ایران موسیقی ائوی‌نین (خانه موسیقی ایران) یایدیغی معلوماتا گؤره، گؤرکملی اوستاد صنعتکار «نصرالله ناصح‌پور» خرداد آیی‌نین ۲۸نجی گونو بئیین چاتیشمامازلیغی سببیندن ۸۳ یاشیندا تهران شهرینده حیات‌لا ابدی‌لیک وداعلاشمیشدیر.
ملی سویه‌ده اوستاد صنعتکار کیمی تانینان و بیر چوخ تانینمیش صنعتکارلارین اوستادی اولان «نصرالله ناصح‌پور»، ۱۳۱۹نجی ایلین آبان آیی‌نین ایکیسینده اردبیل شهری‌نین اونچو میدان محله‌سینده صنعتکار بیر عائله‌ده دونیایا گؤز آچمیش، اوشاق چاغلاریندان آذربایجان موسیقیسی ایله تانیش اولموشدور. آتاسی گارمون ایفاچیسی و آناسی ایسه قاوال چالان اولموش و یئنی یئتمه نصرالله دا بئله بیر عائله‌ده بویا باشا چاتمیشدیر.
نصرالله ناصح‌پور اردبیلین صفوی مدرسه‌سیندن ریاضی رشته‌سینده دیپلم آلدیقدان سونرا تهرانا کؤچموش، «ایران – هلند تجارت بانکی»ندا ایشه باشلامیشدیر. تصادفی اولاراق اونون سسینی ائشیدن گؤرکملی تار اوستادی و موسیقی‌شناس علی اکبرخان شهنازی، اونو آزاد ملی موسیقی مکتبینه (هنرستان آزاد موسیقی ملی) جلب ائتمیش و بئله‌لیکله اوستاد ناصح‌پورکلاسیک ایران موسیقیسی‌نین دستگاهلارینی، ردیفلرینی و تصنیفلرینی تانینمیش صنعتکارلار اوستاد محمود کریمی، اوستاد نورعلی برومند و اوستاد عبدالله دوامی‌دن اؤیرنمه‌یه باشلامیشدیر. بونونلا یاناشی آذربایجان موسیقیسینی ده مکمل اؤیرنمیش و اوزون ایللر بو صنعتین یاییلماسیندا یورولمادان چالیشمیش و بیر چوخ شاگیردلر یئتیرمیشدیر. محمود مخدوم، صدیق تعریف، ودود موذن، سعیده سعیدی، بهرام باجلان، محمد ملاآقایی روزبهانی، عذرا زالی، پانته‌آ الوندی‌پور، ناصرمهرورز، رضا شاکری، محسن نامجو و احمد بیرانوند اوستادین ایران و آذربایجان موسیقیسینده چالیشان تانینمیش شاگیردلریندندی‌لر.
اوستاد ناصح پور اللی ایلدن آرتیق ایران و آذربایجان موسیقی صنعتی‌نین تجروبه‌لی بیلیجیسی کیمی چالیشمیش، همیشه درس کلاسلارینی، شاگیرد یئتیشدیرمه‌یی، موسیقی و مدنیت ساحه‌سینده آراشدیرمالاری هر بیر فعالیتدن اوستون توتموشدور. انقلابدان سونرا «چاووش» و «شیدا» موسیقی گروهلاری، مازندران مدنیت ائوی، تهران اینجه صنعت دانیشگاهی، «چنگ» موسیقی مکتبی و بیر چوخ دیگر موسیقی اوجاقلاریندا و خصوصیله ده اوزون ایللر ائولرده موسیقی ساحه‌سینده تعلیم تربیه فعالیتینی دوام ائتدیرمیشدیر. ایران- عراق محاریبه‌سی باشلاندیقدان سونرا «سرودهای آذربایجانی» آدیندا آلبومونو «ناصری» تاخما آدلا نشر ائتدیرمیشدیر. بو آلبوم موسیقی هوسکارلاری طرفیندن گئنیش صورتده قارشیلانمیشدیر.
اوستاد ناصح پور بیر نئچه ایل ایران موسیقی ائوی‌نین اداره هئیاتی عضوی کیمی فعالیت ائتمیشدیر و قیسا بیر مدتده خالق آرتیستی و کامانچا اوستادی هابیل علی‌اف‌لا امکداشلیق ائتمیش و شاعر «ممد آراز»ین شعرینه بسته‌لنمیش «آغارما ساچیم آغارما» ماهنیسی‌نین ایفاسی همن امکداشلیغین ثمره‌سی‌دیر.
اوستاد ناصح پور عؤمرونون سون اوچ ایلینی بئیین خسته‌لیییندن فعالیت ائتمه امکانی اولمامیش، تاسفله همین سببدن ده یکشنبه گونو خرداد آیی‌نین ۲۸ی تهران شهرینده وفات ائتمیشدیر.
اوستاد صنعتکارین جنازه‌سی چهارشنبه گونو خرداد آیی‌نین ۳۱نجی گونو ساعت۹:۳۰دا ایران صنعتکارلار ائوی (خانه هنرمندان ایران) بیناسی‌نین قارشیسیندان مشایعت اولوب، تهرانین بهشت زهرا مزارلیغی‌نین صنعتکارلار بؤلومونده (قطعه هنرمندان) تورپاغا تاپشیریلاجاقدیر.
ایشیق- آذربایجان ادبیات و اینجه‌صنعت سایتی- امکداشلاری آدیندان گؤرکملی صنعت اوستادی نصرالله ناصح‌پورون ایتگیسینی صنعتکارین حؤرمتلی عائله و سئونلرینه، شاگیردلرینه، ایران و آذربایجان موسیقی اجتماعیاتینا باش ساغلیغی وئریر، اوستادین خاطیره‌سینی عزیزله‌ییریک.
«ایشیق»- آذربایجان ادبیات و اینجه‌صنعت سایتی
۲۹/۰۳/۱۴۰۲
