بوغولان ال‌لر
مسعود آذر
بوغولان ال‌لرین ائشیر تورپاغی
بیر چیمدیک هاوا سوراغیندا؛
گؤرن … هاوا دا یاساقدیرمی؟!
یوخسا آجیخمیش سو قیراغیندا
قورویان آغاج‌لار!!
نه بیلیم،
بلکه ده امیزدیریر یانیق تورپاغی
مشروطه ده سپیلن توخوم‌لار!…
سنینله‌یم هئی
گؤزلرینه آغیر یوخو جالانمیشیم!؛
سئوگی قوجاغی دویمامیشیم!؛
سؤیله گؤروم
هانسی اینجه بئلین قوجاغی یاتاغین اولموش؟!
هانسی رؤیالارین شیرینلیگی گؤزلرینه دولموش؟!
اویان!
اویان بیر آز دردله‌شک!
بورا باخ…!
ایچیمده نیلوفرلر دارتینیر؛
قابیرقالاریما سارینیب چؤله اوزانیر؛
سنینله‌یم هئی
چوخدان اوغورلانمیشیم!؟
او قیز منه اینانماسادا
من اونا دؤنه -دؤنه سؤیله‌دیم:
بیزیم شه‌هرین قوجالاری یامان اوغرودولار!…
بو گون کلله‌قند گتیرمیش قونشوموز
بیلمیرم آتامین یاسلاماسی‌دیر،
یوخسا قارداشیمین!؟…
۶ شهریور ۹۶
