اوشاقلار… اوشاقلار… خسته اوشاقلار!
کیم سیلیر گؤز یاشینگیزی؟
قره توت‌لر ایچینده
کوچه‌‌لره چیخمایینگ
ییرتیجی جاناوار وار
سومسوگ ایتلر ایچینده!
ائله بو شهَرینگ یاخینلاریندا
آغ دنگیز کَناریندا
حاکیملار قیزلاری، مست اوغوللاری
گیزلی اوزانمیشلار قوملار آلتیندا؛
داها اوینامایینگ دایانینگ بیر آز
اویناماگ یئری یوخ بومبلار آلتیندا!
یالوارا یالوارا…
دووا – دیلکلر
آه چکسه بو گئجه دردلی اۆرگلر
تاپشیرا ساخلایار سیزی ملَک‌لر؟
گؤیرچینلر تکین داملار آلتیندا؟!
گؤیرچینلر آخی اوچا بیلیرلر
بیر گونش چالاندا آیاقلارینا،
قووزانیب داملاردان کؤچه بیلیرلر
بیر سویوق ده‌ینده یاناقلارینا.
نغمه‌کار دؤنورلر قاش قارالاندا
داملارا قونورلار قاش قارالاندا.
آی خسته اوشاقلار، فاغیر اوشاقلار
هانی گونش سیزی قوپارار بوردان؟
هانی ملَک سیزی آپارار بوردان؟
بو شهَردن کؤچورر، دؤندورر کیم؟
بو قهَردن کؤچورر، دؤندورر کیم؟
برک ارجینی داغدان
ریشه‌سین تورپاغدان
کیم قازا بیلر؟
دردلی میصرالاری کیم یازا بیلر؟
قولاق آس، اوشاقلار بو شئری آغلار
«صنعا»، «صبرا» آغلار، «خوجالی» آغلار
داغلارینا چاتماز اۆجه‌لی داغلار
بو گون «غززه» آغلار اۆجه‌لی آغلار.
آی آللاه بیر دیله‌ییم وار
اوشاقلار گوناهین سؤیله!
