«ائو» و «قولچاق» فیلم‌لری‌نین رئژیسورو تانینمیش آذربایجان سینماچیسی «اصغر یوسفی‌نژاد» حیاتا گؤز یومدو.
خبر آژانسلاری‌نین یایدیغی خبر اساسیندا تانینمیش صنعتکار بیر نئچه گون اول بئیین قاناماسی سببیندن خسته‌خانایا یئرلشدیریلیب و عملیات اولونماسینا و عملیاتین اوغورلو کئچمه‌سینه رغما، سه‌شنبه گونو شهریور آیی‌نین ۲۲-جی گونو تبریز خسته‌خاناسیندا وفات ائتمیشدیر.
اصغر یوسفی‌نژاد ۱۳۴۸-جی ایل تبریزده آنا‌دان اولوب، ایلک فیلمینی «باران رؤیاها» آدیندا ۳۴ یاشیندایکن رئژیسورلوق ائتمیشدیر؛ آنجاق صنعتکارا بؤیوک شؤهرت قازاندیران اونون آذربایجان تورکجه‌سینده یاراتدیغی «ائو» فیلمی اولموش، همن فیلم ۳۵-جی فجر فئستیوالیندا منصف‌لر هئیتی‌ طرفیندن فئستیوالین ان یاخشی فیلمی سئچیلمیشدیر. اصغر یوسفی‌نژادین «قولچاق» آدیندا سون فیلمینه فجر فئستیوا‌لی اوچون نمایش اجازه‌سی وئریلمه‌میشدیر. او رئژیسورلوقلا برابر سینما یازیچیسی کیمی ده تانینمیشدیر.
اصغر یوسفی‌نژادین وداع مراسیمی چرشنبه گونو ساعت ۱۰:۰۰-دا تبریز رادیو بیناسی‌نین قارشیسیندا کئچیریله‌جک و «وادی رحمت» مزارلیغیندا تورپاغا تاپشیریلاجاق.
«ایشیق» امکداشلاری آدیندان صنعتکارین ایتگیسینی حؤرمتلی عائله‌سینه، دوست- تانیشلارینا و صنعت اجتماعیاتینا باش ساغلیغی وئریر، خاطیره‌سینی عزیزله‌ییریک.