شاعر «تانیش افسر» ابدی‌لیک سوسدو!
آذربایجان ادبی- مدنی درنک‌لرینین باش ساغلیغی…
چوخ تاسفله، بوگونلرده آغیرلاما مراسیمینی گؤزله‌دیگیمیزقاراداغ ماحالی‌نین تانینمیش شاعری بیت‌الله افسری (تانیش افسر) ابدی‌لیک سوسدو. «صابر ادبی انجومنی» و «دده قوربانی اوجاغی»نین بو دیرلی عضووندن اوچ شعر مجموعه‌سی آذربایجان ادبی ارثینه آرتیریلمیشدیر. دیرلی شاعرین اؤلوم خبری بوتون دوستلارینی و ادبی جمعیتیمیزده اونو تانییان انسانلاری کدرلندیردی.
«ایشیق» – آذربایجان ادبیات و اینجه‌صنعت سایتی امکداشلاری‌دا ادبی جمعیتیمیزله برابر بو آجی نیسگیلی مرحوم شاعریمیزین حؤرمتلی عائله‌سینه و قلمداشلارینا باش ساغلیغی وئریر.
«ایشیق» – آذربایجان ادبیات و اینجه‌صنعت سایتی
۳۰/۰۴/۱۳۹۶
بو موناسیبتله آذربایجان ادبی- مدنی درنک‌لرینین باش ساغلیغینی عزیز اوخوجولارا، «تانیش افسر»ین حؤرمتلی عائیله‌سینه و آذربایجان ادبی حمعیتینه چاتدیریریق:
«صابر ادبی انجومنی»
آذربایجان باشین ساغ اولسون!
قاراداغین، دویغولو شاعری و «صابیر انجومنی»نین دیرلی عوضوو، بیت‌الله افسری(تانیش افسری) آغیر خسته‌لیک اوجوندان، حیاتلا ویدالاشدی.
«تانیش»دان اوچ شعر کیتابی گون اوزو گؤرموشدو. یازیقلار اولسون کی، «دده قوربانی اوجاغی»نین، اونون سون کیتابینا تانیتیم تؤره‌نی ده اوره‌ییمیزده بیر نیسگیل کیمی قالدی. بئله‌لیکله تانیش یولداشیمیزی اونودمایاجاغیق دئیه، آذربایجانا، قاراداغا و اؤزللیکله اونون سایین عائیله‌سینه باش ساغلیغی وئریریک.
«آذری مجله‌سی»
آذری مجله‌سی امکداشلاری آدیندان شاعر دوستوموز بیت‌الله تانیشین دونیادان کؤچمه‌سینی مرحومون عائله‌سینه، «دده قوربانی انجمنی»نین دیرلی عضولرینه، «صابر ادبی انجمنی»نه، آذربایجان دیلی و ادبیاتی اوغروندا چالیشانلارا باش ساغلیغی وئریریک. روحو شاد اولسون.
«یاشماق»
تانیش افسر (بیت‌الله افسری) قاراداغلی شاعر دوستوموز دونیاسینی باغیشلادی. تانری‌دان گؤزل شاعریمیزه باغیش، عائیله‌سی و دوستلارینا دؤزوم آرزولاییریق. مزاری نورلا دولسون. قاراداغ باشین ساغ اولسون!
«ادبیات سئونلر گروهو»
ائشیدیگیمیز خبرلره گؤره قاراداغ ماحالی‌نین ایستکلی شاعری، آدی قالارغی تانیش افسر(بیت‌الله افسری) آغیر خرچنگ خسته‌لیگیندن سونرا حیاتین ده‌ییشدی. بو آجی آیریلیق ادبیات عائیله‌سین اوره‌کدن سارسیتدی. «ادبیات سئونلر گروهو» بو ایتگینی شاعرین عائیله‌سینه، قلمداشلارینا و بوتون سئونلرینه باش ساغلیغی وئریر.
