بیز هر زامان بئله اولدوق
آرخاداش، سحر چاغی اوزون مدت ترحیم اعلامیهسیندهکی شکیلینه باخدیم…باخدیم… باخدیم… شکیلده‌کی سن اولسان دا، سن دئییلدین. یانی من تانیدیغیم، منیم ذهنیمده حک اولموش آرخاداش ترحیم اعلامیهسیندهکی اینسان دئییلدی. سانکی اعلامیهنی چاپ ائدن گرافیست‌ین کپی دستگاهی سنین روحونو، ایچینده گیزلی ساخلادیغین حیات ذووقونو سُوروب شکیلدن چیخارمیشدی. او شکیلده‌کی سن اولسان دا، سن دئییلدین.
قریبه دونیادیر آرخاداش! اللی گون اؤنجه آغیر ناخوشلایان من ایدیم، دونیانی ترک ائدن سن اولدون. او گون زنگ ویردیغیندا شمس مریضخاناسی‌نین اورژانسیندا نظارت آلتیندایدیم. دئدیم: ««باغیرساغیمین بیر قیسمی رادیولوژی ده قاپالی گؤستریلیب، دئییرلرآچیلماسا جراحلیق لازیم اولاجاق.»
سونرا آرتیردیم: «قویو قازان قویویا دوشر دئمیش‌لر، جراحلیق اولسا احتمالی وار «ماوایل» حیکایه‌مده‌کی قادین‌‌ین سرنوشتینه دوشوب، او قادین کیمی بؤیرومده ماوایل داشیییم.»
«بئله دئمه روقیه! ائله بیل گئنه سنین یازیچی خیالین آت چاپیر هااا» دئمیشدین.
ناخوشلوغومون پروسه‌سی اوزونا چکمیشدی و سن او گونون صاباحیسی زنگ ویراندا وصیت‌نامه‌می ویرایش ائتدییمی، لپ‌تاب و یازیچیلیغیملا باغلی بوتون اشیالار و کیتابلاریمی تانیدیغیم بیر «وقفی» مؤسسه‌یه، کیتابخانامین کیتابلارینی شهریمیزین «گسترش کتابخوانی انجمنی»نه باغیشلادیغیمی، سون فصلی یاریمچیلیق قالمیش «مشروطه خانیم» رمانیمی امین بیر دوستوما تاپشیردیغیمی سنه دئدیم.
«بئله سؤزلری دئمه دا روقیه! اؤلوم‌دن دانیشما دا!» دئدین.
سن هر زامان اؤلوم حاقیندا دانیشماغا قارشی ایدین. اؤلوم سؤزو اورتایا گلینجه سؤزو دییشدیرمه‌یه چالیشسان دا بعضا سؤزون آخمیندان کنار قالا بیلمیردین.
«اؤلوم هر آن قاپیسینی اینسانین اوزونه آچا بیلر، من حاضیرلیقلی اؤلمک‌دن یانایام، اؤلوم داماریمیزدان دا بیزه یاخین‌دیر!» دئمیشدیم. سونرا آرتیرمیشدیم: «وصیت‌نامه‌ده یازمیشام، خوی‌دا مزارا تاپشیرسینلار منی. حتی یازمیشام ترحیم مراسیمی توتماسینلار منه! چوخ جدی حالدا ترحیم مراسیمینه قاداغا کسمیشم.»
سن ایسه دئمیشدین: «بیزیم طایفادا بئله مدرن اؤلمک اولماز، شام‌غریبان دا توتارلار، هفته‌سینی ده، قیرخینی دا، ایلینی ده، حتی بیزیم طایفا اؤلن‌لرینی کندیمیزین مزاریندا تورپاغا تاپشیرار.»
قریبه دونیادیر آرخاداش! بو اللی گون ایچینده من مشروطه خانیم رمانینی باشا چاتدیردیم، ناخوشلوغو آتلاتدیم، سن ایسه دونیانی ترک ائتدین!
بو گون شهریزده سنه قیرخ مراسیمی کئچیره‌جک‌لر. اوردا اولماسام دا، اوردایام. بیز هر زامان بئله اولدوق، بیز بیربیریمیزین کناریندا وار اولماساق دا، وار ایدیق، آرخاداش!
۱۴۰۳.۵.۲۵
من ده یولداشلاردانام!
