ایل‌لر سونرا یوسف سکوتو حلقوموندا پوزوب، کندین یوز ایل‌لیک یولغون آغاجی‌نین باشیندان باغیردی: بلقیس‌سسسسسس. . .
سسی ماشین ایچینده اوزاقلاشان بلقیسه چاتماسا دا، ماشین آرخاسیندان قاچان یاشیدلاری آیاق ساخلاییب، سس صاحبی‌نین کیم اولدوغونو گؤرمک اوچون اطرافا باخیب، یولغون آغاجی‌نین کناریندا دورموش مهربیبی ایله آغاجین باشینداکی یوسفی گؤرونجه، هئچ بیر سس ائشیتمه‌میش کیمی یئنه ماشینین بوراخدیغی توزاناق آرخاسیندان قاچماغا دوام ائتدیلر. کیمسه یوسفین دانیشماغینی خاطیرلامیردی. بعضی کندلی‌لر یوسف یئرینه اونا لالوش دئیردیلر.
مهربیبی بوش کاسا ألینده، آغاجین قیراغیندا دایانمیش اون یاشلی قیزینی آپاران ماشینین آرخاسینداکی قیرمیزی چیراق‌لارینا گؤز تیکمیشدی. بلقیسین آدینی ائشیدنده باشینی قالدیرماسا دا، سس دیزلرینی سوستالدیب، یولغون آغاجی کیمی بئلی بوکولوب، دیزه چؤکنده بوش کاسا الیندن یئره دوشدو.
بیر آن اؤنجه گئری دؤنوش اومودویلا کاسانین سویونو بلقیسی آپاران ماشینین آرخاسیندان سَپمیشدی. گون‌اورتا چاغی همین بو کاسایلا بلقیسین ساچینا، جانینا سو تؤکوب، آلما یاناق‌لارینی، جانی‌نین گؤرونوب گؤرونمه‌ین بوجاق‌لارینی لیفله‌ییب، قیزینی عؤمورلوک خاطیرلاماق اوچون دقت ایله بلقیسه زیلله‌نیب، اونون صفتینی ازبرله‌ییب، دفعه‌لرجه وجودونو اییله‌میشدی. بلقیس ایسه قولچاق کیمی نه اینمیشدی، نه دینمیشدی. قیزی‌نین ساچی، جانی یاد کیشی وئردییی صابین عطرینی قوخویوردو.
یاد کیشی کئش ایله باغلانمیش اسکناس‌لاری کهورون قاباغینا قویوب، بیر دست پالتار، بیر ده او صابینی مهر‌بی‌بی‌نین ألینه وئریب، بلقیسی یویوندوروب، او پالتاری گئیدیرمه‌سینی ایسته‌میشدی.
ماشین گؤزدن ایتندن سونرا یوسف یئنه لال اولوب، خئیلک یولغون آغاجی‌نین باشیندا دایانیب، بوم-بوش یولا باخدی. یاشیدلاری قامیشلیغا ساری قاچاندا، قامیش دولو لؤتکه‌سینی باشینا بوراخدیغینی خاطیرلادی. مهربیبی کاسانی کوچه‌نین تورپاغی ایله دولدوروب باشینا سوووردوغونو گؤرونجه، چیویک پیشیک کیمی آغاجدان ائنیب، لؤتکه‌سینه ساری قاچدی.
یاشادیغی کپر ایله لؤتکه آتاسی بالاچ‌دان میراث قالمیشدی. باجیسی گول‌پری گئدن گونون صاباحیسی کندلی‌لر بالاچ‌ین جسدینی قامیشلیقدا تاپمیشدیلار. یوسف ایسه او گوندن بری لال اولموشدو. بالاچ اؤلندن سونرا، او لؤتکه‌نین بدیومن اولدوغو آغیزباآغیز دولانمیشدی. بدیومن لؤتکه‌نین صاحابی دا بدیومن اولار دئیه، کیمسه اونا یاخینلاشمازدی.
