(«احمد برادران»ین خاطراتیندان آلینمیش حئکایه)
مدرسه‌نین سالونون‌دان چیخیب، قفس‌دن آزاد اولموش قوش کیمی، قاپییا ساری اوچورام. آیدا «لاله» دئیه حیطین او تاین‌دان سسلیییر. دوروب، قیزلارین ایچینده، گؤزلریمله اونو آختاریرام. گیله‌نار آغاجی‌نین آلتین‌دا، یئتیشمه‌میش تورش گیله نارلاری یئیه، یئیه منه أل ائلییر. آغزیم سولانیر. باشیمی ساغا-سولا ترپه‌دیب، سول ألیمی، نه دئیرسن؟ دئیه آچیرام.
-تا تاا تا تاا، مین اوچ یوز یئتمیش بئش، درس ایلینین سونوو. بیله‌جه، دبیرستانین ایلک صینیفین بیتیردیک. آیدا گؤیه آتیلیب، قیشقیریر. هارا قاچیرسان، دئیه‌سن سون ایمتاحانی وئرمیشیک ها، گل بورا ایندی قیزلار دا امتحان‌دان چیخارلار ، بیراز دئییب-گولک.
-یوخ، من قالا بیلمه‌رم، تله‌سیرم. گئدریم ائوه چمدانیمی باغلییام. آخشام چیخیریق سلماسا، خاور ننم گیله.
-یاخچی بابا گئت. سلماس دلیسی. اوردا نه وار بیر بئله سئوریسن اورانی.
-روحوم، عشقیم، خاور ننم. باغیریب گولدوم. و اونون صاندیغی، دیل آلتی میزیلدادیم. بو ایل من اون بئش یاشیما دولموشدوم و او صاندیغین قاپیسی منه آچیلاغاعیدی.
-خاور ننه دئینده گور نه گؤزلری پار-پار پاریلدایر. سن الله بو دفعه خاور ننه‌ن تبریزه گلنده، منه ده دئنن گلیم گؤروم بیله‌سین. بلکه اونو نیه بوقدر چوخ سئودیینی بیلدیم.
-ساغ ألیمی قووزاییب، آیدایلا خداحافیظ له شیرم.
باقاژی چمدانلا تیخیلمیش، یاشیل رنگلی دؤرد یوز بئش پژوموزدا اوتوروب سلماسا ساری یولا دوشدوک، آتام بیر کاست آتدی ماشینین ضبطینه، «کوچه‌لره سو سپمیشم/ یار گلنده توز اولماسین»، رشید بهبودوفون ماشینا جالانمیش یوموشاق سسییله و ماشینین نَنی کیمی ییرقالاماسییلا، بئشیک‌ده لایلایلا خومارلاشان اوشاق کیمی، گؤزلریمی یوموب درین بیر یوخویا دالدیم، گؤزلریمی آچان‌دا، یام-یاشیل آلما باغلارینین آراسین دان کئچن یول، سلماسا یاخینلاشما موشتولوغونو وئریردی بو شهره گلنده آنامین اوزونه بیر آیری گؤزللیک اوتوروردو. قومرال گؤزلری داها آیدین باخیردی. گولوشو داها دادلانیردی. آغ دریسی، جانلانیب، آینا کیمی دورولاشیردی. بلکه ده آنامین بو فرحلی احوالی، اوشاقلیق چاغلاریم‌دان منی بو شهره ماراقلاندیریب، گؤرونمز بیر ایپله منی بورا چکیردی. شهرین ایچینه گیردیک، دوم-دوز، گئنیش، خیابانلارین‌دان کئچدیک، خیابان بویونجا دوزولموش هوندور آغاج‌لارین کؤلگه‌سی، اورتادا سرین بیر تونل چکمیشدی ، هردن ده یاشیل بوداق‌لارین آراسین‌دان بویلانان گونش، اوزومه دوشوب، گؤزلریمی قاماشدیریردی. میللی مسجیدین دالین‌داکی خیابانا یئتیشدیک، آکاسییا آغاجی‌نین گول‌لرینین اییی، خاور ننه گیلین دربندین بوروموش. ماشین‌دان یئنیب، هر تاین‌دا بیر دمیر لاله گولو اولان، ماوی قاپینی چالدیم.
