قارا تیکان کولودور گؤزلریم
بیر جوت قوش یوواسی وار گؤزلریمده
سئوگی قوشلارین یوواسی
ترپه‌شیرلر
بویلانیرلار سحر-آخشام…
اوچماغا قانادلاری یوخ،
اوخوماغا دوداقلاری…
کیرپیکلرین حصاریندا ساخلانمیش سیسقا قوشلار،
گؤز یاشلاریندا اوزورلر
کدر بولاغیندا
درد تئللرینی دنله‌ییب،
سو ایچیرلر آیریلیق گؤللریندن…
آیاقلارینی باغلاییب
گؤزلرینی تیکمیشم
اوچوش،
اؤلوم آداسی‌دیر اونلارا
و کول اولماقدیر اوخوماق
دارتیشماسینلار دئیه
قارا گیله یئدیردیرم اونلارا هر گون…
بیر کدر قوشو وار اوره‌ییمین پنجره‌سینده
سوسوب،
داها اوخومور…
