آذربایجان قادین شعری آخشامی: شکیللی گزارش
اوزون ایللردن بری تهراندا ادبی- مدنی فعالیت گؤسترن صابر ادبی انجومنی‌نین تشبثی‌ایله تیر آیی‌نین ۲۹یندا تهران شهرینده کئچیریلن “آذربایجان قادین شعری آخشامی” چوخ طنطنه‌لی و گئنیش استقبال‌لا کئچیریلدی. اؤلمز شاعره‌میز مدینه خانیم گولگونون آدی‌ایله باغلی بو شعر آخشامی، “یورا بیلمز یوللار منی” باشلیغی آلتیندا، چوخ گؤزل سسلندی.
آذربایجانین مختلف شهرلرینده یازیب یارادان گؤیرچین نغمه‌لی شاعره‌لریمیز، اؤز اثرلریندن اوخودولار و مختلف ادبی فیکیر مبادله‌لری آپاردیلار. بو صمیمی گؤروشلرده صنعتکارلاریمیز مجلیسین گئدیشاتیندان راضی قالدیقلارینی سؤیله‌دیلر.
آپاریجی‌لار “کریم قربانزاده” جنابلاری و تبریزدن مجلیسه قاتیلمیش گنج شاعریمیز “اولکر داغ‌قیزی”اؤز صمیمی سؤزلریله مجلیس حاقیندا اشتراکچیلارا لازیمی معلومات وئردیلر. مجلیسین ایلک باشلانیشی سئویملی مبارز شاعریمیز مدینه خانیم گولگونون خاطره‌سینی عزیز ساخلاماق مقصدیله آشاغیداکی مصراعلارلا باشلاندی:
نغمه دولو بیر اوره یم
گاه جوشغونام، گاه کؤوره یم
بیر اومودلو گله جه یم
یورا بیلمز یوللار منی.
ائل آرخامدیر دار آیاقدا
بیر معنا وار یاشاماقدا
دوغولدوغوم بو تورپاقدا
یورا بیلمز یوللار منی.
گاه دؤنه رم سؤنمز اودا
آرزوم دنیز، من بیر آدا
آند ایچه رم بو حیاتا:
یورا بیلمز یوللار منی.
سونرا ، صابر ادبی انجومنی‌نین صدری و ۱۳۲۴-۲۵ینجی ایللر “شاعرلر مجلیسی”ندن یادگار قالان “مظفر درفشی”، انجومنین ۲۰ ایللیک فعالیتیندن دانیشیب و مجلیسی رسمن آچیق اعلان ائتدی.
مجلیسین ایکینجی دانیشانی تانینمیش تورکولوق “حسین صدیق” جنابلاری اولدو. او آذربایجان قادین شعری باره‌ده مختصر دانیشیب، بو ایشین تقدیره لایق اولدوغونو وورغولایاندان سونرا، واختین دارلیغیندان حاضیرلادیغی مقاله‌نین اوخوماغیندان انصرافینی بیلدیردی.
مجلیسین موسیقی حصه‌سی “عاشیق ماشاللا ایمانی”نین (عاشیق حسین جوانین باجیسی اوغلو) چوخ گؤزل ایفاسیله باشلاندی. عاشیق ماشاللا، عاشیق حسین جوانین شعرلرینی سازدا دینلندیرمکله، مجلیس اشتراکچیلارینین گور آلقیشلارینی و منتدارلیق حیسلرینی قازاندی.
شعر آخشامینی سون زامانلار آزادلیق درنه‌یی طرفیندن باکیدا کئچیریلن شعر و حکایه مسابقه‌سینده اؤز “ماوایل” حکایه‌سیله بیرینجی یئری قازانان و بو شعر آخشامینین تدارکی و ترتیبینده چوخ جدی فعالیت گؤسترن “رقیه کبیری” آچدی.
رقیه خانیم کبیری ۱۳۴۱ ینجی ایلده گونه باخانلار شهری خوی‌دا حیاتا گؤز آچیب، تبریز یونیورسیته سینین، علوم آزمایشگاهی فاکولته سینده تحصیل آلیبدیر. اونون یارادیجی قلمی ایله اوچ عنوان کیتابی آذربایجان دیلینده ایشیق اوزو گؤروبدور. «تبریزیم آل تبیمی» و «بیر اوجاقدا ایکی کول توپاسی» شعر توپلوسو اولاراق و «اوره ییم آغرییر» حیکایه توپلوسو. بوندان علاوه فارس دیلینده‌ده اوچ کیتابی نشر ائدیلیبدیر. «انگار با تو نیستم»، « پرنده روی سیم» و « دنبال چشمانت می گردم».
رقیه خانیم کبیری بو شعر آخشامیندا اؤز “دیکتاتور اولموشام” عنوانلی شعرینی اوخودو و صمیمیتله مجلیس اشتراکچیلاری طرفیندن قارشیلاندی.