-قاپی چالان؟ کیم‌سن؟
جواب وئرمه‌دیم. قاپی آچیلدی، خاور ننه‌نین اورتا بویلو گؤوده‌سی، آغ بنیزی، قومرال بویانمیش قیسا، قیوریم ساچ‌لاری، قاپینین آراسین‌دان گؤرسندی. بوزا چالار گؤز گیله‌لری شوق دان تیتره‌دی. همیشه‌کی کیمی سلیقه‌لی گئینمیش. کرم کؤینک، فون میدی أتک. قوجالیغینا رغما هله ده فرم‌دا اولان آیاق‌لارینا، أت رنگی جوراب چکمیش. قولاق‌لارین‌دا دا منیم چوخ سئودییم، یاقوت سیرغالاری نارین‌دان تیترییردی.
-الله‌یم، بالا گلمیش، لاله‌م گلمیش.
خاوو ننه منی برکدن باغیرنا باسادی. ایچری گیردیک، حیطی بوروین مور سالخیملی، یاسمن گولونون ایی بورنوما دولدو. تزه‌جه سولانیب، سوپورولن حیطین اورتاسین‌داکی فوواره‌دن هاوایا آتیلان سو داملالاری، اوز-گؤزومه سپیلب، جانیمی تزه‌له‌ییردی. خاور ننم قیرمیزی پالازی، حیطین بیر کؤشه‌سینه سریب، قیزیلی ساماوارینی قورموش. اوتوروب، دادلی کومور چایین‌دان ایچیب، دینجیمیزی آلان‌دان سونرا، ایلک ایش دوروب خاور ننه‌نین اوتاغینا گئتدیم. تاریخ قوخویان او اوتاق، منی بو دونیادان قوپاران اوتاق.
توتقون کت-شلوار، آچیق رنگلی کؤینک گئیینیب، بیر جیزگیلی کراوات تاخیب، باشین بیر آز سول طرفه اییب. احمد بابا، دیوارداکی، آغ-قره شکیل‌ین ایچین‌دن منه باخیر. دانتل پرده‌دن سوزولن گونشین ایشیغی، شکارگاه ناخیشلی لاکی قالی‌نین اوستونه سریلیب. سول طرف‌ده بویوک بیر کیتابخانا، کیتابخانانین اورتا رفین‌ده، خاورر ننه‌نین معلیملیک دؤرونه عایید، نئچه چرچیوه‌لنمیش شکیل، یانین‌دا دا بیر ایری گوللو قهوه‌ای مبل وآیاق‌لاری گؤزلجه اویولموش، جئیران آیاغینا اوخشار بیر ماسا. ساغ طرف‌ده ده اوستو، بوتالی تیرمه‌یله اؤرتولموش أسکی بیر صاندیق. ایل‌لر بویو ایچینده نه اولدوغونو مراک ائدییم، خاور ننه‌نین خزینه آدلاندیردیغی او صاندیق. خاور ننه‌نین، آتاسی، احمد بابانین صاندیغی.
