داشینیرام بو گئجه گؤزلریندن
بولود مرادی

داشینیرام بو گئجه گؤزلریندن
بوش‌دور پنجره
ماوی‌لیینی اؤده‌یه بیلمم آی باشیندا سئوگیلیم!
حوزون‌لریمه یئری یوخ
و قورخولاریما
داراشلیق‌دیر
بو کؤرپه سؤزجویون اوره‌یی توتولور آخی!
آچیق بیر حیات‌دا اویناماق ایسته‌ییر قاداسی!
باشی سویوق گَلین‌جیک‌لرله
یویورام یویورام گونَش‌لرینی پارلامیر

قارانلیق اوتوروب بالکون‌دا پیپ چکیر
فیت چالیر

داشینیرام
قونشولارلا یولا گئتمه‌ییر کؤپه‌ییم
آینادا چیلپاق گزیر خیال‌
و قادین
خاطیره‌لر دَفترینده قورویور
کپنَک کیمی
اوچور
اوچور بو تؤر توکونتو شعری یوم گؤزلرینی!