تورپاق
چیچک ـ چیچک
مهربانلیغین باغیشلاییر انسانلارا،
یاشیل ـ یاشیل سیغال چکیر سینیرلریمیزه.
سرحدلرین او تایی دا یازدیر
بو تایی دا؛
اسن کوله‌یین سرینلی‌یین
هر ایکی تایدا دویماق اولور،
قوشلارین هارالی اولماسین
کیمسه سوروشماییر اونلاردان،
پاسپورت ایسته‌میرلر
سرحدلری آشاندا.
طیاره‌لرین اؤزل قانونلاری وار آمما
گمی‌لرین ده هکذا
قورومایا بیلمزلر اونلار
وئریلمیش کسین قرارلاری
آخار باخارلی‌دیر گؤیلر، دنیزلر.
سئوگی‌نین عنوانی نه‌دیر دئدینیز؟
اونا سیجیل وئرنده
صیفیر، صیفیر، نئچه یازدینیز
تلفون نومره‌سی‌نین اولینده؟
خیرچین گئجه‌نین دؤزولمزلی‌یینه
سایریشاراق سو قاتان اولدوزلار
کیمسه‌نین دئییل.