بئش-آلتی یاشیم اولاردی، ناهار اوستویدو، ائو اهلی یاغلی أرزیمان کوفته سی‌نی یئین‌دن سونرا، هره‌سی بیر طرف‌ده اوزانیب، مورگولییردیلر.داییم قیزییلا بیرلیک‌ده فورصت‌دن یارارلانیب گیزلیجه، خاور ننه نین اوتاغینا گیرمیشدیک . «صاندیغین آچارینین یئرین تاپمیشام» داییم قیزی سارا، دئمیشدی. خاور ننه‌نین معللیم‌لیک چاغ‌لارینا عایید اولان چرچیوه‌نین دالین‌دان، پاسلانمیش، باشی گیرده بیر آچار چیخارتمش. باش و شهادت بارماغی آراسین‌دا توتوب، دجللیکله گولموسه‌ییردی. آچاری ألین‌دن قاپیب، صاندیغا ساری شیغیدیم. صاندیغی آچدیم. یئریم‌ده قورودوم. همشه خیالیم‌دا بو صاندیغین ایچی، قیزیل، رنگ‌به‌رنگ باهالی داش‌لار، موجهرلرله دولویدو، امما ایندی قاباغیم‌دا بیر یغییم روزنامه، نئچه آلبوم، بیراز دا نه اولدوغونو باش تاپمادیغیم کار-کاغاذ واریدی. مدرسه‌یه گئمه‌سم‌ده الفبانی اوخویا بیلیردیم. روزنامه‌لرین بیرن گؤتوروب، باشین‌داکی، ایری حرف‌لرله یازیلمیش سؤزجوکو اوخودوم. آژ ژ ژ ی ی ی ر.
-یانی بمباران اولان‌دا، بو روزنامه‌ده یازار؟ سارا دئدی.
چیین‌لریمی آتیب، دوداغیمی أیدیم. بیراز کارکاغاذی قوردالاییب، آیدایلا، «ائله بو» دئمیشجه سینه، بیر-بیریمیزین اوزونه باخدیق. ائله بو آندا قاپی آچیلیب، خاور ننه ایچری گیردی. دؤنوب، هوروت-هورت اونون اؤزونه باخدیق. قاشلارینی چاتاراق، باشینی ترپتدی. او گؤزل یاقوت سیرغالاری قولاغین‌دا اوینادی. «باخ، باخ سن الله. قیزلار سیز نه ایش گؤرموسوز؟ آچمیسیز صاندیغی، تؤکموسوز پامبیغی.»
-یوخ والله خاور ننه بیز پامیق تؤکمه‌میشیک یئره، باخ هئچ صاندیغین
ایچینده پامبیق یوخدویدو» سارا باغیرا-باغیرا دئدی.
خاورننه گولومسه‌ییب. گلیب اوتوردو یانیمیزدا.
-«هن، سونون‌دا بیلدیییزی ائله‌دیز. منیم خزینه‌می آچدیز راحاتلادیز می؟».
-«خزینه هاردایدی خاور ننه، بوردا کار-کاغاذ دان باشقا، هئچ بیر شئی یوخدور. بیز دئییردیک بلکه بو صاندیغین ایچی، پوللا، قیزیللا دولودور.» خاور ننه‌نین، گولومسه‌مه‌سی و یوموشاق لحنینن اورکلنمیش سارا دئدی.
-بوکارکاغاذلار منه پول‌دان دا، قیزیل‌دان دا چوخ دیرلیدی قیزیم. سونرا، سانکی اؤزویله دانیشیمیش کیمی، یانغین‌دان قورتورولموش تاریخییمیزدیر بونلار، دیل آلتی میزیلدادی. کاغاذلاری بیزیم ألیمیزدن آلیب، صاندیغا قویاراق، قاچین گئدین حیط‌ده اویناین، دئدی.
صاندیغین ایچین‌ده‌کیلر سارانین هئچ ایلگیسینی چمکه‌میش، بیزیم صحبت‌لرییزی سایمازدان گلیب، دورودو، حیط‌ده توپ اویناماغا گئتدی.
-خاور ننه مگر اولار؟ بو روزنامه‌لردن منیم آتام گون‌ده آلیب گتیریر دا، اوخیان‌دان سونرا دا آنام اونلارلا شیشه سیلر. بونلار نجور قیزل‌دان دیرلی اولا بیلرلر؟
-اولار بالا، اولار. او گون‌لردن قالان هرنه، قیزیل دیرین‌ده. بو روزنامه‌لر او سن دئدیین روزنامه‌لرله، بیر ترزییه قویولماز. بونلار منه هم آتا یادیگاریدیر، هم ده یاشادیغیمیزآجی، دادلی گون‌لرین سندیدیر. ایدی دور گئت حیط‌ده سارایلا اوینا. سن بونلاری هله باشا دوشمزسن.
