گینه ده قالخ آیاغا، اوتورما
قالخ آیاغا و بوی-بوخونونو گؤستر
اوتوراندا دانیلمامیزین احتمالی چوخالیر
دیزلرین تیتره‌سه ده اوتورما، دایان
بوی-بوخونونو دوشونجه‌یله دولدور و گؤزل بیر دون گئییندیر
سونرا قالخ آیاغا
و یورو شهرین ان یوکسک زیبیل قوتوسو اوستونه یوکسل
اؤیله‌جه یوکسل و آزادلیغی هایکیر
شهرین داش هیکل‌لری سسیندن سیلکه‌لنسین.
هله‌لیک تریبونوموز زیبیل قوتولاری‌دیر بیزیم
قالخ آیاغا، قنوولار ایچینده قان آخیر،
اوره‌یینی یویوندور بو گئرچک قانلاردا
شعریمیز رومانیمیز موغامیمیز قنوولاردا آخیر
سؤزو اوزالتماغا گلمز
هایدی قالخ آیاغا، اوتورما
اوتوراندا دانیلمامیزین احتمالی چوخالیر
و بیزی گؤرمزدن گلنلرین گؤزلری بره‌‌لیر، دیشلری قیجیریر
هئی بره‌لیر بره‌لیر.

آذر ۱۴۰۱