«قافلانتی»نین شعرلری آذربایجان جمهوریسینده نشر ائدیلدی
گؤرکملی آذربایجان شاعری «مرادعلی قریشی(م. قافلانتی)نین شعرلریندن عبارت بیر مجموعه آذربایجان جمهوریسینده نشر ائدیلدی.
آذربایجان ملی علملر آکادمیاسی‌نین نظامی گنجوی آدینا ادبیات اینستیتوتونون علمی شوراسی‌نین ۳۰ نویابر ۲۰۱۹نجو ایل تاریخلی قرار ایله نشره حاضیرلانان بو شعر مجموعه‌سی، باکی شهرینده «علم و تحصیل» نشریاتی طرفیندن یاییلیبدیر.
ادبیاتشناسلار، متخصص‌لر، طلبه‌لر و گئنیش اوخوجو کوتله‌سی اوچون نظرده توتولان «اولو چینار» عنوانلی بو شعر مجموعه‌سی آذربایجان ملی علملر آکادمیاسی‌نین تدقیقاتچیسی، فیلولوگیا اوزره فلسفه دوقتورو «قنداب علی یئوا»نین مولفلیگی ایله ۲۵۲ صحیفه‌ده ترتیب و نشر ائدیلیبدیر. کیتابا ائل شاعریمیزین مختلف ایللرده نشر ائتدیردیگی شعرلری ایله برابر چاپ اولونمامیش اثرلری ده داخیلدیر.
آذربایجان ملی علملر آکادمیاسی‌نین نظامی گنجوی آدینا ادبیات اینستیتوتونون علمی شوراسی‌نین قراری ایله «مرادعلی قریشی(م. قافلانتی)نین حیات و یارادیجیلیغیندان عبارت مونوگرافیا دا حاضیرلانماقدادیر.
2 پاسخ
یاد هر دو شاعر عزیزمان که جناب ائل اوغلو در یادداشت خود نام بردند ، مرادعلی قریشی ( قافلانتی ) و دکتر حسن ریاضی ( ایلدیریم ) گرامی باد .
اونودولماز اینسانلار
«… مقدس اؤلکه‌میز آذربایجانین میانا بؤلگه‌سینده یئرله‌شه‌ن «چاراویماق» ماحالی نین «حیدرآباد» کندینده ایشیقلی دونیایا گؤز آچیب، گنج‌لیک ایللرینی او کندین سئحر ائدیجی طبیعتی‌نین قوجاغیندا سوره‌ن «مراد علی قریشی» (قافلانتی) آلتمیش بئش یاشینا یاخینلاشماقدادیر. یاریم عصره یاخین دوغما یوردوندان اوزاق دوشوب میلیونلارلا سویداشلاری کیمی تهراندا مسکن سالمیشدیر. اوتوز ایله یاخین آنا دیلینده شعرلر یازان «قافلانتی» ادبیات سئوه‌رلریمیزله اؤز کتابلاری و مطبوعات وسیله‌سی‌ایله تانیشدیر. او، چئوره‌سینده یاشایان انسانلارین آغری ـ آجیلاری، ایستک و هیجانلارینی ساده و صمیمی مصراعلاری‌ایله اوخوجولارینا چاتدیریر. کؤیرک قلبلی شاعیر قافلانتی، اؤز تخلوصونو قافلانتی داغیندان (قافلانکوه) گؤتوروبدور. او ایستی قانلی یوموشاق احوال ـ روحیه‌لی بیر انسان دیرسا شعرلرینده عیبجرلیکلره قارشی سرتلیک وار، قاباریقلیق وار، انیلمزلیک و مبارزلیک روحو واردیر.
