سنی من یاراتمیشام
تانرینی اتهام ائله‌مه
یئددی گئجه، یئددی گوندوز
استئتیکانی اندر دؤندر ائله‌میشم
قاشلارینی گؤزونه کماندار
گؤزلرینی ال‌چاتماز، کئچیدسیز قالا.
گوناهلارین هامیسین گؤزه‌للییینه جالامیشام
پای آپارسین شاه دا، شریعت ده،
سلسبیل دانیشیغیندان
پارلاسین مالکین جهنم ایشی،
دیلچی‌لر اؤلچه بیلمه‌دن دیلینی
متافیزیکانی ایره‌لی سورسونلر.
عکاس‌باشی‌نین چکدییی شکیل
سنی پنجره‌دن گؤستریر
بو منیم سن‌یم دئییل
من سنی آنلاشیلماز بیچیمده
هرجایی یاراتمیشام.
