چوخ تاسفله شهریور آیینین 23جی سهشنبه گونو آذربایجانین گؤرکملی صنعتکاری، سئویلن خواننده و امکدار آرتیست «یعقوب ظروفچی» باکی شهرینین «یئنی کلینیکا»سیندا وفات ائدیب و ابدیته قووشموشدور. گؤرکملی صنعتچی بیر نئچه گون اول کرونا ویروسا یولوخموش و آذربایجان دولتینین اونون معالجهسینده گؤستردیگی جدی طبی حیمایهلره رغمن حیاتینی ایتیرمیشدیر.
یعقوب ظروفچی 1333نجی ایلین فروردین آیینین 19دا تبریزین چرنداب محلهسینده دونیایا گؤز آچمیش، ۱۵ یاشیندا ایلک دفعه اولاراق تبریزین میللی تئلویزیاسیندا «ائولری وار خاناخانا»، «دئی گولوم گلسین آی ننه» و «دیلبر» کیمی آذربایجان ماهنیلارینی ایفا ائتمیشدیر. 1352نجی ایل تهران دانشگاهینین اقتصاد فاکولتهسینده اوخوموش و ایراندا انقلاب باش وئردیکدن آز مدت سونرا آلمانیایا مهاجرت ائتمیش و هامبورگ شهرینده واکال صنعتینده دیپلوما آلمیشدیر.
یعقوب ظروفچی ایران انقلابی عرفهسینده «آیریلیق»، «آچیل سحر» و آذربایجانین انقلابچی شاعری «علیرضا نابدل اوختای»ین شعرلرینه بستهلنمیش «آی اوشاقلار» و «کوردوستان» کیمی ماهنیلارینی اوخوماقلا بؤیوک شؤهرت قازانمیشدیر.
یعقوب ظروفچی 1368نجی ایل گؤرکملی آذربایجان خوانندهسی «گولآغا ممدوف» واسیطهسیله آذربایجان جمهوریسینه دعوت اولور. سونرالار خوانندهلیک صنعتینده یوکسک لیسانس تحصیلاتینی آمریکانین فلوریدا ایالتینده باشا وورور و آمریکا وطنداسلیغینا کئچیر.
یعقوب ظروفچی مهاجرت عؤمرونون چوخ ایللرینی باکی شهرینده یاشامیش و 1388نجی ایلدن آذربایجان جمهوریسی تابعلیگینه کئچمیش و همن ایل آذربایجان دولتی طرفیندن »امکدار آرتیست» آدینا لاییق گؤرونموشدور.
ایشیق – آذربایجان ادبیات و اینجه صنعت سایتی گؤرکملی صنعتکار یعقوب ظروفچینین ایتگیسینی آذربایجان خالقینا، صنعت عالمینه، صنعتکارین حؤرمتلی عائله و دوست تانیشلارینا باش ساغلیغی وئریر و خاطیرهسینی عزیزلهییر. عشق اولسون.
ایشیق – آذربایجان ادبیات و اینجه صنعت سایتی
23/06/1400