شاعیر قافلانتی‌نین آلتمیش بئش ایل ثمره‌لی عومورو ادبیاتیمیز اوچون داهادا اوغورلو اولوبدور. ایندییه‌ده‌ک «سئچیملش‌اثرلر» او احساسلی شاعریمیزین (کندیمیزین بیر ایل‌لیک تاریخی)، «شعر مجموعه‌سی» و «عومور آیناسی» عنوانلارلا کتابلاری چاپدان بوراخیلیب دیر، قافلانتی یارادیجیلیغیندا موضوع جغرافیاسی گئنیش، تخیّل عنصری ایسه وسعتلی و شیرین‌دیر. اونون خیال دونیاسی مصراعلارا چئوریلنده پوئتیک اثرلر و پؤیئمالار یارانیر، اوخوجولارین احترامینی قازانان قافلانتی مختلف ژانرلاردا اثرلر یارادمیشدیر. او بوتون کلاسیک فورمالاردا استعدادینی ثبوتا یئتیرمیش بیر شاعیردیر. قوجامان شاعیریمیز بوتون اثرلرینی چاپا یئترسه ایستکلی اوخوجولاریمیزلا فیکیر مبادله‌میز داها گئنیش، داها فاکتیلی اولاجاقدیر. قافلانتی یارادیجیلیغینی آراشدیرماق بوکیمی آز حجملی مقاله‌لرله ممکن دئیل. اونون باره‌سینده داهادا آرتیق فیکیر مبادله‌سی ائتمک اوچون اؤتن ایللرده تانینمیش شاعیر و ادبیاتچیمیز «حسن ایلدیریم»ین، قافلانتی‌نین «عومور آیناسی» آدلی کیتابینا یازدیقی اؤن سؤزه مراجعتیمیز گره‌کلی گؤرونور…..»
۲۲ ایل اؤتوب کئچیر بو یازیلاری تبریز ده یاییملانان دیرلی «ارک» هفته لیگینده نشرائتدیریگیم گونلردن . قافلانتی دونیاسی دوغرودان دا آز حجملی مقاله لرله تحلیل اولوناسی دئیل ایدی. یقین کی اونون بو سون اثرینده داهادا فاکتلی دانیشیلیبدی. اییرمی بئش ایل سورن صمیمی دوستلوغوموز دا ،اونو همیشه ایراده لی، همیشه دایاناجاقلی و همیشه بیراوزلو گؤردوم .آغیز ادبیاتیندا تئز – تئز ائشیتدییمیز “بوتون دونیا دییشدی ، ده ییشمدی بوکیشی” جومله سی، اونون اولدوغونو داها دا لایقینجه ایضاح ائده بیلر. آغیر یللرین دؤزوملو شاعیرلریندن اولان «قافلانتی» نین میللی دئموکراتیک ادبیاتیمیز اوغروندا چالیشماسی، و اونون گئنیش کوتله آراسیندا یاییلماسینا چکدیگی زحمت لر بوگون« اولوچینار» آدلی تحلیلی اثرده یاییلیر سا ،چکیلن هر بیر تاریخی قایغینین اونودولماماسینی گؤستریر. همده گؤستریر کی عؤمور بویو ائلینین خالقینین کئشینده کیشیلیکله دایانان هربیر فداکار اینسانین کئشیینده دایانانلار دا آز اولماییر.ساغ اولسون. «اولوچینار» اثرینیالیمیزه و گلجک نسیللره چاتدیران مفکوره لی اینسانلار اینانیریق کی، خالق اوچون یاشانان هربیر شرفلی عؤمور بیرگون بئله تقدیره لایق گؤرونه جک .اومید ائدیرم کی« اولوچینار»ین بوتایدا ، عرب الیفباسیله ده نشرینین شاهیدی اولا بیلک یئری گلمیشکن دیرلی شاعیریمیز ین اثرلرینی تدقیق ائدیب اونو دونیا و آذربایجان ادبیاتی وورغونلارینا چاتدیران علمی شورادان ودیرلی عالیم قنداب خانیم علی یئوادان بیر قلمداش کیمی تشککورلریمی بیلدیریرم. ایستردیم شاعیریمیزین بیر نیسگیللی غزلینی اوخوجولارینا هدیه ائتمیش اولام. یولو داواملی اولسون اینام و ایراده سینده همیشه چینار گؤرکملی گؤرونن شاعیریمیزین……. ائل اوغلو – ۲۷/۵/۱۳۹۹
سن‌گله‌سن
آیلار ایللر گؤزه‌لیم گؤزله‌ییرم سن‌گله‌سن
ایلقاریم، ایلقارینا سؤیله‌یه احسن گله‌سن
اویمادیم هر گؤزه‌لین نازینا بیر آندا اینان
نقدر وارنفسیم سسله‌ییرم سن‌گله‌سن
فرقتین ائتدی منیم با غریمی‌شان – شان گؤزلیم
عشقه جانیمدا گئده، سؤیله‌یره‌م سن گله‌سن
یاریلیبدیر، یاریلار، دان یئری ظلمت گئجه‌ده
سحرین زمزمه‌سین دینله ییرم سن گله‌سن
پوزماییب آندینی، ایلقارینی «قافلانتی» دؤزور
دردینین چاره‌سی بو دهرده ،سن سن ،گله‌سن