آناسی اونو دوغدوغو گون اؤلموشدو. آناسی‌نین اؤلومونو دوشوننده، اؤزو ده بدیومن اولدوغونا اینانیردی. اماراتلی یاد کیشی کنده گلن گونه‌جن باجیسی گول‌پری اونو گؤزله‌ییب، بؤیوتموشدو. کندلیلرین دانیشیق‌لارینا گؤره بالاچ یاد کیشی وئردییی اسکناس‌لارلا آلدیغی لؤتکه‌یه بئله بارماغی توخونمامیشدی. کندلی‌لر هر شئیی اونوتسایدیلار دا، یاد کیشی آپاران قیزلاری هئچ اونوتمازدیلار. قیزلارین آدی، نئچه‌یه و نئجه گئتدیک‌لری آغیزدان-آغیزا دولانیب، سونوندا ناغیل یئرینه سؤیله‌نیردی. یوسف ایسه آتاسی و گول‌پری باره‌ده ناغیل اولان سؤزلری ائشیدنده، ایچی ایچینی یئییردی.
تای‌توش‌لاری اونو گؤرمزدن گلمک‌لری یئترلی دئییلمیش کیمی گاهدان اونو گیره‌له‌ییب، آزارلاییردیلار. بدیومن اولماسایدی، بلکه اونو دا اؤزلریندن بیری ساییب، خوسو-خوسو اویون‌لارینا قاتاردیلار.
ایندییه کیمی لؤتکه‌سینی باشینا بوراخمامیشدی. قامیشلیغا چاتاندا، اونو بوراخدیغی یئرده گؤرونجه راحاتلاییب، بدیومن اولماق دا پیس دئییلمیش دئیه دوشوندو. قامیشلیق و لؤتکه‌سی اونون چؤرک‌آغاجی ایدی. بیر مدت ایدی پرده‌خلک دوزلدن جان‌بی‌بی‌یه ساتدیغی قامیش‌لارلا قارنینی دویوروردو.
بیرآز اؤنجه لؤتکه‌نی قامیشلیقدان ساحله چیخاردیرکن پکیر ایله بادارین دانیشیق‌لارینا قولاق مسافری اولموشدو. بادار کاتدانین اوغلو، پکیر ایسه بلقیسین عمیسی اوغلویدو.
«کهور آتامین یئددی میلیونونو رد ائتدی. دئدی اماراتلی یاد آدام اون میلیون وئرن یئرده عاغلیم قاچماییب کی یئددی میلیون آلیب، قیزیمی گؤندریم آروادلاریوا قاراواش اولوب، ال آلتیندا ایشله‌ییب، دایاق یئسین! کهور دئییر امارات چوخ اوزاقدا اولسا دا، آنجاق او یاد آدام قویماز بلقیس دایاق یئییب، آج قالسین. من ده آنام کیمی سئوینیرم کهور آتامین یئددی میلیونونو رد ائله‌دی».
«یاد آدام بو گون بلقیسی گؤتورمه‌یه گلیب. کهور دا یاد کیشی ایله گئده‌جک زابل‌دان اؤزونه موتور آلسین. دئییر موتور ایله سرحدده بنزین داشیییب، ساتاجاق».
پکیر ایله بادارین سؤزلری پاییز ایلدیریمی کیمی یوسفین باشیندا شاخمیشدی. قامیش دولو لؤتکه‌نی قامیشلیقدا باشینا بوراخیب، بلقیسی گؤرمک اوچون کنده ساری قاچمیشدی. اوزاقلاشان ماشینی گؤرورکن یولغون آغاجی‌نین باشینا دیرماشیب، بئش ایل‌لیک سکوتونو پوزوب، بلقیسی سسله‌میشدی.
