ناکام اؤلمه‌رم
عاشیق حسین جاوان

 دؤیوشلرده برکیمیشم، پیشمیشم

قورخو نه‌دیر، اؤلوم نه‌دیر، بیلمه‌رم

آنامین سودونه من آند ایچمیشم

وطن آدین اوره ییمدن سیلمه‌رم

×××

آزادلیق اوغروندا قانیم تؤکولسه

مزاریم اوستوندن یوللار چکیلسه

ساچلاریم آغارسا، بئلیم بوکولسه

دوشمنه باش اییب سجده قیلمارام

×××

شیرین آرزولاریم یئرین آلماسا

وطنیم ذیللتدن آزاد اولماسا

خالقیم سئوینمه‌سه، ائلیم گولمه‌سه

اوره‌کدن شاد اولوب من ده گولمه‌رم

×××

شفق اولوب اوره کلره تؤکوللم

چینار اولوب یوللار اوسته اکیللم

بوداغ اولوب یارپاغلارا بوکوللم

شؤهرت جوببه‌سینه من بوکولمه‌رم

×××

چیخیب ساوالانا یوردوما باخسام

تبریزین کؤکسونه اولدوزلار تاخسام

ظفر نغمه سینی زیلدن اوخوسام

من ”جاوان حسین“م ، ناکام اؤلمه‌رم