طالع اولدوزومون ایکی قولو وار:
بیری سنینکی‌دیر بیری منیمکی.
گئجه‌ده آغ قارا شعیر یولو وار
بیری سنینکی‌دیر بیری منیمکی.
بؤلوندو اوره‌ییم بیر پاییز، بیر یاز
یاریلدی توپراغیم، آرادا آراز؛
ایکی ناغیل اولدوق، من دئییم سن یاز!
بیری سنینکی‌دیر بیری منیمکی.
یویوروق گئجه‌نین درین گوناهین،
پوزوروق بولودون آیدین صاباحین؛
گونشین اوستونه چکیلن آهین-
بیری سنینکی‌دیر بیری منیمکی.
سن یازان هارایین باغیشلانماسی،
یاساق سئوگیمیزین یاغیشلانماسی،
ایکی قول بویوندا اوره‌ک یانماسی:
بیری سنینکی‌دیر بیری منیمکی.
«جانای»ین گئجه‌لر ساغی سولوندا
اولدوزلار آخیلیر گونش یولوندا؛
ایکی چیچک آچیب تیکان کولوندا:
بیری سنینکی‌دیر بیری منیمکی.
