ایکی شعر
ناصر شهبازی(عاشیق اوغلو)
۱) اورمو گؤلو
اورمو گؤلوم قانا دؤنوب،
قان آغلاییر ائلیم منیم!
دونیا هله یوخودادیر
باغلانیبدیر اَلیم منیم!
رنگی دؤندو بنزیر قانا
باعث‌لر گؤروب اوتانا؛
ائل‌لر داها گلیب جانا،
سوسوز قالیب گؤلوم منیم!
حاقی دئینلر اوغولور،
هارای سالانلار بوغولور،
ائلیم ائل‌لیکدن داغیلیر،
داها یوخدو یولوم منیم!
«عاشیق اوغلو» اوزوم قارا،
بیر گول‌ایدیم دؤندوم خارا،
اومود قالیب بیر ایلقارا
یامان اولوب حالیم منیم!
۲) وطن
ایگیدلر مکانی، غیرت یوردوسان
ائلیمین وارلیغی، جانی‌سان وطن!
دونیا جنت اولسا سنه تای اولماز
سن اؤزون جنتین شانی‌سان وطن!
سنین ساغلیغینا دوغرانارام من،
آزاد اولماغینا هئی یانارام من،
ائل‌لریم گولمه‌سه اوتانارام من
کور اولوم گؤرمه‌ییم یانیسان وطن!
وطن خایینینی یولداش بیلمه‌رم،
اؤزون ساتانلاری دیلداش بیلمه‌رم،
اؤز کؤکون آتانی قارداش بیلمه‌رم،
منیم وارلیغیمین جانی‌سان وطن!
غفلت یوخوسوندا یاتمامیشام من،
حاقی باطیل‌لره ساتمامیشام من،
تورکم اؤز کؤکومو آتمامیشام من،
غیرتین داماری، قانی‌سان وطن!
سنسیز قالمایاجاق بدنده جانیم،
گووننم یولوندا تؤکولسه قانیم،
مقدس توپراغسان، شهرتیم، شانیم
سن منه شرافت کانی‌سان وطن!
یک پاسخ
ساق أئول چوخ گوزل گویچکیدیر