گولوشون آلما!
رحیم کاویان
سنین گولوشونله باشلانیر حیات
هرزادی آل مندن، گولوشون آلما!
سن گولنده گولور بوتون کاینات
هرزادی آل مندن، گولوشون آلما!
گول دونیالار گولسون اوزومه منیم،
گول قوی گوزللنسین شعریم، غزلیم!
یازیب یاراتماغا من هوسلنیم،
هرزادی آل مندن گولوشون آلما!
سنین گولوشوندور منی یاشادان،
داها نه ایستیرم من بو دونیادان؟!
باشینا دولاننام، آلارام قادان،
هرزادی آل مندن گولوشونآلما!
بولانلیق بولاغام گول من دورولوم،
گول بیر دنیز اولوم عشقیلن دولوم،
گول یئنی دن بیرده سنه وورولوم،
هرزادی آل مندن گولوشون آلما!
گولسوز، چیچک‌سیز ده یاشاماق اولار،
آرزی دیلک‌سیز ده یاشاماق اولار،
گاهدان اوره‌ک‌سیز ده یاشاماق اولار،
هرزادی آل مندن گولوشون آلما!
شاعیرم اوره‌ییم دردیلن دولو،
یولوم سئوگی یولو، محبت یولو،
گولمه‌سن آرزیمین گوللری سولو،
هرزادی آل مندن گولوشون آلما!
ساریلار منیمکی، یاشیللار سنین،
قاراقیش منیمکی، شأن باهار سنین،
هاردا محبت وار، سئوگی وار سنین،
هرزادی آل مندن گولوشون آلما!
