قوی اؤلوم سئوینمه‌سین عؤمرونو وئرمیر بادا-
ائل قدرینی جانیندان داها عزیز بیلن‌لر.
شیرین بیر خاطیره تک قالاجاقدیر دونیادا
سئوه‌رک یاشایانلار، سئویله‌رک اؤلن‌لر.
درین کدر و اوزونتو ایله آذربایجان ادبیاتی‌نین گؤرکملی شاعری و اجتماعی شخصیتی، اوستاد بهمن زمانی‌نین وفات خبری ایله قارشیلاشدیق.
1319-جو ایلده قاراداغ ماحالی‌نین «طوعلی» کندینده نفوذلو بیر عائله‌ده دونیایا گؤز آچان بهمن زمانی، عؤمرو بویو آزادلیق، عدالت و زحمتکش‌لرین ایستک‌لری اوغروندا موباریزه آپارمیشدیر. اونون حیاتیندا زیندان، سورگون، موختلیف تضییق‌لر و تعقیب‌لر اولسا دا، بو چتینلیک‌لر بهمن زمانی‌نی اؤز شرفلی موباریزه یولوندان دؤندره بیلمه‌میشدیر.
بهمن زمانی ۴۰-جی ایللرده آذربایجاندا باش وئرن ضیا‌لی معلم‌لر حرکاتی‌نین قاراداغ ماحالینداکی تانینمیش فعاللاریندان بیری اولموشدور. او دا، صمد بهرنگی، بهروز دهقانی، علیرضا اوختای و دیگر یولداش‌لاری کیمی، عدالت و آزادلیق آرزوسوندا اولان بیر جمعیتین قلبینه اومید و معارف توخوملارینی سپمک اوچون چالیشمیشدیر. یالنیز قاراداغ کندلرینده تعهدلی بیر معلم کیمی تحصیل و معارفلندیرمه ساحه‌سینده ده‌یرلی آددیم‌لار آتماق‌لا کیفایتلنمه‌میش، هم ده شعر و ادبیات یولو ایله ظولم و برابرسیزلییه قارشی موباریزه آپارمیش و جمعیتین آشاغی طبقه‌لری‌نین اوره‌ییندن عدالت و آزادلیق سسینی یوکسلتمه‌یه جان آتمیشدیر.
بهمن زمانی‌نین اثرلری مکتوب شکیلده یاییملانماسا دا، اونون آذربایجان ادبیاتیندا اؤز دستخطی اولموشدور. خصوصیله، یاخین دوستو صمد بهرنگی‌نین اؤلومو موناسیبتیله یازدیغی و بو گون ده دیل‌لر ازبری اولان «آراز، آراز، خان آراز» شعری اونون وطن سئوگیسینه، اینسانلیق ایدئال‌لارینا و دوستلوق اعتبارینا صداقتی‌نین پارلاق نمونه‌سی‌دیر. انقلابین غلبه‌سیندن سونرا ایشیق اوزو گؤرن «آراز» آدلی شعر مجموعه‌سی ده بو صداقتین و زحمتکش‌لره اولان باغلیلیغی‌نین تظاهرودور.
بهمن زمانی، عؤمرونون سونونا قده‌ر، اثرلرینی سسلندیره‌رک، موختلیف واسطه‌لرله او جومله‌دن کاسئت‌لر واسیطه‌سیله یاییملایا‌راق اوخوجولارینا چاتدیرماغا داوام ائتمیشدیر. اونون جسارتی و اینسانلیق ایدئال‌لارینا اولان صداقتی، همیشه آذربایجان ادبی و اجتماعی محیطی‌نین یادداشیندا حؤرمت و تقدیرله آنیلاجاقدیر.
84 یاشلی اوستاد بهمن زمانی‌نین سئوه‌ن اوره‌یی، دی آیی‌نین ۱۷-جی گونو اوزون سورن آغ‌جییار خسته‌لیگی سببیندن تبریز شهری‌نین امام رضا خسته‌خاناسیندا بیریوللوق دایاندی و بیر گون سونرا جنازه‌سی ایسه، تبریزین وادی‌رحمت مزارلیغینین ۷۰ نومره‌لی قطعه‌سینده سئونلری‌نین مشایعتی ایله تورپاغا تاپشیریلدی.
بیز، «ایشیق» (آذربایجان ادبیات و اینجه صنعت سایتی)، «آذری فصلنامه‌سی» و «ادبیات سئون‌لر» (تلگرام گروهو) آدیندان، اوستاد بهمن زمانی‌نین وفاتی موناسیبتیله آذربایجان ادبی، مدنی اجتماعیاتینا، حؤرمتلی عائله‌سینه، دوست‌لارینا و اونون ایدئال‌لارینا باغلی اولان هر کسه درین حوزنله باش‌ساغلیغی وئریریک. خاطیره‌سی ابدی، یولو ایشیق‌لی اولسون!
«ایشیق» (آذربایجان ادبیات و اینجه صنعت سایتی)
«آذری فصلنامه‌سی»
«ادبیات سئون‌لر» (تلگرام گروهو)
۱۹/۱۰/۱۴۰۳
