چرشنبه‌دی آتیل ماتیل جان گلیر
رامین جهانگیرزاده
اودون ییغیب، قالایاریق یاندیرریق
قانادلانار قوشلار تکین اوچار اود.
گلیب گئدن سویوق یئله قاندیرریق
آی نه گؤزل بختیمیزی آچار اود.
دالبادالا دایاناریق دوزوللوک
قاتار قاتار دوزوله‌ریک، سوزوللوک
آتیلاریق اود اوستوندن اوزوللوک
قانادلانار قوشلار تکین اوچار اود،
آی نه گؤزل بختیمیزی آچار اود.
بختیمیزدن کدر آلار غم آلار
ایستی‌لییی ایچیمیزه تئز دولار
یامان گونون عؤمرو کئچر آزالار
قانادلانار قوشلار تکین اوچار اود،
آی نه گؤزل بختیمیزی آچار اود.
اوزوموزه گلن ایله گل دئیر
قاپیمیزی باهار گلیب تاق دؤیر
بوز آدامی آجیغیندان هئی سؤیر
قانادلانار قوشلار تکین اوچار اود،
آی نه گؤزل بختیمیزی آچار اود.
چرشنبه‌دی آتیل ماتیل جان گلر
آغاجلارین دامارینا قان گلر
بختیمیزی دئیه‌سن آچان گلر
قانادلانار قوشلار تکین اوچار اود،
آی نه گؤزل بختیمیزی آچار اود.
