شاعر ده وار «ناظم»ین گؤزون چیخاریر
«ریتسوس»ون دفترینه گولور
سؤزلو سؤزدن آجیغی گلیر دئمک اولار.
الینده قلم
سانجی دا چکیر
دوغور دا
ائولادی‌نین آنجاق اوره‌یی یوخ
گؤزو یوخ.
گونشی دانیشان سؤزجوک‌لری
بوغازیندان آسماسا سکوتون محضرینده
دینجلمز.
آیاغینا تیکان باتمامالی‌دیر
اؤزو ده کؤکوندن باشینا دسمال باغلاماز.
قیش دولوب گؤزونه
هورور قایغی‌کئش‌لییه
منی گؤرنده دایناسور یادینا دوشور.
مئشه‌نی قوتور
سئلی دادامال سئویر
بو یابانچی خسته‌لیک.
