گؤرکملی آذربایجان شاعری و ادبیاتیمیزین پارلاق سیمالاریندان اولان ۹۵ یاشلی اوستاد کریم مشروطه‌چی «سؤنمز»ین آد گونو جوما آخشامی (۱۴ اردیبهشت) ساعات ۱۶دان ۱۹ قده‌ر تهرانین «نیکو» مدرسه‌سی‌نین اجلاس سالونوندا قید ائدیلدی.
اوچ ساعاتلیق بیر زاماندا کئچیریلن بو تدبیرده تهراندا یاشایان بیر چوخ آذربایجانلی شاعر، یازیچی و ادبی مدنی شخصیت‌لر اشتراک ائتمیش و اوستادی عزیزله‌میشدیلر.
تدبیرین آپاریجیسی تانینمیش یازیچی، ژورنالیست و «پیشگامان پژوهش‌مدار انتشاراتی»نین مدیری دوکتور مرتضی مجدفر تدبیرین آچیلیشینی فولکلور تدقیقچیسی، ژورنالیست و «ائل بیلیمی» موسسه‌سی‌نین مدیری علیرضا صرافی‌یه تاپشیرمیش، صرافی جنابلاری ایسه اوستاد سؤنمزین انسانی کیفیت‌لری و شخصی سجیه‌لری باره‌ده دانیشماقلا تدبیری آچیق اعلان ائتمیشدیر.
سونرا «ساهر ادبی مدنی درنه‌یی» و «ایشیق درگیسی» طرفیندن ائلدار موغانلی، «صابر ادبی انجومنی» طرفیندن اکبر صالحی(قاداش)، شاعر خانیم قربانی، یازیچی و تاریخ تدقیقچیسی ملیحه خانیم بصیر، «نامه صدیق» درگیسی طرفیندن ائلدار صدیق، «آذری مجله‌سی» طرفیندن حسین ریاضی و سونرا ایسه یازیچی و تاریخ تدقیقچیسی حسن راشدی و دیلچی اسماعیل هادی جنابلاری چیخیش ائتمیش و اوستاد سؤنمزین شخصیتی، حیاتی و یارادیجیلیغی حاقیندا اؤز اوره‌ک سؤزلرینی، باخیشلارینی و خاطره‌لرینی سؤیله‌میشدیلر.
تدبیر زامانی مهندس مسعود فصیحی اوستاد سؤنمزین شعرلرینه بسته‌له‌دییی ماهنی‌لاری ایفا ائتمیش و اوستاد سؤنمز ایسه سون شعرلریندن بیرینی تدبیر اشتراکچیلارینا اوخوموشدور.
اوستاد سؤنمزین آد گونو تدبیری زامانی قوجامان غزل شاعری و «زلزله بولاغی» کیتابی‌نین موللیفی سیدمحمدحسین ناصحی‌دن ده تجلیل اولموش، و خوی شاعرلری امیرهوشنگ رحیمی و جبار آیدینلو جنابلاری‌نین یئنی نشر اولموش کیتابلاری تدبیر اشتراکچیلارینا تانیتدیریلمیشدیر.
تدبیرین حاضیرلیق ایشلری «پیشگامان پژوهش‌مدار انتشاراتی»، «خانه دانش و فرهنگ زریاب قورومو»، «امیرهوشنگ رحیمی عائله‌سی» و بیر سیرا آذربایجان ادبیاتی هوسکارلاری طرفیندن حیاتا کئچمیشدیر.
2 پاسخ
بوتون دوسنلار و قلمداشلارا اؤز نوبمده اللریزه ساغلیق دئییرم.
امه‌یی کئچن هر کسین اللری آغریماسین. اوستادین دورومون یاخشی گؤردویومه سئویندیم.
آذربایجان مدنییت خادیم‌لرینه جان ساغلیغی، اؤزون و آنلاملی عومور-گون دیله‌ییرم.