قارا باسدی رؤیالاریمیزی… «مهسا عبدالعلی‌زاده»نین عزیز خاطیره‌سینه
ایلقار مؤذن‌زاده
نئچه آی ایدی هر گون خبرین ایزله‌ییب دوعا ائدیردیک کی، کُمادان آییلیب بیر داها حیاتا قاییداجاق. نه نذیرلر و نه دوعالار کی اوره‌ییمیزدن کئچمه‌دی. اومودلاریمیز اوگون داها آرتیق جانلاندی کی، ائوه گلدی. هر گون سوراقلاشدیق و یاخجیلاشیر دئدیلر. ساغالماسی بیزه بایراملیق اولاجاقدی. بیر ائل شنلییی و گؤزلر گوله‌جکدی. اولمادی. آییلمادی. اوچ آی چکدی یوخوسو و یوخودا گؤردویو آجی دونیامیزدان قاییتماماغی اوستون بیلدی بلکه‌ده. ایکی رول پایلاشیلدی آرامیزدا، بیز یوخو اولدوق اونا و او بیزی یاتدی، بیزیم دردیمیزی یوخو گؤردو. چوخ سسله‌دیک بالیشینین اوستونده، آمما اوچ آی چکدی.
کابوس اولدو گونلریمیز، قارا باسدی رؤیالاریمیزی و بیر سَتَلجم درد اولدو یوخلوغو. هر گون خاطیره‌دن سوروشدوق ساغالماسین. -گؤزلرین ده‌بردیر، دئدی؛ باشین چئویریر سسه طرف. آمما آییلمادی کابوسدان هر آنی بیر خاطیره اولان مهسا.
نئچه شعری یازیلیب، نئچه اؤیکوسو سؤیله‌نه‌جکدی مهسانین؟ یازمادی‌دا، دئمه‌دی. اولمادی‌دا. سوسدو. بایراملیق اولمادی ساغالماسی‌نین شنلییی. بیر غم اولدو، چیلندی اوره‌ییمیزه بایراملیق، حسرت اولوب گؤزوموزدن آخدی و خبرین ائشیتدیییمز لحظه، درد اولوب آلنیمیزا سیچرادی. بوندان سونرا آچیلمامیش بیر چیچه‌یین حسرتی‌دیر کی، اوره‌ییمیزین یئددی‌سین سوفره‌سینده ایستیکان ایچینده قالاجاق. یادی و آنیلاری‌دیر، شعرلری و ناغیللاری‌دیر، حسرتی‌دیر، خاطیره‌سی‌دیر کی قالاجاق…
۷ فروردین ۱۳۹۸
