ادبی گنجلیگین بیر بوداغی‌دا قیریلدی
چوخ تاسفله آذربایجان ادبی گنجلیگی‌نین استعدادلی نماینده‌لریندن اولان شاعر «اسماعیل پیل‌پایه» شهریور آیی‌نین ۱۷نجی گونو موغانین پارس‌آباد شهرینده اوره‌ک انفارکتی نتیجه‌سینده حیاتا گؤز یومموشدور.
اسماعیل پیل‌پایه ۱۳۶۳نجی ایل موغاندا دونیایا گؤز آچمیش و اورادا بویا باشا چاتمیش، عالی تحصیلینی «عمران» رشته‌سینده بیتیرمیشدیر.
مرحوم شاعرین شعرلری دؤرو مطبوعات و داها آرتیق اینترنت صحیفه‌لرینده یاییلمیش و عمومیتله سربست قیسا شعرلردیر. سون واختلار شعر مجموعه‌سینی «دیشلریم تئلگراف وورور» آدیندا نشره حاضیرلامیش، آنجاق تاسفله شاعر اوره‌یی‌نین بیر یوللوق دایانماسی اونا ایلک شعر مجموعه‌سی‌نین نشرینی گؤرمگه امکان وئرمه‌میشدیر.
ایشیق- آذربایجان ادبیات و اینجه صنعت سایتی امکداشلاری آدیندان ادبی گنجلیگیمیزه اوز وئرن بو ایتگینی مرحوم شاعریمیزین حؤرمتلی عاییله‌سینه، ادبی جمعیتیمیزه و شاعرین یولداشلارینا باش ساغلیغی وئریر، عزیز خاطیره‌سینه عشق اولسون دئییریک.
ایشیق- آذربایجان ادبیات و اینجه صنعت سایتی
۱۸/۰۶/۱۳۹۸