– ننه، قوی بیراز بو آلبوم‌لارا باخیم دا نه اولار.
-دور، دور گئت، یئکلیب، بونلارین دیرلرینی بیلنده بونلارین هامیسین وئره‌جیم، باخاسان، اوخویاسان. خاور ننه یاناغیم دان بیر چیمدیک قوپاریب، دئدی.
-خاور ننه، نه‌قدر بویومه‌لییم؟
-بیلمیرم، مثل اوچون اون‌بئش یاش یاخچیدیر؟
– یانییی دوققوز ایل سونرا، بیراز چوخدو، امما من چوخ یئمک یئیه‌رم تئز-تئز بویویوب، اون‌بئش یاشا چاتارام. بیراز فیکیرلشیب، بارماق‌لاریم‌لا حساب-کتاب ائدندن سونرا دئدیم.
خاوور ننه اوجادان گولوب منی باغیرانا باسیب، یاناق‌لاریم‌دان اؤپدو.
خاور ننه اوتاغیین قاپیسینی آچیب، منی صاندیغین قاباغین‌دا اوتورموش گؤرنده، «هن بس تئز-تئز بؤیویوب، اون بیش یاشا چاتدین دئمک.» سونرا دا بیر آه چکیب، «دوغوشدان دا نه تئز کئچدی بو ایل‌لر، ائله‌بیل، دوننیدی، سارایلا بو صاندیغی آچیب، ایچینده موجوهر آختاریردیز.» دئدی. ایکیمیزده اوجادان گولوشدوک.
-هن خاور ننه، الوعده وفا. آچ بو صاندیغی منه.
خاور ننه ألینی گؤزو اوسته قویوب، طاقچاداکی شاه عبباسی لامپانین آلتین‌دان، بیر آچار چیخاردیب، صاندیغین قیفیلینی آچدی. صاندیغین قاپیسی، بیر قاری‌نین قورومش سوموک‌لری کیمی، قیژیلدایاراق آچیلدی. کؤهنه کاغالارین شیرین ایی، بورنوما دولدو.هؤوله‌سک أییلیب، صاندیغین ایچین‌ده‌کی‌لری سوزدوم، سونرا اجازه ایسته‌مک آنلامین‌دا اولان بیر باخیشلا، خاور ننه‌نین گؤزلزینه باخدیم.خاور ننه باشینی آشاغییا ترپه‌ده‌رک، صاندیغین اختیارینی منیم ألیمه وئردی.
روزنامه‌لری گؤتوروب اوخوماغا باشلادیم. آژیر، دارنده امتیاز و مدیر مسئول، ج.پیشه‌وری. بیر دسته ده آیری روزنامه واریدی. اونلارین باشین‌دا آذربایجان آدی یازیلمیش، آلتین‌داگی یازینی زیققانا-زیققانا اوخودوم. آذربایجان دموکرات فرقه‌سینین ناشر افکاریدیر، یازیلمیش. بو روزنامه‌لر تورکجه یازیلمیشدیلار. بیر نئچه کیتاب دا واریدی. کیتاب‌لارین دا اوستونده تورکجه بیرینجی کتاب، بیرینجی کلاس اوچون یازمیش. کیتابین اوستونده کی، بالاجا بیر اوغلانلا قیز شکلی ماراغیمی چکدی.
-خاور ننه، بونلاردا سنین آتانین کیتاب‌لاریدی؟
-یوخ قیزیم، اونلار منیم کیتاب‌لاریمدی.
-آآآ، ننه مگر سن تورکجه درس اوخوموساان؟ سوروشدوم.
– یالنیز بیر ایل. عصره برابر بیر ایل، گؤزلرینی اوزاقلارا تیکیب، کؤکسکونو دردی.
