آیاقلاریمی دره-دره ائویمیزین ایکینجی قاتی پیلله‌لریندن اندیم؛ امما باشماقلاریمی گئینده آنام جین کیمی آشاغیداکی هالیمیزین قاپیسین آچدی؛ امنیه مامورلاری کیمی الین ایکی بؤیرونه ویریب سوروشدو: خئیر اولا؟ صوبحدن آغا هایانا تشریف آپاریر؟!
الیمده زیست‌شناسی کتابیمی گؤستره‌رک دیلیم توتولا-توتولا دئدیم: آ. . ‌. . آناجان دوستلاریملا درس اوخوماغا گئده‌جه‌ییک. بو. . . . بودا کتابیم.
باش- آیاغیمی مامورلار سایاقی بیرده سوزوب دئدی: او نایلون ندیر الینده؟!
– بو؟ بو دا ائله درسیمیزه مربوط‌دیر و نایلون فریزره ییغدیغیم بئش آلتی هورومچگی گؤستردیم. بو ذره‌بین‌له بونلارین آناتومیسینه باخاجاغیق آنا. یارانیشلارین مطالعه ائده‌جه‌ییک.
– نه عجب درس ده یادینا توشوب!! گرک اوزرلیک سالام سنه. درس اوخویان اولسایدین ائله خونخوردان چیخاردین، سرباز گئتمزدین.
یئنه ضعف داماریمین اوستونه ال قویموشدو آنام. بو کنکوردان چیخماماق و سرباز گئتمک اولموشدو بؤیوک باش قاخینجیم. بو دؤرد بئش گون مرخصیلیگی ده بورنومدان تؤکه‌جکدی ننه جانیم.
– ایندی ایذین وارمی گئده‌م؟!
– گؤروم او نه دیر کاپشنینین آلتیندا شیشیب؟!
– آی آنا واللاه بیللاه گیلانار شربتی‌دیر. دئدیم چؤلده درس اوخویاندا سوسایاریق.
– یاخشی اوروجونو هله یئییرسن ایشیم یوخ. امما گؤزله‌یین توتولمییاسیز.
بونو دئییب هالین قاپیسین اؤرتوب ایچری گیردی. شوکور ایلک ماموردان جانیم سالامات قورتاردی.
ائشیگه چیخیب قاپینی اؤرتدوم. اوندان آچاریملا ماشینسیز پارکینگیمیزین قاپیزین آچیب لاققا-تاراققا دستِ سوّم موتورومو ائشیگه چکدیم. بیر شیکیل نفس مصنوعی وئریب یاندیردیم. یولدان غولام کلّه‌یله، حسن قارانی دا گؤتوره‌جکدیم. او ایکی دوستومودا گوتوردوم گئتدیک خییوو چایینین لاپ اوج بوجاغ بیر یئرینه. اوردا دوستلاریمدا یوک یاپلارین تؤکدولر. بیری اوچ چیپس، بیری ده بیرآز خیارشور گتیرمیشدی. من ایسه فخریله گتیردیگیمی کاپشنیمین آلتیندان چیخارتدیم.
-بو دا منیم
اوشاقلارین گؤزو ایشیلداییب. آغیزلارینین سویو آخدی.
-غولام کله یئکه کله‌سین قاشییب دئدی: به به. بو گون هر نه تکمیلدیر. داها بیزیم کئفیمیز هااا اسکندری ده بئله اولماز.
حسن قارادا ماراقلا قاپ-قارا اللرین بیربیرینه سورترک دئدی:کریم آغا دوغرودان نوکرم قاقاش.
دئدیم:یاخشی اوشاقلار ایندی کئفدن قاباق علمی بیر آزماییش ائتمه‌لی‌ییک. بو هورومچک‌لری کی گؤرورسیز. بونلارا فارسجا نه دئیرلر؟
– ایکیسی سس- سسه: عنکبوت
-دیلچی‌لیک استادیم دئییر: ائتیمولوژی نظردن عنکبوت یانی «ان یئکه بود». یانی بیر حشره کی یئکه بودو اولا. بیز بو ذره‌بین‌له بو گون بو حشره‌نین آناتومیسین مطالعه ائدیب. بودونون یئکه‌لیغینا باخاجاغیق.
سونرا هر اوچوموز کت کاپشنی چیخاردیب آتدیق قوللاریمیزین آلتینا،اوزاندیق چمن لیگه. من هورومچکلرین بیرینی نایلون فریزردن چیخاردیب کبریت قوتوسو ایچینه قویدوم. سونرا ذره‌بینی اوستونه توتدوم. پهووووو. . . . دوز دئییرمیش استادیم، عجب یئکه بودو واریمیش. بئله بودونو یئییم هورومچک. غولام کلله‌یله حسن قارادا دورد گؤز باخیردیلار. گؤردوکلرینه اینانمیردیلار. بو حالدا گونون اشعه‌سی یازیغ هورومچگین نه تک بودون، اؤزونده کاباب ائله‌دی.
حسن قارا دئدی: جاااانمی مزه‌میزه هورومچک کابابی دا آرتدی.
