«غلامرضا صبری تبریزی» وفات ائتدی

آذربایجان شاعری و اجتماعی شخصیتی، فلسفه علملری دوقتورو «غلامرضا صبری تبریزی» اردیبهشت آیی‌نین ۱۹-جی گونو آذربایجان جمهوریسی‌نین پایتختی باکی شهرینده وفات ائتمیشدیر.
«غلامرضا صبری تبریزی» ۱۳۱۳-جی ایل تبریز شهرینین شکیللی محله‌سینده دونیایا گؤز آچمیش و عؤمرونون بیر چوخ ایللرینی اؤلکه‌دن کنار و داها آرتیق انگلستان اؤلکه‌سینده و آذربایجان جمهوریسینده یاشامیش و انگلستانین ادینبورگ دانشگاهی‌نین اورتا شرق بؤلومونده علمی مصلحتچی کیمی چالیشمیشدیر.
«غلامرضا صبری تبریزی» بدیعی یارادیجیلیغا گنج چاغلاریندان باشلامیش، ایندییه‌دک بیر چوخ مقاله‌لری، شعر مجموعه‌لری، مونوقرافیاسی، خاطیره‌لری و مصاحبه‌لری انگلیس، تورک و آذربایجان دیللرینده چاپ اولموشدور. او «آذربایجان یازیچیلار بیرلیگی»نین فخری عضوی‌ایدی. آذربایجان جمهوریسینده چاپ اولموش اثرلریندن: «وطن حسرتی»، «منیم ایکی دونیام»، «حیات فلسفه‌سی»، «باخیش‌لار، دوشونجه‌لر، آرزولار»، «سؤنمز اوجاق»، «سئچمه شعیرلر»، «اومید چیراغی»، «غربت هارایی»، «خدافرین»، «تاریخین جانلی منظره‌لری»، «زامانین نبضی»، مودروکلوک فلسفه‌سی»، «کؤرپو»، «خاطیره ماهنیلار»، «سس‌سیز هارای»، «ساحیلسیز دنیز»، «پوزولموش دونیا» و … س آد چکمک اولار.
بیز «ایشیق» – آذربایجان ادبیات و اینجه صنعت سایتی – امکداشلاری، آذربایجان شاعری و ادیبی «غلامرضا صبری تبریزی»نین ایتگیسینی ادبی- مدنی جمعیتیمیزه، حؤرمتلی عائله عضولرینه و دوست- تانیش‌لارینا باش ساغلیغی وئریریک. خاطیره‌سی عزیز اولسون.

«ایشیق» – آذربایجان ادبیات و اینجه‌صنعت سایتی
۲۱/۰۲/۱۳۹۹

ایضاح: صبری تبریزی‌نین حیات و یارادیجیلیغینا دایر وئریلن معلومات ویکی پدیا صحیفه‌سیندن آلینیبدیر. 
https://az.wikipedia.org/wiki/Qulamrza_S%C9%99bri_T%C9%99b