داش آتمایاق گؤیرچینه
ح. هریزلی
آغ له‌لک قانا بله‌شر
داش آتمایاق گؤیرچینه!
آرزیلارى اودا دوشر
داش آتمایاق گؤیرچینه!
گؤیدن یئره یاغار قارقیش
کوسر بولوت یاغماز یاغیش
قالار قارا تامارزى قیش
داش آتمایاق گؤیرچینه!
چؤکمز داها داغا دومان
توستویه بورونر زامان
چاى-چشمه‌لر قوخویار قان
داش آتمایاق گؤیرچینه!
طبیعتدن انسان کوسر
انسانلاردان وجدان کوسر
تانرى دا انساندان کوسر
داش آتمایاق گؤیرچینه!
سوتون یئرینه کؤرپه‌لر-
موشک‌لردن آتوم امه‌ر
بیز انسان دئییلیک مگر؟
داش آتمایاق گؤیرچینه!
بیر داش بند اولماز داش اوسته
بیر بؤرک قالماز بیر باش اوسته
قودوز سئون ساواش اوسته
داش آتمایاق گؤیرچینه!
من سنه سن منه دوشمن
صلح اولماسا نه سن نه من
انصاف اولسون حؤکوم سورن
داش آتمایاق گؤیرچینه!
هریس۱۳۹۶/۰۷/۲۳
