بیر ایل «آذفمینا» سایتینین ایشه باشلاماسیندان کئچدی…
سایت آذفمینا
اینترسکشنالیتی، زوراکیلیق، قانون، قادین ادبیاتی و قادین مرکزلی بیر چوخ فرقیلی مقاله و نوتلار ایله بو بیر ایلی باشا چاتدیران، «آذفمینا»، تقاطع (اینترسکشنالیتی) تئوریسینی اساس توتاراق، آذربایجان قادینلارینین پرابلئملری اوستونلوگو ایله قادینلارین وضعیتلرینی احساسدان اوزاق، علم و دوشونجه‌یه دایاناراق قاباغا آپارماق ایله آذربایجان قادینلارینین وضعیتیندن دوزگون بیر باخیش اورتایا قویماغا چالیشدی.
ایندی ایسه «آذفمینا»، دونیا قادین گونونه حاضیرلادیغی ایلک اؤزل ساییسینی ایللر بویو قادینلارین قارشیلاشدیغی چتینلیکلری مهارتله آذربایجان ادبیاتینا داخیل ائدن، تانینمیش آذربایجانلی یازار، شاعیر و مترجیم «رقیه کبیری»یه حصر ائتدی.
بو اؤزل سایی‌یا گؤندریلین بیر چوخ یازینین ایچیندن، رئداکته هئیتینین تایدینی قازانانلار نشر ائدیلدی. بو یولدا یانیمیزدا و آرخامیزدا اولان دوستلار و اوستادلاریمیز و فایدالی تنقیدلری ایله داها ثمرلی چالیشمالارایمیزا یول آچان عزیزلریمیزه مینتدارلیغیمیزی بیلدیررک، هله قارشیمیزدا اولان بیر چوخ ایل و بیر اوزون یول وار دئییب یولوموزا داوام ائدجییک…
بو اؤزل سایی‌دا فرقیلی ساحه‌لرده چالیشان مدنی آکتیویستلر، یازیچی حاقدا فیکیرلرینی بیلدیریب ادبی، فرهنگی، ایجتیماعی، سیاسی و حقوقی آچیدان اونون اثرلرینه توخونوبلار.
تانیتیم‌دان سونرا، تانینمیش ادبیاتچی «ائلدار موغانلی» جنابلارینین دولغون یازیسی ایله باشلانان بو اؤزل سایی دا «رقیه کبیری»نین باکی‌دا «قانون» نشریاتی طرفیندن چاپ اولان «ائویم» آدلی اثرینین رئداکتورو «آینور زرینتاج» بو اثر حاقدا تآثوراتیندان یازیب. تانینمیش آکتیویست «سعید متین‌پور» رقیه کبیری‌نین «قوشلار داها قورخمورلار» اثری حاقدا «یازیلمیش قورخولار» عنوانیندا بو اثر حاقدا باخیشلارینی اورتایا قویوب.
قادین و ادبیات موضوعلو موصاحیبه‌ده «رقیه کبیری» آذفمینا سایتینین سوال‌لارینا جواب وئرندن سونرا، نوبتی یازیدا قادین ساحه‌سینین آکتیویستی «سودابه تقی‌زاده زنوز» یازیچی‌نین سون زامانلاردا نشر اولونموش «مر آغاجی‌نین کهربا گؤزلری» آدلی رمانی‌نا توخونوب. «شیوا بازرگان» بین‌الخالق حقوق بؤلومونده حقوقی و اینترسکشنالیتی اساسیندا یازیلمیش یازیسیندا یازیچی‌نین اثرلرینی بو تئوری‌یه دایاناراق آنالیز ائتمه‌یه چالیشیب. «لیلا قربانی» تانینمیش فیلمنامه‌نویس همین اؤزل سایی‌دا قیسا بیر بؤلوملری نشر اولونان «ائندیم بولاق باشینا» چاپ سیراسیندا اولان کیتابی حاقدا چکیلن فیلمنامه حاقدا یازیب. «محمدرضا مقدسی» تانینمیش شاعیر، یازیچی حاقدا یازان فیکیرلریندن سونرا یازیچی‌نین بیرینجی مقامی قازانان »ماوایل» آدلی حئکایه‌سینین فارسجا ترجمه‌سی اوخوجولارا تقدیم اولونوب. تانینمیش فعال و سانال دونیاسی‌نین متخصیصی «علیرضا فرشی»، «رقیه کبیری حاقدا سانال دونیادا نلر کئچیر؟!» آدلی یازیسیندا یازیچی‌نین وضعیتینی همین آچیدان آراشدیرماغا چالیشیب.
اوخوجولارا چاپ سیراسیندا اولان «آجلیق باراتاسی» و «ائندیم بولاق باشینا» اثرلریندن قیسا بیر بؤلوم ایتحاف ائدندن سونرا سون سؤزو یئنه تانینمیش آذربایجانلی یازیچی و شاعیر «رقیه کبیری» یه بوراخمیشیق. یازیچی «۸ مارس و سوالات بی‌شمار» آدلی یازیسی ایله «آذفمینا» سایتینین ۸ مارسا اؤزل حاضیرلایان اؤل سایی‌سینا سون قویوب.
