آغلاما آنا، آغلاما!
هاشم ترلان
دؤزومون اولسون آنا
گؤزونده‌کى سونسوز کدر،
اؤزومون اولسون آنا.
باخیب طبیعتین بویونا
نه دئییم اونا؟
دئسم نـورسوز بیر عالمسن
گۆنشین آجیغى توتار،
دئسم تورپاق نه ظالیمسن
یئرین برکتى قاچار
نه دئییم آنا.
بابکین فاجعهسینه دؤزدون،
چالدیران واقعهسینه دؤزدون،
خاقانلارین قلینجینا دؤزدون
یئنه دؤزومون اولسون آنا.
سئوینجیم سنین
کدرین اؤزومون اولسون آنا.
دؤزومه عزمین اولسا،
یارالارین یوز مین اولسا
“کۆرهیینده کل گیزلنن “
“اۆرهیینده ول گیزلنن “
ایگید ائولادینین
مرحم ایله ساغالار آنا.
اولو قارداشین تبریز،
بالا قارداشین زنجان،
آنامیز آذربایجان،
قوللارینى آچا-آچا
اورهکلرى پارچا- پارچا،
دیزینه باش قویوبلار آنا.
آمما!
ساغالمایان مین یاران وار،
بو نه یوروش، نه هــوجومدو؟
اللى بئش مین قیزیل باشلار
اوردوسوندان گؤزون یـومدو.
آغلاما قاراداغ، آغلاما،
دؤزومون اولسون آنا.
سئوینجیم سنین،
کدرین اؤزومون اولسون آنا.
