گؤرکملی آذربایجان صنعتکاری، ویولونیست و کامانچا اوستاسی علی فرشباف ۷۰ یاشینا دولدو.
۱۳۳۰نجی ایلین بهمن آیی‌نین ۳ -ده تبریز شهرینده دونیایا گؤز آچمیش و یئنی‌یئتمه‌لیگیندن موسیقی صنعتیله مشغول اولان صنعتکار، ایران آذربایجانی موسیقی صنعتی‌نین انکشافیندا قویدوغو دانیلماز مثبت تاثیرلری اعتباریله، چوخ تقدیره لاییق و شرفلی بیر صنعت فداییسی‌دیر.
عالی تحصیلاتینی «هنرستان موسیقی تبریز»ده باشا ووران اوستادین بسته‌له‌دیگی «گئجه‌دیر»(صمد بهرنگی)، «صبح نمازی»(محمود قبه‌زرین)، «صولح اولماسا»، «حیات»، «شانلی داغلار»، «تنبل حسن»(حبیب فرشباف)، «آی اوشاقلار»(علیرضا نابدل)، و دیگر ماهنی و مارش‌لاری اوزون ایللر صنعت‌سئونلر رغبتینی قازانمیش و دیللر ازبری اولموشدور.
اوستاد فرشبافین صنعت عؤمرونون بهره‌سی اولان اونلار صنعتکار بو گون آذربایجان موسیقی صحنه‌لرینده پارلاییرلار. اوستادین ملی رقصیمیزی متدیک اؤیره‌دیب یایماسی، عاشیق صنعتیمیزین علمی‌لشمه‌سینده‌کی قویدوغو تاثیری، حسن انعامی، یاشار شادپور، مسعود پایاوند، سهند اسدی، یاشار جوادپور کیمی تانینمیش آذربایجان صنعتکارلارینین تربیه ائدیلمه‌سینده چکدیگی زحمتلری، موسیقی مکتبلری اوچون یازدیغی ایکی جیلدلیک «کامانچا مئتودی» کیتابی و اونلار بو کیمی ایشلری، آذربایجان خالقی‌نین یادداشیندا قالارغی و سیلینمز پارلاق ایزلره چئوریلیبدیرلر. اونون چکدیگی زحمتلر، علی فرشبافی بوگون آذربایجان مدنیتی‌نین مشهورلاری سیراسینا و تبریز کامانچا مکتبی‌نین قوروجوسو سویه‌سینه یوکسلتمیشدیر.
بیز، ایشیق (آذربایجان ادبیات و اینجه‌صنعت سایتی) امکداشلاری، سئویملی اوستاد علی فرشبافی آد گونو موناسیبتیله تبریک ائدیر، گؤرکملی صنعتکارا داهادا یارادیجیلیق اوغورلاری، جان ساغلیغی و بارلی بهرلی عؤمور آرزولاییریق. ساغ اولسونلار.
یک پاسخ
سلامت اولالاروساییلاری چوخ.سیزدن بوگوزل سایتا گوره تشککورادیرم