سانکی او اوزاقلار دا، او بیر ایلی گؤروردو. گؤزلرین‌ده قریبه بیر حیس واریدی. اؤزلم دئییم، سئوینج دئییم، کدر دئییم، بونلارین هئچ بیری دئییل دی ده هامیسییدی. بو گونه قدر، ننه‌می هئچ بئله گؤرمه‌میشدیم. کیتاب‌لاری ألیم‌دن آلیب، مقدس بیر کیتابا توخونان کیمی واراقلادی.
-بو کیتاب‌لارین باشین‌دان نه‌لر کئچیب، بیر بیلسن. دئدی.
-نه‌لر کئچیب ننه، لطفا بو صاندیغین حئکایه‌سین منه تعریف‌له. گؤیلوم ایستیر بیلیم بو کیتاب‌لار، بو روزنامه‌لر نه دیرلر؟ بو تاریخین هاراسیدی کی بیزهئچ نه او گؤنلره گؤره ائشیتمیریک. نه مدرسه‌ده، نه تلویزیون‌دا، من بیر گونلر ایران‌دا، مدرسه‌لرده تورکجه درس وئریلدیینی ائشیتمه‌میشم نیه؟
-ایستمیرسن بو آلبوم‌لارا باخاسان به؟
قارا دری قاپاغی چاتلامیش بیر آلبومو وارقلاماغا باشلادی.
آغ-قارا شیکل‌لری بیربه‌بیر منه گؤستریب، بو سلام‌الله جاویددیر، بو دا فریدون ابراهیمی.
-بونلار کیمدیلر ننه؟
-بونلار مییلی حکومتین وزیرلریییدیلر.
خاوور ننه، هن دئیه باشینی ترپدیب، آلچاق بوی، اوزون پالتو گئیمیش، قره لبه‌دار بؤرک باشین‌دا، گیرده چرچیوه‌لی گؤزگو گؤزونده، بیر کیشینی بارماغییلا گؤستریب، باخ بو احمد بابانین یانیدندا دوران دا، میر جعفر عمی دی. میر جعفر پیشه‌وری. میللی حکومتین نخست وزیری. برلمیش گؤزلریمله دؤنوب خاور‌ننه‌نین اوزونه باخدیم.
-احمد بابایلا یاخین یولداشیلدیلار. احمد بابا دا او زمان، سلماس‌دان مجلیس وکیلی سئچیلمیش.
آغزیم آچیق قالمیش. ائشیتدیک‌لریمه اینانا بیامیردیم.
-سن نه دئیرسن ننه، آتان مجلیس وکیلییمش؟ پیشه‌وری نخست وزیرییمیش؟ سن ده اونا عمی دئیرسن؟ آژیر رونامه‌لرین بیرینی گؤتورب، ألیمی، دارنده امتیاز و مدیر مسئول، ج.پیشه‌وری، جمله‌سینین آلتینا قویوب، سوروشدوم.
گؤزلرینی شکیل‌دن چکمه‌دن، باشینی هن دئیه ترپدی.
چوخ کیچییدیم، امما دونن کیمی یادیم‌دادیر، گئجه شام واقتییدی. آنام شاما، کله‌دوش بیشیرمیش. کله‌دوشون اوستون‌ده‌کی یاغ‌یومورتایا باخیب، آغزم سولانیردی. تزه ایچینه چؤرک دوورامایا باشلامیشدیق، یاد بیرسس آتامی سسله‌‌دی.
-برادران یولداش، اجازه واردیر؟
-بویورن. آتام دئدی.
