اوچاق گئده‌ک بورادان
گولر اوزله قاپیسیندا دایانان
باشقا بیر ماوی دنیزه
دوداقلار
دوزلاغا چئوریلمیش
اورمو دنیزی تک
یارامیزا دوز تؤکن‌لر وار
یووامیزی اوچورانلار
اللریمیزده
آغ آپباق قار دَنه‌جیک‌لری
اریمه‌دن،
اوچمادان گؤینه‌دیر یارامیزی
و هوپور
قانیمیزین لاختالانمیش قومسال‌لیغینا
□□□
اؤتورم
یولدان اؤتن بیر یولچو تک
آغ اللریمیزده قالان
تانری‌نین قارا باتداق مَلَک‌لری
جنتین قوولموش ایگیدی
قومسال‌لیغیندا باتمیش بیر گمی
اوره‌یی‌نین گؤرونمز سینیرلاریندا
بیتمیش دَوه‌تیکانلاری
فلامینقوولار
قاپامیش یئره
سئوگی لَلک‌لرینی
لؤوبر آتمیش اؤپوجوک‌لر
قوروموش گؤلون دوداقلاری‌نین چاتلاریندا
اؤلومونو گؤزله‌ین بیر قورد کیمی
اؤله‌جه‌ییک بو ناغیلین سونوندا
آخ‌خ‌خ
آغاردیغینیز قار دنه‌لرینده
باسدیراجاقسینیز سئوگینی
یاغیز تورپاغین چیلپاقلیغیندا

موغان – ۱۴۰۱/۵/۱۲