چتین علمی آزمایشدن سونرا استراحت و کئف نوبه‌سی ایدی. چمندن دوروب ایلشدیک. چیپسلری آچیب تؤکدوک وسطه. خیارشورلاری دا جیب پیچاغیمیزلا دوغرادیق. کاباب اولموش هورومچک بودلاریندا قویدوق وسطه. ایندی زهرمارینین نوبه‌سی ایدی. حسن قارا جیبینده کی بالاجا ساغرلریمیزی چیخارتدی. من هر اوچ ساغری دولدوردوم.
استکانلاری بیربیرینه ووروب بیربیریمیزین ساغلیغینا دئییب لذتله باشا چکدیک. اوستوندن ده مزه‌لریمیزی یئدیک. یئرینیز بوش بتر یاپیشدی مخصوصا هورومچک بودلاری. طبیعی تویوغ بودوندان دادلی ایدی. سونرا سوستالیب خومارلاندیق. پسه- پوسه‌میز ائله آرادا کت کاپشنی باشیمیزین آلتینا آتیب چمن لیکده اوزاندیق.
بیرازدان حیس ائتدیم بیر آغیر کؤلگه باشیمیزین اوستونده دوروب.
-یاللاه قالخ آیاغا گؤروم بو اوروجلوق گونو بوردا نه غلط دارتیردیز؟
-غولام کلله سن اللاه مامور اداسی چیخارتما قوی زهرماریمیزین بیر خومارلیق دادین بیلک!
-دور آیاغا الان زهرماریزین دادین بیلدیرر سنه غولام!
– دده‌م وای دییه‌سن بو غولام دئییل. سسی چوخ بوردو غولامین‌کیندان. دده‌میزین ائوی ییخیلدی.
من اورتادا یاتمیشدیم. ایکی دیرسکیمله دوستلاریمی بویرون سؤکدوم دورالار.
اونلاردا چتینلیکله آییلدیلار. مامورلاری حیس ائتجک دوروب باشلادیلار چؤل اوزونو قاچماغا. مامور بئلیندن اسلحه‌سین چکیب چیغیردی:اااایسسسست.
یازیغلار دیک دایانیب اللرین باشلارینا قویدولار.
من دئدیم: آنلامامیشیق سرکار، غلط ائله‌میشیک. بیز یالنیز درسه باخیردیق؛ بیرآزدا گیلانار شربتی ایچمیشیک.
– آنانین خوروزو اؤلسون. آغزینین اییندن معلومدو گیلانار شربتی!!! گئده ک آگاهی‌ده معلوم اولار.
خیلاصه جرم آلت‌لریمیزی بوتون ییغیب بیز اوچوموزون ده اللریمیزی دستبندله‌ییب تپدیلر ماشینا. من بیلمه‌دیم بو مامورلار خییوو چایی‌نین او داش دیبی اوجقاریندا نقئیریردیلار. معلق اجل کیمین قوندولار یاغیریمیزا. بیر سئری ده چؤلده‌یدیک ایلدیریم قورخوسوندان گیردیک بیر داش دیبینه. آللاه ائوی تیکیلن اوردادا بیزی تاپیردی. دئدیم: ایلاهی آخی نه دن دای بو داش دیبینه کیبریت چکیرسن آخی؟! اؤلدوک قورخودان. بو مامورلاردا ائله اونا تای بیزی تاپدیلار.
یئتیشدیک کلانتری‌یه بیزی آپاردیلار افسرین یانینا دئدیلر: بونلار ملاءعامدا اوروجلارین یئییب‌لر و باشقا سوچلار.
اوندان سرباز بیر پرونده قویدو افسرین قاباغینا. بیرده آلات جُرمومیزی. چیپس قابیغلاری، شراب شوشه‌سی، هورومچک‌لر و. . . .
افسر پرونده‌نی آچدی: ۱-روزه خواری در ملا عام
۲-شرابخواری
۳-اقدام علیه امنیت ملی
آغزیمی آچدیم دییه‌م بو اوچونجو… امما افسر نگهبان نشانه بارماغین سوکوت علامتینه قویدو یوغون دوداغینا.
اوچ دوست بیربیریمیزه استفهام علامتینه سورغولو بره‌لمیش گؤزلرله باخدیق. آخی بیز هانسی امنیت ملی علیهینه اقدام ائله‌میشدیک!!!
بو حئینده قاریشیق ایکی اوچ قادین سسی گلدی. دده‌لریمیز صوبح چاغی ایشده اولدوغونا ننه‌لریمیزی چاغیرمیشدیلار. یازیغ اولدوم، یئنه دده‌م اولسایدی بلکه منی درک ائلردی.
آنالار گیردیلر ایچری. هامیسیندان قاباق منیم آنام: هه نه اولوب سرکار؟! بو ننه‌سیز یئنه منیم باشیما نه اویون آچیب؟! سونرا ال ائله‌دی باشماق تایینا. هله هوولوندن نایلون دمپایایلا گلمیشدی.
