۱. وطنداش
تاختا قاپینی یاریمچیق اؤرتوب
تبریزین کوچه‌لرینده یولا دوشدو
هارا گئده‌جه‌یینی بیلمه‌سه ده.
کوچه باشیندا
ساتیش یئرینده جیلوه‌له‌نن گونده‌لیک‌لری
اؤته‌ری اولاراق گؤزدن کئچیردی
ماراقسیز،
کؤنولسوز.
آخشاما دک بیر ایش گؤرمه‌دن
دولاشدی شه‌هری.
آخشام ائوه دؤننده
قیرمیزی دریلی بیر وطنداش
کؤکس اؤتوروردو باخیشلاریندا.
۲. سویغون
آلدیلار الیمدن
گونون گون‌اورتا چاغی
قول‌لاریمی
آللاهین محضرینده.
دردیلر دفتریمدن
قیزیل آلمانی
قوی بولودلار ایز بوراخسین، دئیه
سئوگی سوراغلی شعریمین باخیشلارینا.
قایتار اؤزومه دئیه بیلمه‌دیم
آلما قوخوسون
چؤره‌ک منده‌می.
