کروناویروس دا ویروسا بَلشمیش!
نیگار خیاوی

بشرین فیکری –ذیکیری همیشه دونیانی اؤز خئیرینه دییشدیرمک اولموش، بونو باجاریب دا. آنجاق بوراسینی چؤرتکه-حسابا سالماغی آنلامادی کی، بیر گون گلر بو قیسا مدتلی منفعت لپه-لپه بورنونون دلیکلریندن گلر. بو گونلر همین گونلرین هله باشلانغیجی. رحمتلی آتام دئمیشکن: آی بالا، هله بی دؤزون، اصلی شیپپیلتی ایرلیده!
کروناویروس بشرله حسابلاشماغا گلمیش، اولسون، بو اونون حاققی، آنجاق چؤرتکه-حسابیندا بیر بالاجا اَیریلیک گؤرونور، بو والاحضرتین دیلینی قانان اولسایدی، اونو باشا سالاردی کی: “قبله عالم ساغ اولسون، تاجینیزا آند اولسون بیزلرین خبریمیز اولماییب انسانلیغین، طبیعتین ایچینه (اوزوم مبارک آیاغیزین آلتیندا!) آفتافا گؤتورنلر، نئجه و هاچان گؤتوردولر بو آفتافانی! بونا گؤره قبله عالم آختاریب آراشدیریب اصلی گناهکارلاری تاپیب دا اونلارین یاغلی خیرتدکلریندن یاپیشماسی دونیا‌دا عدالتین برپا اولماسینا خئیلک یاردیمجی اولار.”
آنجاق ائله بیل اَیریلیک چؤرتکه-حسابین خاصیتی کیمی بیر شئی. اَیریلیک چؤرتکه-حسابین قانینا گیرمیش ویروس اولاراق دونیا‌ عالمین هر سلولوندا حؤکمونو سورمکده. یعنی کروناویروس اؤزو ده باشقا بیر تانینمیش، قدیم، دده‌لی بابالی ویروسا بَلشمیش: اَیریلیک ویروسو! چؤرتکه-حسابین اَیریلیگ ویروسو کروناویروسا داراشماسی دا بو قانون اوزوندن اولمالی بلکه. کروناویروسون عدالته بویون اَیمه‌مه‌سی ده بوردان بللی. و گئنه بشرین عدالت بکلمه ایدئالیزمی یالنیز بیر دویغو اولاراق بوشا گئتمیش آرزویا چئوریلمکده گؤرونور. بشرین جیب گودنلیک گوجونون خیال ائتدییی دَییشیم ظلم، کیرلیلیک و قابالیق اوزرینده قورولدو، اؤزو ده آزغینلیقلا. سونرا بو آزغینلیق یاواش یاواش جیلو گمیره-گمیره وار گوجو ایله انسانلیق سرحدلرینی ساققیز کیمی چئینه-ییب چوروتمه‌یه باشلادی. دئمک کی، جیب گودنچیلیک خسته‌لیگی بئلنچی بیر کاراکتره احتیاجی وارمیش.
آرتیق بو آیدین بیر گئرچک کی، یالنیز جیبلرینی گودن آدام سورولری (اوزدن ایراق!) عالمی قاتیب قاریشدیرا-قاریشدیرا، دیبسیز جیبلرینی دولدورا-دولدورا انسانلیغین و طبیعتین قانونلارینی هئچه سایدیلار. اونلارین گناهی اوزوندن یاش دا قورونون اودونا یانماقدا. کروناویروس بشرین آزغین شکیلده دییشیمچی، گلیشیمچی و جیب گودنچی چابالارینین قارنیندان حیاتین میدانینا دوغدی، آدی دا اوستونده: تاج (crown) ویروس! فضولی دئمیشکن، ایشته، بو تاج ویروس نه آتوم بومباسینی دانزئرینه ساییر، نه بشر بئینینین یاراتدیغی ساواش طیارّه‌لری، نه دنیزآلتی، دنیزاوستو گمیلری، نه تحریملری، نه بشرین قوندارمیش اولدوغو سرحدلری، نه انسان حاقلارینی … بعضیلری کیمی گؤزه گؤرونمز اولان بو تاج ویروس بللی دئییل هانسی پادشاه، هانسی سلطان و یا هانسی جمهور باشخانینین تپه‌سی اوستونده دونیا‌نی آیاقلایا – آیاقلایا گزیب دولاشماقدا. آنجاق هر نه‌دیسه، کیمین باشینداسا، بوتون دونیا‌نی قارمامایینجا یئرینده دینج اوتورانا بنزه‌میر، اؤزو ده نه بومباسی وار، نه طیارّه‌سی، نه فیلانی بهمانی. هم ده بشرین سککیزی اوسته دوققوز گتیردییینی شاققاناق چکرک هایقیریر. بئله آنلاشیلیر کی، بشرین هر بیر سککیزینین اوستونه، بیلمه‌دییی دوشونمه‌دییی یئردن ائله بیر دوققوز چیخاران چیخار کی، الی-قولو یئردن ده اوزولر گؤیدن ده.