قاپی آچیلدی. آلچاق بوی، کئچل بیر کیشی، ألین‌ده قارا بیر چانتا، ایچری گیردی. چکیجی و پارلاق باخیش‌لاری واریدی. آناملا آتام آیاغا دوردولار. «سلام، گئجه‌نیز خئیر. من میر جعفر پیشه‌وری‌ام. سیز احمد براداران یولداش‌سینیز؟» ایچری گیرن کیشی دئدی. آناملا، آتام قاباغا کئچیب، أل وئریب، سلاملاشدیلار. آتام بویور دئینده، تعارفسوز، تکلفسوز، سوفرا باشین‌دا اوتوروب، بیزیمله یئمک یئدی. یئمک‌دن سونرا آتاملا دانیشیقا اوتوردولار.
-هاردان بیزیم ائویمیزی تاپدیز؟ آتام سوروشدو.
-تهران‌دا، سلماسا گئدجییمی دئینده، یولداش‌لار، سلماس‌دا هر کیم‌دن برادران یولداشی سوروشسان، تانییارلار. سلماس‌دا حزب توده‌نی اونونلا تانییارلار دئدیلر. من ده گاراژدا اوتوبوس‌دان یئندییم‌ده سیزی سوروشدوم. بیر نفر سیزین ائوینیزی تانییردی، منی بورایا گتیردی.
سونرا دا من باش تاپمایان دانیشیق‌لارا باشلادیلار.
بیز چوخ تئز بیر-بیریمیزله یولداش اولدوق، من ده چوخ دانیشان و قانی ایستی اوشاغییدیم. تئز-تئز آتاملا، پیشه‌وری‌نین دانیشیقلاری آراسینا آتیلیب، بیر سؤز دئییردیم.
جعفر عمی، جئبین‌دن بیر مامپاس چیخاردیب منه وئردی. دئی گؤروم منه مکتبه گئدیرسن می؟ دئدی.
-یوخ، من گئتمیرم، امما شمسی گئدیر، شمسی، نوبات خالانین قیزیدیر، بیزیم قونشوموزدولار. شمسی مکتبه گئدن‌ده من چوخ آغلادیم، من ده گئتمک ایستیردیم. امما آنام دئدی، سن هله چوخ بالاجاسان. سنی قویمازلار مکتبه. ایکی ایل سونرا من ده مکتبه گئده‌جاغام.
پیشه‌وری ألینی باشیما چکیب، گولومسه‌دی.
-عمی، بیلیرسن صاباح بوردا تئاتر اوینایاجاقلار، صحنه‌سین منیم آتام دوزلدیب. آتام منه سؤز وئریب منی ده آپاراجاق. سن هئچ تئاترا گئتمیسن؟ من گئتمه‌میشم، امما آتام منه دئییب نجور اولار، بیر سککینین اوستونده یئکه آدام‌لار قوناق‌باجی کیمین اوینویارلار. چوخ گولملیدیر مگر یوخ؟ یئکه کیشی‌لر، قوناق‌باجی اوینویاجاقلار. امما آتام دئییر تئاتر فارسجا اولاجاق، من هئچ فارسجا باشا دوشمورمکی. دوداقلاریمی بوزوب دئدیم.
-ماشالله بو قیزمیز چوخ شیرین دیلیدیر. میر جعفر، گولمسه‌یب دئدی.
-عمی سن ده صاباح گئجه بیزیلمه تئاترا گلرسن؟
-خاور قیزیم دوز دئیر، پیشه‌وری یولداش. صاباح گئجه بوردا فرهنگ اداره‌سی، شهردارینین سالونون‌دا، بیر تئاتر اویونو قوراجاق، سیز ده گلسنیز هم من، هم یولداش‌لار چوخ سئوینه‌ریک.
-سؤزون دوزو من ایستیردیم صاباح اورمیه‌یه گئدیم. امما بوردا تئاترا باخماق دا چوخ ماراقلی اولاجاق. خاور قیزیمیزین دعوتین قبول ائدیرم. اورمیه‌یه بیری گون ده گئتمک اولار.
اوجادان گولودوم، میر جعفر عمی‌نین قوجاغینا آتلادیب، بوینون قوجالایب، اونو اؤپدوم.
