«ایللرین یامانینا گلیب چاتدیق…» باشلیق‌لی یازی یازمیشدیم بیر عزیزیمی دوغما آدامیمی بو ایللرین ایچینده ایتیردیکده… آمما سن دئمه هله داوامی واریمیش بو آجی‌لارین، آغری‌لارین؛ و بو ایللرین یامانلیغی و یامانلیغین ایللری هله بو تئزلییه الینی یاخامیزدان چکنه اوخشامیر! بیربیریندن آغیر ایتگی‌لر و آجی‌لارلا قارشیلاشیریق. گؤره‌سن نه قده‌ر سوره‌جک بویو صبریمیزدن اوجا اولان بو آجی‌لار…
حسن ایلدیریم ایتگی‌سی آذربایجان ادبیاتینا، دیلینه زامان – زامان یئری بوش قالان و بوش گؤرونن اؤزونو سویوق‌لارداق پاییزلاردان بیر تهر سووب یازا چیخارمیش بیر سئیرک مئشه‌لیگین اورتاسیندا قوجامان بیر پالیدین بیردن بیره یوخلوغو کیمی گلیر آداما. یئری بوش، بوش و بوش گؤرونه‌جک…
ناظیم حیکمت کؤرپوسویله و دوست‌یانا بیر گیلئی گوذارلا باشلانمیشدی حسن ایلدیریم‌لا تانیشلیغیمیز و دوستلوغوموز. بو تانیشلیق اولماسایدی دا ادبیاتیمیزدا منیم اوچون حسن ایلدیریم، یئترلی ایزی، چالیشقانلیغی و انرژی‌سی‌له هر زامان سایغی و حورمته لاییق بیر وارلیق‌ایدی. حسن ایلدیریمی دوشوننده آذربایجانین ده‌یرلی شاعیری واقیف صمداوغلودان قارداشی و مشهور «قتل گونو» رومانین یازاری یوسیف صمداوغلو حاقدا نه واختسا ائشیتدییم بیر سؤز یادیما دوشور. مضمونو بئله‌دی او سؤزون: «یوسیفین بیر سیستم‌لی مطالعه اوسلوبو واریدی، هر گون ساعاتلارجا او منظم مطالعه‌سین یئرینه یئتیرمه‌لیدیر؛ بو وردیش اونون باشیندا اوشاقلیقدان اوزو بری، کئچن حاکمیت و سیستیمدن قالمیش بیر یارارلی وردیش ایدی». حسن ایلدیریم عهده‌لیک‌لی بیر نسلین نوماینده‌سیدیر. یورولمازجاسینا و بویوک بیر ایناملا بوتون چالیشمالاریندا بو عهده‌لییه گوزگو توتوردو. ائلینه، دیلینه ادبیاتینا اورکدن بیر گؤره‌ولی کیمی چالیشیردی.
حسن ایلدیریم یولونا آرخایین بیر یولچویدو. اونون معاصر فارس و تورک ادبیاتیندا بویوک بیر ایلگی چئوره‌سی و آلانی واریدی؛ بو ایلگی‌لر هامیسی سانکی ادبیاتیمیزین گله‌جه‌یه اوغورلا اؤتورولمه‌سی آماجی‌له تنظیم‌له‌نیردی. دیلیمیزده، شعریمیزده گونو-گوندن آیدینلیق و ایشیق آختاران بیر وارلیق ایدی. بو دئدیک‌لریمین اؤرنه‌یی اونون شخصی یارادیجیلیغیندان علاوه نشر ائتدییی درگی‌لرین منظم آردیجیل‌لیغیندا ده‌یرلی و سانباللی محتواسیندا گورمک اولار…
هر ایکی اوچ آیدان بیر، تئلفون زنگینده سسینین مهربانلیغی و قایغیلی تئمی آدامی تنبل‌لییندن اوتاندیریب نسه بیر شئی یازماغا سوق ائدیردی. او هئچ زامان ادبیاتیمیزدا بو قده‌ر گؤروله‌سی ایش‌لر وار ایکن الینی الینین اوستونه قویوب دوران بیری اولمادی.
حسن ایلدیریمین آجی و قارا خبری آذربایجان دیلی و ادبیاتی قایغی‌سیندا اولان چوخ انسانلاری اۆزدو. یحیی کمال بیاتلی دئمیشکن «مجهوله گئدن بیر گمی قالخار بو لیماندان.» دوزدور، هر کیمسه‌نی آپاراجاق بو گمی‌دن بویون قاچیرماق ممکون دئییل، آمما بو اولایین چوخ اوزوجو و سارسیدیجی یؤن‌لری حسن ایلدیریمی و ادبیاتیمیزدا نه قده‌ر گؤره بیله‌جه‌ک ایش‌لری دوشوننده گلیر گؤز اؤنونه. حئییف‌سیله‌نیب کؤکس اؤتوروروک. آجی‌میز هر کسه بللی. و بیرده بو قده‌ر قیمتلی آداملارین بئله آسان اؤلوم‌لری‌له‌ده باریشماق چتیندن چتین! نه‌لر وار گؤره‌سن طالعینده دونیانین گون دۆشمه‌ین اۆزونو یاشایان بو میللتین؟!…
بو سئیرلمیش مئشه‌ده
بیر پالید آغاجی واردی
پاییزدان قیشدان چتین،
اؤزون یازا چیخاردی.
یاشیللیغیندان یاشیل _
آپاراردی آغاج‌لار
بیردن بیره یوخ اولدو،
دؤشون یاردی آغاج‌لار
بو یوخلوغو بو اورمان
اونوتمازکی اونوتماز…
یاشیللیغین ساغ اولسون
گئدن قاتار کؤچن یاز….