آرخاداش، بو آن تبریزه یاغیش یاغیر. مردادین ۲۶-جی گونو بو واختسیز یاغیش هانسی بولوددان یاغیر، بیلیمرم. هاوا گورولداییر، ایلدیریم شاخیر. منسه بالکوندا اوتوروب، ایسلانمیش تورپاغین اییسینی کؤکسومه چکیرم. یاغیش دنه‌لری هردن بیر اوستومه چیله‌نیر. یاغیش آلتینا گئدیب ایسلانماق عاغلیمدان کئچسه‌ده، صندلیمه میخلانیب، بالکوندا رنگی سنین گؤزلریوین رنگینه بنزه‌ر آشارداشار گولومه زیلله‌نیرم. ذهنیمدن آشیب داشان خاطیره‌لر هم منی حوزون‌لندیریر، هم ده دوداغیما تبسم قوندورور.
سیزین شهره داشیندیغیمدا ۲۰ یاشیندایدیم. ۶۰-۵۹ تحصیلی ایلینده تجربی دیپلمومو آلیب، همان ایل کنکورا قاتیلسام دا، مدرسه‌ده هر بهانه ایله کیلاسلاری تعطیل ائدیب، حیطده شعار وئرمک‌لریمیز و پایلادیغیمیز اعلامیه‌لر ایله «کار» نشریه‌سی نتیجه‌سینده من ده بیر چوخ همکلاسیم کیمی تحقیق‌دن چیخمادیم. فرهنگی انقلاب[۱] اولونجا دانشگاهلارین قاپیسی قاپاندی. منیم قارشیمدا ایکی یول قالدی: فرهنگ اداره‌سینده دفتردارلیق و بهیاری مدرسه‌سی. دفتردارلیق تحقیقیندن ده دوشدوم. او ایل خوی-ون بهیاری مدرسه‌سی بیرینجی دفعه اولاراق دیپلم مدرکی ایله بیر ایل‌لیک محصیل قبول ائدیردی. بهیاری امتحانیندان قبول اولدوغومدا بو دفعه آنام قارشی گلدی. ایکی اوچ گون آجلیق آکسیاسی گوجونه آنامی بهیاری مدرسه‌سینده تحصیل آلماغا راضی سالدیم. تحصیلیم باشا چاتاندان سونرا آنام ایشه گئتمه‌ییمه راضی‌لیق گؤسترمه‌یینجه یئنه آجلیق آکسیاسی دادیما چاتدی و نهایت آنام سیزین شهرین بهداری‌سینده ایشلمه‌ییمه اذن وئردی.
بیرینجی گون سیزین شهرده ایشه باشلایاندا سیزی گؤردوم. یولداشین (ی. د) ایله سنی. ایکینیز ده آغ روپوش گئیمیشدیز. (ی. د) محصیله بنزه‌ییردی، اما سنین جثه‌لی اولدوغونا گؤره باشدا سنی اؤزوم کیمی یئنی ایشه آلینمیش بیری ساندیم. سونرالار آرامیزدا یولداشلیق باغی قورولاندان سونرا هانسی کیلاسلاری ایکی ایل دالبادال اوخودوغونو سوروشدوم، سن ایسه جواب یئرینه ساده‌جه گولدون.
بهداری‌نین ایکی بخشی وار ایدی، جراحی و داخلی. داخلی بخشی‌نین سرپرستاری فارس دیللی، آریق و آلچاق بوی، اخلاقدان کاسیب، دئیینگل بیر سرپرستار ایدی، دئیه‌سن حیات خوشاگلیم خصلت‌لرین هامیسینی بیر یئرده اوندان اسیرگه‌میشدی. داخلی سرپرستاری ایسه اوجا بوی، دوروشوقلو، گؤزل سیمالی، خوش‌اخلاق بیر خریستیان قیز ایدی. بو ایکی ضدیت‌لی شخصیته صاحیب اولان سرپرستار پانسیوندا بیر اتاقدا یاشاییردیلار.
سیز داخلی بخشی‌نین استیشنی[۲] یانیندا دایانمیشدیز. سن اللرینی آغ روپوشون جیب‌لرینه قویموشدون. ایشه باشلاماق برگه‌می داخلی بخشی‌نین سرپرستارینا گؤستردییمده سن یاناکی باخیب، یولداشینا بیر سؤزلر پیچیلدادین. گولوشدویونوز گؤزومدن قاچمادی.
سرپرستار منی داخلی بخشی‌نین اتاقلارینی گزدیریب، ایشیم حاقیندا معلومات وئریب، همکارلاریمی تانیتدیریب، سیزه نوبت یئتیشنده دئدی: «بولار دا بخشین طرح کادلاری‌دی[۳]. هفته‌ده بیر گون بیزیم بخشه گلیرلر.»