ایندیسه ماشین آرخاسیندان قاچان یاشیدلاری دا بادار ایله پکیر کیمی پالتارلارینی سویونوب، شورت قاتینا بیرلیکده خوسو-خوسو اویناییرلار. یوسف اونلارین یئره سَره‌له‌دیک‌لری پالتارلاریندان یان کئچیب، لؤتکه‌سینی یئنیدن قامیشلیغا ایته‌له‌ییب، میداف گوجو ایله لؤتکه‌نی سوروب، قامیش‌لارین اورتاسیندا گؤزه‌گؤرونمز بیر یئرده دایانیب، لؤتکه ایچینده‌کی قامیش‌لارین اوزرینده اوزانیب، گؤیه گؤز تیکدی. بعضی واخت‌لار لؤتکه‌ده اوزانیرکن ساحلده اوینایان اوشاق‌لارین سسینی دینله‌ییب، آستا-آستا ائشیتدییی سؤزلری اؤز-اؤزویله تکرار ائدیب، اؤز حلقوموندان چیخان سسی دینله‌یردی. بئش ایل عرضینده بو گونه کیمی اؤزو و قامیش‌لاردان سونرا کیمسه سسینی ائشیتمه‌میشدی. ایندیسه خوسو-خوسو اوینایان یاشیدلارینین سس‌لرینی بئله ائشیتمک ایسته‌میر.
گول‌پری گئدندن بری هردن بیر پردهنین آلتیندان کپرین آستاناسینا بیر کاسا کشک‌زرد قویان الدن سونرا هئچ کیم اونا یاخینلاشماییب. بلقیس ایله قارشیلاشان گونه‌جن یئمک گتیرن الین کیمه عاید اولدوغونا کنجکاولیق ائتمه‌دن همیشه یئمه‌یی یئییب، ال کاسانی راحاتجا گئری گؤتورسون دئیه، اونو آستانایا قویوب، شمدی باشینا چکردی. گاهدان باشینی شمد آلتیندا گیزلتدییینده بالاچ قارانلیقدا گول‌پری‌نین ألیندن یاپیشیب، بیرلیکده آرخاسیندا قیرمیزی چیراق‌لاری ایشیلدایان ماشینا ساری گئدیب، او ایسه اوغرونجا پرده‌خلک قیراغیندان اونلاری ایزله‌یر. سونرا بالاچ‌ین لال کؤلگه‌سی گول‌پری‌نین الینی بوراخیب، قیرمیزی چیراق‌لاردان اوزاقلاشیب، کپرین پرده‌سینی قالدیریب، ایچری گیرر. یوسف ایسه بو بالاچ‌دان قورخوب، شمدی قیراغا آتار.
گول‌پری‌نین گؤز ببک‌لرینی دئیه‌سن بلقیسین گؤز یوواسیندا اکمیشدیلر. بیرینجی سفر بلقیسین گؤزلرینه باخدیغی گون گول‌پرینی خاطیرلامیشدی. بلقیس‌له دانیشماق ایسته‌سه ده، همیشه کیمی نیطقی قوروموشدو. او گون سحر یوخودان آییلدیغیندا بوش کاسا هله ده کپرین آستاناسیندایدی. بیرینجی سفر ایدی یئمک گتیرن ال، کاسانی گئری قایتارمامیشدی. تعجب ایله بوش کاسایا باخیرکن پردهنین آلتیندان همیشه‌کی ال دئییل، اؤز ألی بویدا بیر ال آستانایا اوزانمیشدی. جَلد یئریندن قالخیب، پرده‌نی قیراغا چکیب، گول‌پری‌نین گؤز ببک‌لرینی بلقیسین ایشیلتیلی ماوی گؤز ببک‌لرینده گؤرموشدو.