او گئجه آناملا من، یاتماغا اوبیرسی اوتاغا گئتدیک، امما آتلاملا، پیشه‌وری اولان اوتاغین لامپاسی، گئجه یارییا قدر یانیغییدی و اونلارین دانیشما سس‌لری بیز اولان اوتاغا گلیردی. صاباح سحر، آتاملا پیشه‌وری نئچه نفری گؤرمیه گئتدیلر. سونرا آتام ائوه خبر یولادی، گئجه قوناغیمیز اولاجاقمیش، آنام‌دان حاضیرلیقلی اولماسینی ایستییردی. من بو سؤزو ائشیدن‌ده آغلاماغا باشلادیم. آنام آغلاماغیمین سببینی سوروشان‌دا، «بیزه قوناق گلسه، تئاتر اویونونا گئده‌بیلمییه‌جیک. من ایسته‌میرم بو گئجه بیزه قوناق گله.» دئدیم. آنام گؤز یاشلاریمی سیلیب، ساچلاریمی تومارلادی. آنام، سن هئچ داریخما گؤزلیم، او قوناقلارین دا هامیسی بو گئجه تئاتر اویونونا گئتمک ایستیرلر. هامیمیز بیرلیک‌ده تئاترا گئده‌جییک. دئینده اورییم یئرینه گلدی.
-ایندی سن گئت، أل-اوزون یو، یاشیل مخمر دونون گئی، داراق گتیر ساچلارین هؤروم. منه ده سؤز وئر اوستو-باشین کیرلتمیه‌سن.
گئجه ائویمیز دولویدو غریبه کیشی‌لرله، منله آنام مطبخ‌ده‌یدیک. پیشه‌وری‌نین سسی گلیردی.
او گئجه، هره پیشه وری‌دن بیر سؤز سوروشوردو و پیشه وری هامییا بیر-بیر جاواب وئریردی.
وقت کئچیردی، امما قوناقلارین دانیشیقلاری بیتمیردی.
-آقالار، هامینیز بیلیرسیز بو گئجه، شهرداری سالونون‌دا بیر تئاتر اویونو اولاجاق، چوخونوز دا اورا دعوتلیسیز، رییس فرهنگ من‌دن خواهیش ائلییب یولداش پیشه‌ورینی ده اؤزوموزله بوتئاترا آپاراق. منجه گئجه قالماییب، فرهنگ اهلینین گؤزونو یولدا قویمایاق.
آتامین بو سؤزویله، قوناقلارین هامیسی آیاغا قالخدیلار و بیرلیک‌ده شهرداری سالونونا ساری یولا دوشدوک. آنام، یاشیل کت-دامن گئیمیشدی، ساچلارینی دا، داییمین تویون‌دا بزدییی کیمی، بیگودییله قیوریم-قیوریم بزمیش. شهردارینین آغ بیناسی خیابانین توشون‌دان گؤرسندی، تئاتر سالونونا یتئیشمیشدیک. هیجان‌دان اورییم دویونوردو. نئچه کت-شلوارلی کیشی، بیزی قارشیلاماغا گلمیشدیلر. آتام، رییس فرهنگ، فرماندار، رییس شهربانی دئیه، اونلاری پیشه‌وریه تانیتدیردی. بیز ایچری گیردییمیزده، سالون‌دا اوتوران‌لارین هامیسی آیاغا قالخدیلار، من قورخوب آنامین أتیین‌دن یاپیشدیم، آنام دئدی قورخما، بونلار پیشه‌وری‌نین احترامینا آیاغا قالخیبلار، بیزی قاباق ردیف‌ده اوتورتدولار. بیز اوتوران‌دان سونرا، هامی یئرینه أیلشدی. من ده یئریمه أیلشیب، اطرافا باخیردیم، اوجا تاوانی، بؤیوک سالون جمعیتله دولویدو، صحنه‌یه قیرمیزی پرده‌لر آسیلمیش.نئچه لامپ صحنه‌نی ایشیق‌لاندیریردی. لامپ‌لار، چوخ ایشیقلییدیلار، من اوگونه‌قدر، برقله ایشله‌ین لامپ گؤومه‌میشدیم.