– گده توو. . . توو. . . سنین اوزونه. نه پوخ یئییبسن هن؟! ائله دمپایانی تپه‌مه اندیرنده اللریمی توتدوم باشیما. افسر ساکیتلیک دستورو وئردی. سونرا دئدی:
بو پرونده اساسدا سیزین گول بالالاریز اوروجلوق گونو گؤز قاباغیندا اوروج یئییبلر هله هیچ. مشروب دا ایچیب‌لر و هامیسیندان علاوه امنیت ملی علیهینه اقدام ائله‌ییبلر. آنام آجیغلی دئدی:
– او ایکی دنه‌نی بیلدیم سرکار. اوچونجونو بیرآز خیردالا! امنیت ملی ندیر؟!
– مثلن جاسوسلوق زاد؟
– نمنه جاسوسلوق؟! کیمه؟! نیه؟! بو هئچ گ. . . تونده‌ تومانین ساخلایا بیلیر جاسوسلوق دا ائده؟! نه مدرکیز وار؟! بو بو مملکتین حالدا سربازی‌دیر، مرخص لیگه گلیب.
افسر نگهبان غضبلی منه باخیب خودکاری گؤتوروب اوجا سسله یازدی: متهمین بیری سربازدیر دا.
ایشیم لاپ‌ زار اولدو.
ننه‌م تزه‌دن سوروشدو: سن آللاه سرکار جاسوسلوق نه دیر؟! واللاه بو کلله دبنک‌دیر سیاست دن زاددان باشی چیخماز.
– ننه بو هؤرومچکلرله بو ذره‌بین به نمنه‌دیر؟! نه کشف ائلیردیلر بونلا؟!
– واللاه صوبح منه دئدی بونلارین نمنه؟! هه آناتولی‌سینه باخاجاغیق. آزماییش ائده‌جه‌ییک.
افسر منه باخدی: دوز دئییر اوغلان؟
– بلی سرکار دوز دئییر. عنکبوت یانی «ان یئکه بود». دیلچی استادیم دئییب. بیز بونلارین بودونا باخیردیق ذره‌بین‌له.
افسر بوغ آلتی گولوب خودکارلا یازدی: بلی. . . بلی. مصرف روانگردان. بودا بیر جرم.
-غولام کلله دئدی: سن آللاه سرکار روانگردان نه دیر؟! تورک ائتیمولوژیسینه دانیشان استادیمیزین نظرینین تاییدینه هورومچگین بودونا باخدیق.
افسر نگهبان فیکیرلی گؤزون قیییب بیر بندده آرتیردی: پان تورک.
قالدیق بئله بیز آخشاماجا قالسایدیق بو پرونده یوز واراق اولاجاقدیر.
بو حالدا حسن قارا دئدی: نیشان بو نیشان او هؤرومچکلرین بودوندان کاباب ائله‌ییب یئدیک ده.
افسر گوله‌رک دئدی:هن دای. . . روانگردان یانی بو.
بیربیریمیزه ایشاره ائله‌دیک داها دینمییه‌ک، چونکو هر بیر سؤز دانیشیردیق علیهیمیزه اولوردو.
بو دؤنه یئنه ننه‌مین آغزی آچیلدی: ننه سیز قالاسان ائله فیلتیر سیک. . . نله اونترنت ده تلخیرام اوستا قولاما باخاندان نه اولاجاق به؟! زهریمار درسیندن ده قویدو. آی اونترنت چیخاردانین دده باباسینا لعنت. آی اونترنت چیخاردانین اؤلولرینین گورونا. . . ‌‌
دده وای ننه‌م اداره زاد بیلمیر، کامیلن عفت کلامین وئریب الدن. عاغلینا گله‌نی یامانا باسیر. هله سنگرده توتا بیلمه‌دیم قفیلدن بیر بامباچا اندیردی تپه‌مه.
آنامین سؤزلریندن افسری گولمک توتوب گوجوله هیبتین حفظ ائله‌مک اوچون الین آغزینا توتوب، اتلی صیفتی قیپ- قیرمیزی قیزارمیشدی.
او بیری ننه‌لر منیم آنام یاشلی و دلاور اولدوغونا بوتون نماینده‌لیگی منیم ننه‌مه وئریب تاماشا ائدیردیلر.
خیلاصه ننه‌لره مرخص اولماق فرمانی وئریلدی. ننه‌م آخیر لحظه‌ده یئنه منه جومدو: ساغیر قاییت ائوه سنینکین سنه وئره‌رم. دده‌ن هر گون گون آلتیندا بنالیق ائله‌ییر، تر توکور. بو سایاق زحمتیندن تشکور ائلیرسن؟! تاسوفلو باشیمی آشاغا سالدیم. اوزومدن اوتاندیم.
سرباز ننه‌لری اوتاقدان ائشیگه هدایت ائله‌دی. بیز ده بیر گئجه زینداندا قالدیق. شوکور اقدام علیه امنیت ملی و مصرف روانگردان‌دان تبرئه اولدوق. امما اوروج یئمک ملاء عامدا و شراب ایچمه‌گیمیزه حدّ اسلامی ایجراسیلا شیرین- شیرین شاللاق یئدیک. دادی هله ده داماغیمیزدان گئتمه‌ییب.