خزان‌لا چیچکلر سارالدی بیر- بیر
داغلارین عطیرلی بیرگولی گئتدی.
سازاغا توش اولدو شعیر باغچاسی
ائللرین نغمه‌کار بولبولی گئتدی.
فاغیرین، یوخسولون دردینه یانان
خالقین ایسته‌گینی اوره‌کدن قانان
هیجران باغچاسیندا یانان، اودلانان
بیر ائلین، اوبانین نیسگیلی گئتدی.
بیر یانا قار یاغدی بیر یانا یاغیش
قالدی اوره‌کلرده «ساهر»دن ناخیش
بئیله بیر وفاسیز دؤورانا قارقیش
ائلین بالدان شیرین بیر دیلی گئتدی.
اؤلوم چووغونوندان اوجالدی سس‌لر
یانار سینه‌لرده، دؤندو نفس‌لر
غملره بوروندو یئنی هوس‌لر
ایستکلی تورپاغین سئوگیلی گئتدی.
کدردن قار کیمی آغاردی باشی
غملی گئجه‌لرین اولدو سیرداشی
اولدوزلا یاناشی، آی‌لا یاناشی
یوردومون پارلایان مشعلی گئتدی.