گاهدان قامیشلیقدا لؤتکه‌نین ایچینده اوزانیب گؤیه باخارکن اونا ائله گلیردی کی، شار یئکه‌لیکده دامجی‌لارلار گؤی اوزونون ماوی‌لیییندن قوپوب، بلقیسین گؤز یوواسینا سوزولوب. بونونلا بئله گؤی اوزونون ماویلییی بلقیسین ببک‌لری کیمی ایشیلتیلی دئییلدی. گاهدان گؤیلو ایسته‌ییردی تانری گؤی‌اوزونو شار یئکه‌لیکده بؤلوشدوروب، کندلیلرین گؤز یوواسیندا اکسین. اونلارین هامیسی‌نین گؤزلری بلقیسین گؤزلری کیمی اولسایدی بلکه قوروموش نیطقی آچیلیب، کندلی‌لرله دانیشا بیلسه ایدی، داها اونون قارشیسیندا بالاچ و گول‌پری‌دن ناغیل ائتمزدیلر.
قامیشلیق ساحلینده خوسو-خوسو اوینایان یاشیدلارینین سس‌لرینی ائشیتمه‌سین دئیه، بارماق‌لارینی قولاق‌لارینا تیخیب ماوی گؤیه گؤز تیکیب. داها گؤیلو ایسته‌میر تانری ماوی گؤیو شار یئکه‌لیکده بؤلوشدوروب، کندلیلرین گؤز یوواسینا أکسین.
بیر آن مهربیبی باشینا تورپاق تؤکن کاسا گؤزونون اؤنونه تیکیلدی. او کاسایا تای کاسادا کشک‌زرد یئدییی دفعه‌لر سایا گلمز ایدی. اون میلیون تومن ایله نئچه کاسا کشک‌زرد آلماق اولار دئیه، دوشوندو. اون کاسا؟ ایییرمی کاسا؟ یوز کاسا؟. . اماراتلی یاد آدامین بیر بو قدر پولو وارسا، یقین کی، بلقیس اوچون سوزن‌دوزی پالتارلار ایله تباهگ و تنورچه کیمی دادلی یئمک‌لر ده آلا بیلر. کیشی‌لرینین بیر بو قدر پولو اولان اماراتین یقین کی، زابل‌دان چوخ اوزاقدا اولمالیدیر. گؤره‌سن کهور نه زامان زابل‌دان آلدیغی موتور ایله کنده گئری دؤنه‌جک؟ گؤره‌سن کندلیلرین گؤزونده، اونون دا موتورو بدیومن بیر موتور اولاجاق؟ گؤره‌سن زابل‌دان اماراتا نئچه ساعاتلیق یولدور؟
بیردن-بیره یاز ایلدیریمی کیمی بیر شئی باشیندا چاخدی. تلم‌تله‌سیک قالخیب، بوتون گوجو ایله میدافی سویون ایچینه باسیب، قامیش‌لارین آراسیندان لؤتکه‌نی ساحله ساری سوردو.
مهربیبی تورپاقلی ساچ-باشییلا اؤز کپرلری قارشیسیندا دیزلرینی قوجاقلاییب، بوش کاسایا زیلله‌نمیشدی. یوسف اونون ساچی‌نین، اوست-باشی‌نین تورپاغینی تمیزله‌ییب، سوروشدو: «امارات زابل‌دان چوخ اوزاقدی؟»
مهربیبی اینانماز-اینانماز باشینی قالدیریب، جانیندا بیر گیزیلتی گزدی. بلقیسین گؤز ببک‌لری یوسفین گؤز یوواسیندان اونا باخیردی. یوسف ایسه دئدی: «اماراتا گئتمه‌لییم، یولو نشان وئر!»
ایضاح:
بو حئکایه‌نی حؤرمتلی صنعتکار، صابر قاضی جناب‌لارینین «فرزندان فاقد هویت» فتو توپلوسو تأثیری آلتیندا یازمیشام.
یک پاسخ
داغلار ییخیلماسا دره دولماز گینه عمی
آتلی توفنگی ساخلار بالا طپانچنی
بو قارا گونللرین هله صاباحی ده اؤلار
چوخ یول دگیر چایدا چوبان آختاریر سنی
***
بابو