چوخ تاسفله صابر ادبی انجومنی‌نین چالیشقان عضوی شاعر «الماس شکاری هیر» ۶۰ یاشیندایکن حیاتا گؤز یومموشدور. قارا جییار خسته‌لیگیندن اذیت چکن شاعر خرداد آیی‌نین ۷نجی گونو یاشادیغی تهران شهرینده ابدیته قووشموش و بیرگون سونرا اردبیل یاخینلیغیندا یئرلشن آنا یوردو «هیر» شهرینین مزارلیغیندا تورپاغا تاپشیریلمیشدیر.
شاعر «الماس شکاری هیر» تهراندا ادبی فعالیت گؤسترن صابر ادبی انجومنی ایله تانیش اولمادان اؤنجه داها آرتیق فارس دیلینده و غزل ژانریندا شعرلرین موللیفی ایدی، آنجاق صابر انجومنی ایله تانیش اولدوقدان سونرا اؤز آنا دیلینده شعر دئمه‌یه باشلامیش و صابرین زحمتکش و چالیشقان عضولریندن اولموشدور.
ایشیق – آذربایجان ادبیات واینجه صنعت سایتی آدیندا چالیشقان شاعریمیز «الماس شکاری هیر»ین ایتگیسینی اونون حؤرمتلی عائله‌سینه، دوست- تانیشلارینا، قارداش «صابر ادبی انجومنی» و «ادبیات سئونلر گروهو» درنک‌لرینین اداره هئیتی و عضولرینه باش ساغلیغی وئریر و خاطیره‌سینی عزیزله‌ییریک.
پنجشنبه، خرداد آیی‌نین ۱۱نجی گونو آخشام اوستو ساعات ۱۵ دن ۱۶:۳۰ کیمی تهرانین پونک محله‌سی، میرزابابایی خیابانی‌نین امام علی مسچیدینده شاعرین خاطیره آخشامی کئچیریله‌جکدیر.
ایشیق – آذربایجان ادبیات واینجه صنعت سایتی
۰۸/۰۳/۱۴۰۲