سن یئنه یاناکی باخیب، اوتانقاچ بیر گولومسه دوداغیندا اوتوردو. گولورکن دوداقلاریوین بوجاغی آز قالا قولاغیناجان یئتیشیردی. او گون بیر آیری همکار، سیز ایکینیز و من بیرلیکده ایکی- اوچ تایم‌دا داوا ترالی[۴]سینی ناخوشلارین اتاقلارینا سوروب، داوا-درمانلارینی وئریب، همکاریم سرم‌لارینی تزریق ائدرکن من ایشین‌یول-یؤندیمین اؤیرنمه‌یه چالیشدیم. همکاریم قاپی اؤنونده، ترالی‌نین کناریندا دایانیب، ناخوشلارین حب‌لرینی کاپ[۵] ایچینه قویوب، (ی.د) و سنین الینه وئریردی. سیز ایسه مریض‌لرین لیوانلارینی سو ایله دولدوروب، حب‌لری اونلارا یئدیردیردیز. سیز هر ایکینیز اوتانجاق ایدیز، اما سنین دفعه‌لرجه او یاناکی باخیش‌لارین گؤزومدن قاچمادی.
اوچ هفته‌دن آرتیق ایدی بهداری‌ده ایشه باشلامیشدیم. بوتون کادر صبحانه‌سینی آشپازخانا دئییلن بیر اتاقدا یئییردی. صبحانه واختی عمومیتله بخشدن آیاق کسیلیب، خلوت اولاردی. ندنسه بخشه باش چکمک اوچون اتاقدان چیخدیغیمدا سنی گؤردوم، سالونداکی اعلان تاختاسینا بیر شی یاپیشدیریب، تله‌سیک حیطه ساری گئتدین.
اعلان تاختاسینا یاخینلاشدیغیمدا «فدایی»لرین «اکثریت» شاخه‌سینه عایید بیر اعلامیهنی تاختایا یاپیشدیریلمیش گؤرونجه ال-آیاغیمی ایتیردیم، اوره‌ییم دؤیونتویه دوشدو. در حال اعلامیهنی قوپاریب، تله‌سیک جیبیمه تپدیم.
سیزین شهره داشیناندان بری خویداکی یولداشلاریملا بوتون علاقه‌م کسیلمیشدی و سیزین شهرده‌کی یولداشلارلا علاقه قورماق اوچون اونلارین منه وئره‌جک خبرلرینی گؤزله‌ییردیم. او آن اعلامیهنی قوپاریب، جیبیمه تپدییمده هم هؤوشنه‌یه دوشموشدوم هم ده یولداشلارلا باغ قورماق اوچون بیر ایپ اوجو تاپیلدیغینا گؤره سئوینمیشدیم. آشپازخانایا قاییتماق یئرینه بیر باشا توالته گئدیب، اعلامیهنی اوخویوب، شالوار جیبیمده گیزلتمیشدیم.
ناخوشلارین گون‌اورتا ساعاتی داوا-درمانی‌نی ترالی‌یه دوزوب، اتاقلارا ساری گئدیرکن بیلرکدن فشارسنجی استیشن‌دن گؤرتورمه‌دیم. بیرینجی اوتاغین اؤنونده یولداشین (ی.د)دن فشار سنجی گتیرمه‌سینی ایسته‌دیم. یولداشین اوزاقلاشماقدا سنه دئدیم: «اعلامیه یاپیشدیراندا دقت ائله، گلن دفعه آیری آدام گؤره بیلر.»
سن بیردن بیره باشینی قالدیریب، گؤزونو گؤزومه زیلله‌‌دین. یاشیل گؤزلرین سانکی پلنگ گؤزو ایدی، منه زیلله‌نمیشدی. دئدیم: « نیگران قالما، من ده یولداشلاردانام»
۱۴۰۳.۵.۲۶
ایضاح‌لار:
[۱] فرهنگی انقلاب: ۱۳۶۲-۱۳۵۹ ایل‌لری آراسیندا باشلانان فرهنگی انقلاب‌ین اساس هدفی ۱۳۵۷ انقلابیندا اشتراک ائدن سیاسی تشکیلات‌لارین آیاغی‌نین دانشگاهدان کسیلمه‌سی ایدی. دانشگاهدا اسلامی شریعت‌ین حاکم اولماسی هدفی ایله فرهنگی انقلاب حیاتا کئچیریلدی.
[۲] استیشن: پرستاری ایستگاهی
[۳] طرح کاد: دبیریستان پایه‌سینده تحصیل آلان محصیل‌لر هفته ده بیر گون مدرسه یئرینه پئشه اؤیرنمک اوچون واخت‌لارینی فرقلی ایش یئرلرینده گئچیریردیلر.
[۴] ترالی: مریضخانالارا اؤزل، ایکی مرتبه‌لی تکرلی میز.
[۵] کاپ: بالاجا استیل قابلار. پرستارلارین ال‌لری حب‌لره توخونماسین دئیه، بهداشتی سبب‌لردن دولایی مریضخانالاردا داوالاری او کاپ‌لارین ایچینه قویوب، ناخوشا وئررلر.