قیرمیزی پرده یاواش-یاواش آچیلدی. رییس فرهنگ، سن اوستونه چیخیب، فارسجا دانیشماغا باشلادی. اونون دئدیک‌لرین باشا دوشمؤردوم. دانیشقلاری تئز بیتیریب، تئاتر باشلاسین دئیه تلسیردیم. آنامین گؤز برلتمه‌لری اولماسایدی، دوروب سالن‌دا اوتای-بوتای قاچاسیم گلیردی. بیراز تئاتردان دانیشان‌دان سونرا، میر جعفر عمی‌نین آدین آپاردی. سونرا عمی صحنه‌یه چیخیب، دانیشماغا باشلادی؛
-ایلک باش‌دا، سلماسین اهلینه، خصوصا زحمت‌کشلره سلام دئییرم، بیلدیینیز کیمی، من آژیر روزنامه‌سینین مدیرمسئولویام و فارسجانی یاخچی بیلیرم، امما بوردا أیلشن‌لرین هامیسی تورک اولدوغو اوچون، اذنینیزله، سیزلرله اؤز آنا دیلیمیزده، تورکجه دانیشماق ایستییرم.
بو آندا، «یاشاسین پیشه‌وری» سسی سالون دا بمبا کیمی پاتلادی. قولاق‌لاریم تاقیلدادی. صحنه‌ده تورکجه سؤزلر ائشدیگیمه، تعجب ائلمیشدیم. اونا گؤره ده دانیشدیغی ایلک جمله‌لر بئینمه هک اولوب، قالدی. پیشه‌وری چوخلو جماعاتا دانیشدی. هر نئچه جمله‌دن بیر، آردی کسیلمه‌ین آلقیشلار، سالونو بورویوردو. جماعاتین جوشغوسو آنلاتمایا سیغمیردی. هامی شورا گلمیش، اؤز دیل‌لرینی صحنه‌ده ائشیتمین ذوقونو یاشاییردیلار. او گئجه، جماعاتین او جوشغولو حالی، منیم ایچیم‌ده آنا دیلیمه سئوگی تخوملارینی سپدی.
هن لاله قیزیم، بو بیزیم پیشه‌وری‌یله ایلک تانیشدیغیمیزین ماجراسییدی، اوندان سونرا، چوخ ماجرالار یاشادیق. میللی حکومت قورولدو، آتام سلماس‌دان مجلیسه نماینده سئچیلدی. هئیی بالام هئی نه گونلریدی.
من باشیمی قولاریما سؤیکییب، آغزی آچیق، خاور ننه‌نین سؤزلرینه قولاق آسیردیم.
-خاور ننه، بونلارین هامیسین منه دانیشمالیسان، بس
بو حین‌ده آنام قاپینی آچیدی.
– هن بس سونون‌دا بو صاندیق، لاله‌یه ده آچیلدی. دئنن دا، بایاق‌دان بو اوتاغا گیریبسیز، چیخماق بیلمیرسیز. لاله‌نین آلاهی وئریب دا، سحره قدر ده اوتوروب خاطره دئسن، لاله دویمازکی دویماز. ایندی دورون گلین شامیمیزی یئیک آجیمیزدان اؤلدوک.
-آنان دوز دئیر، ایندی دور گئدک، سوفرانی آچ. بو صاندیغین ایچی دولودور سؤزله، بونلاری بیر-ایکی ساعات دا دئییب قورتارماق اولماز. یازسان اولار بیر کیتاب.
ألیم‌ده‌کی روزنامه‌لری سهمان قویدوم صاندیغین ایچینه، قالان حئکایه‌لرین ائشیدنه قدر، قاپیسین باغلادیم.
۰۱/۲/۷
یک پاسخ
چوخ گوزل! یاشییاسیز