ایسنا خبر آژانسی‌نین یایدیغی معلومات اساسیندا، «سیزه سلام گتیرمیشم» شعری ایله شؤهرت تاپان شاعر محمود دست‌پیش (واله) مرداد آیی‌نین 10نجی گونو ۸۷ یاشیندا ایکن تهران شهرینده حیاتینی ایتیرمیشدی.
محمود دست پیش(واله) 1313نجی ایل باکی شهرینده مهاجر بیر عائله‌ده آنادان اولموش، دؤرد یاشیندایکن عائله‌سی ایله بیرلیکده ایران آذربایجانینا گلمیش و اردبیل شهرینده مسکونلاشمیشدیر. «واله» ابتدائی و اورتا تحصیلاتینی بو شهرده بیتیرمیش، 1334نجی ایلدن موغانین گرمی شهرینده، سونرالار ایسه اردبیلین کلخوران قصبه‌سی و تهران شهرینده معلم‌لیک ائتمیش و نهایت 1359نجی ایل اؤز ایستگی ایله تقاعده چیخمیشدیر.
محمود دست پیش(واله) 1338نجی ایلدن رادیونون شعر و موسیقی شوراسی‌ایله امکداشلیغینی باشلامیش، بو امکداشلیق انقلابدان سونرادا عؤمرونون سونونا کیمی بو شورادا و «ارشاد اسلامی»نین شعر شوراسی ترکیبینده داوام تاپمیشدیر. اونون «سیزه سلام گتیرمیشم» شعری اونودولماز آذربایجان صنعتکاری اوستاد «علی سلیمی»‌نین بسته‌سی ایله اؤلکه‌دن کنار قونشو اؤلکه‌لرده ده گئنیش قارشیلانمیش و موللیفینه شؤهرت گتیرمیشدیر. بوندان علاوه ایران-عراق محاربه‌سینده اونون «خلبانان، ملوانان» شعری رادیو واسیطه‌سیله گئنیش یاییلمیشدیر.
محمود دست پیش(واله)ین چاپ اولموش اثرلریندن: «فولکلور آذربایجان»، «گل ائشیت نئی‌دن»، «ائل سوغاتی»؛ «داغا دونموشم»؛ «مشدی عباد نوماییشنامه‌سینین ترجومه‌سی»، «تورکی سؤزلوک»، «سلام گتیرمیشم» و «از فضولی تا شهریار» کیتابلارینی آد چکمک اولار.