چوخ تاسفله، گؤرکملی آذربایجان ژورنالیستی، شاعری، مترجمی و «سارای» درگیسی‌نین صاحیبی و باش یازاری، اردبیل ادبی محیطی‌نین تانینمیش مدنی سیماسی و ائتنیک حاقلاری اکتیویستی«مژگان خانیم صیامی» بوگون فروردین آیی‌نین ۱۸نجی گونو گؤزلنیلمه‌دن یاشادیغی اردبیل شهرینده حیاتلا ابدیلیک وداعلاشدی.
مژگان خانیم صیامی آذربایجان ادبیاتیندا دؤیوشکن شاعر، تعهدلی ژورنالیست و انسان آزادلیغینی، ملی کیملیگی و گئندر برابرلیگی پرنسیپلرینی مودافعه ائدن قلم صاحیبلریندن ایدی. هله اللی یاشی تماملانمامیش تاسفلی اؤلومو ایله ادبی اجتماعی جمعیتیمیزی آغیر بیر شوکا سالان اونودولماز قلمداشیمیزین یارادیجیلیق عؤمرونون چوخ دا اوزون اولماماسینا رغما، اونون ژورنالیسم و ادبیات ارثی چوخ زنگین و ده‌یرلی‌دیر. نشرینین اجباری دایانیلماسینا کیمی آردیجیل اولاراق ایکی دیلده ۴۵ نومره‌سی ایشیق اوزو گؤره‌ن «سارای» آیلیق درگیسی آذربایجان ژورنالیسم تاریخینده اؤزونه مخصوص یئر قازانان ژورنالیسم نمونه‌لری سیراسیندادیر.
دؤورو مطبوعات و اینترنت صحیفه‌لرینده چاپ اولموش شعرلری، «سون سکانس» آدلی حئکایه‌لر مجموعه‌سی(۱۳۹۵)، بئش جیلدلیک «اردبیل‌نامه» (۱۳۹۵) و «چشم‌ها متهم ردیف اول‌اند» (۱۳۹۸) عنوانلی کیتابلاری، ابراهیم دارابی‌نین «اشک سبلان» آدلی تاریخی رومانی‌نین تورکجه ترجمه‌سی(ساوالانین گؤز یاشی) – (۱۳۹۵)، محمد رضا بایرامی‌نین «مردگان باغ سبز» آدلی رومانی‌نین تورکجه ترجمه‌سی(یاشیل باغین اؤلولری) – (۱۳۹۷)، هاشیم ترلانین«اوشاقلار» عنوانلی شعر مجموعه‌سی‌نین رئداکته و نشر حاضیرلاماسی (۱۳۸۷)، اؤزو زینداندا اولارکن شاهید اولدوغو قادین محبوسلارین احوالاتینی عکس ائتدیرن «قربانیان بند نسوان» کیتابی، «مردان روسپینام» اثری، «یاشامادیم قوسدوم» شعر مجموعه‌سی، فارسجا شعرلری، پوبلیسیستیک مقاله‌لری و بیر چوخ دیگر اثرلری، اونودولماز مژگان صیامی‌نین ادبیات خزینه‌سینه بخش ائتدیگی اینجی‌لردیرلر.
مژگان خانیم صیامی‌نین تاسفلی اؤلومو ادبیاتیمیزا آغیر بیر ایتگی‌دیر. بیز «ایشیق» سایتی امکداشلاری بو آغیر ایتگینی آذربایجان خالقینا، ادبی مدنی اجتماعیاتیمیزا، مژگان خانیم صیامی‌نین حؤرمتلی عائله‌سینه، سئونلرینه و تانیشلارینا باش ساغلیغی وئریر، اونودولماز قلمداشیمیزین خاطیره‌سینی عزیزله‌ییر و عشق اولسون دئییریک.
ایشیق – آذربایجان ادبیات و اینجه صنعت سایتی
۱۹/۰۱/۱۴۰۳
