین ساخلاماسیندان نه لذت ایسه یاراناجاقمیش دا بللی اولمامیشدیر.
قوجا کیشی، او گئجه سون اولاراق آنبارین وسایلینه باخماسیندان و صاباح سحر یوخودان اویانماماسیندان خبرسیز ایدی. هم ده هفته‌ده اونا اوچ دؤنه یئییب – ایچمک و سورسات گتیرن قدیمکی دوستونون قصدیندن و ایللر بویو اونو ایزلمه‌سیندن هئج نه بیلمیردی. او قوجانین حیاتینی ایزله‌یه‌رک، اونون اؤلوم خبرینی، اؤلومو آردیندا اولانلارا وئرمک و آنبارداکی وساییلدن اؤز پایینی گؤتورمک قصدینده ایدی، حال بو کی اونا آنبارداکی وساییلردن هئچ بیر پایین چاتماماق امکانی دا وار ایدی.
مرتضی مجدفر
چئویرن: مرتضی مجدفر
ترجمه: مرتضی مجدفر
سسلندیرن: مرتضی مجدفر
- حئکایه
- اوخوماق زامانی: < 1 دقیقه
- https://ishiq.net/?p=36515
چاپ
