اصولن سانالین اؤزللیکله تلگرامین بیزه چوخ فایدالاری وار. تانیمادیغیمیز، بیلمه‌دیگیمیز آداملاری سانالدا تانییریق؛ ایلگی قوروروق؛ همفکرلیک ائلیریک؛ مشورت آپاریریق؛ دردلشیریک؛ آغلاییریق؛ گولوروک و..‌.و…و
یانی بو تلگرام چیخاردانین تانری یئددی نسیلدن دؤنمه جد و آبادینا کورور- کورور رحمت ائله سین. بیزلری بو تنهالیقدان قورتاریب. قول- قیچینی اوزالد، اوتور ائوینده، ائیییی یوزلر نفرله دانیش. سانکی همشه قوناقلیسان. اؤزوده نه گول قوناق…نه گول قوناق. چای ایسته‌مز؛ میوه ایسته‌مز. ائوینده لاپ تؤر-تؤکون اولسون. سیز دئیین بئله قوناقدان کیم اینجییر؟
بو تلگرامین برکتینه دیگر هیچ کس تنها نیست.
تلگرامدا بو ایشلردن علاوه بیر گؤزل طرح ده وار «کمپین»آدیندا.
بیرده گوشینی آچیرسان گؤرورسن بعععلیی، سنی اد ائله‌ییبلر بئش اون کمپینه. آی بالام منی کیم اد ائله‌دی؟ بو کمپینین موضوعسو نه؟
آی‌دی‌سینه باخیرسان: کمپین دفاع از حقوق معلمان- دفاع از معلمان زندانی- دفاع از آثار باستانی شهریمیز. هله بونلار یاخشیدیر:
– کند گرک آسفالت اولا!
– گامیش گرک چوخ دوغا!
-چوبانا قویون وئرین!
– اوشاغا اویون وئرین!
جاوانا تویون وئرین!
ائششه‌گین ایپین وئرین!
فهله‌یه گوپون وئرین!
-بو گون فلان گرگینلیکدن حمایت اوچون باشیمیزا بیر پارچ بوزلو سو تؤکه‌جه‌ییک!
– بوگون قاینار سودا چیمه‌جه‌ییک!
– بو گون اون دیقا سوکوت ائده‌جه‌ییک!
– بو گون باشیمیزی دووارا چیرپاجاغیق!
– بو گون دامدان آتیلاجاغیق!
-بو گون نمادین حالتده انتحار ائده‌جه‌ییک!
قادانیزی آلیم او قده‌ر کی دفاع ائله‌دیم بدنیمین دفاعیه‌سی قورتاردی آخی. ایندی کیم مندن دفاع ائله‌سین؟!
اوندان دا، او قده‌ر کی ایستی سویوق سویا سالدیز من یازیغی، ستلجم اولدوم. افروز شرخاطانین بیری‌دیرها!! یاخانیزدان ال چکمییه‌جک. دئیه‌جک من رویین‌تن‌ایدیم، بونلار منی بو گونه سالدیلار. اؤزونوز بیلرسیز، امما مندن ائشیتسه‌نیز اونو خبرسیز بو کمپین‌لره اد ائتمه‌یین.
بو چوروک گوشیم هنگ ائله‌ییر واللاهی!!!