عالی تحصیللی شاعر “اولکر اوجقار” مجلیسین ایکینجی شعر اوخویانی اولدو. مجلیس آپاریجیسی اولکر اوجقاری شاعر ملیحه عزیز پورون “آچیلسا کؤنلومون کور دویونلری/ بیر کؤینک توخویاجام وطن اینینه… مصراعسیلا تریبون آرخاسینا دعوت ائتدی:
اولکر اوجقار آنا تبریزین قوینوندا ۱۳۶۳ینجی ایلده دوغولوب، ایندی‌ایسه فرانسیز ادبیاتی‌نین دوکتورا سطحینده، بهشتی یونیورسیته سینده تحصیل آلماغا مشغولدور. «ساچلاری تبریزه ساری هؤرولن» و «بالیقچی اللرینه دوغرو» عنوانلی شعر توپلوسو ۱۳۹۰دا باکی شهرینده ایشیق اوزو گؤروبدور. «چیلیس» آدیندا مولیئرین آدلیم اثریندن چئویردیگی پیئس ایسه تبریزین تئاتر ائوینده چوخ اوغورلا صحنه‌یه آلینیبدیر. اولکر اوجقارین بو مجلیسده‌ده اوخودوغو شعری چوخ اوغورلا قارشیلاندی.
مدرن اوسلوبلو شاعر “تورکان اورمولو” آنکارا شهریندن مجلیسین قوناغی اولموشدور. تورکان اورمولو بو مجلیسده‌ده مدرن اوسلوبدا یازدیغی شعرلرینین بیرینی اوخودو و گور آلقیشلار قازاندی.
تورکان اورمولو ۱۳۶۴ینجی ایلده اورمودا حیاتا گؤز آچیب، ایندی ایسه آنکارا یونیورسیته سینده قادین حاقلاری اوزره دوکتورا سطحینده تحصیل آلیر. «گؤردوم» عنوانلی شعر توپلوسو ۱۳۸۴ ده اورمو شهرینده و «اؤزگه توز» آدلی شعر کیتابی ۱۳۹۰ینجی ایلده باکی شهرینده یایینا بوراخیلیبدیر.
چوخ طنطنه‌ایله کئچیریلن بو مجلیسده قادین ژورنالیست‌لرینینده اؤز اشتراک پایی اولموشدور. سارسیلماز بیر اراده‌ایله بو گونه قده‌ر ۳۵ سایی‌یا کیمی اردبیل شهرینده “سارای” درگیسینی اداره و یاییملاندیران ژورنالیست شاعر “مژگان صیامی”، بو مجلیسین ان چوخ آلقیشلانان شاعرلریندن اولدو. او اؤز تنقیدی شعری‌ایله مجلیس اشتراکچیلارینی آلقیش اوچون ایاغا قالدیردی.
مژگان صیامی ۱۳۵۳ینجی ایلده ساوالانین اته‌یینده دونیایا گوز آچیبدیر. آذربایجانجا شعر توپلوسو “یاشامادیم قوسدوم” و فارسجا حیکایه‌لری “مردان روسپی” و “قربانیان بند نسوان” عنوانلارینی داشییر.
آنا تبریزدن مجلیسه قاتیلان شاعر “اولدوز صادق” ، اؤز شعری‌ایله تبریز عطرینی تهراندا یاشایان آذربایجانلیلارا بخش ائتدی.
اولدوز صادق ۱۳۵۸ ینجی ایلده تبریزده حیاتا گؤز آچیبدیر. ایندی‌ایسه بیر تدقیقاتچی کیمی متخصص‌دیر و گؤزل شعرلر موللیفی کیمی دؤرو مطبوعاتدا چیخیش ائدیر. باخمایاراق کی هله اثرلری کیتاب شکلینده ایشیق اوزو گؤرمه‌ییب، آنجاق آنا دیللی مطبوعاتدا اؤز اوخوجولاریلا سئچیلیر.
صابر ادبی انجومنی‌نین عضوو “مهنازصابونی” اؤز ایکی شعری‌ایله هم کلاسیک و هم مدرن شعر اوسلوبونو اؤز دینله‌ییجی‌لری قارشیسیندا نمایشه قویدو. مهناز خانیمین اوخودوغو غزل و سریست شعرلری گئنیش اشتراکچی آلقیشینی قازاندی.
مهناز خانیم صابونی ۱۳۵۳ینجی ایلده شبسترده دوغولوبدور. یازدیغی شعرلرینده داها آرتیق کلاسیک شعر ژانرینی یئنی اوسلوبدا تقدیم ائتمگه چالیشیر و اثرلری دؤرو مطبوعاتدا چاپ اولونور. ایندیلیکده کامپیوتر متخصصی‌دیر.
غزل‌لر شاعری آدلانماغا داهادا مئیل گؤسترن شاعر “آرزو مختاری” بیناب شهریندن مجلیسین قوناغی اولموشدور. شعر توپلوسونا «قرنفیل اوچ گول آچار» عنوانینی سئچن آرزو خانیم، «سنسیزلیکدن گله‌جه‌یم فریادا» عنوانلی یئنی کیتابینی نشره حاضیرلاییر.
آرزو مختاری ۱۳۶۴ینجی ایلده بیناب شهرینده دوغولوبدور. ایندی‌ایسه مدیریت زمینینده یوکسک لیسانس صاحبی‌‌دیر.
خزر تخلصو ایله ادبی جمعیتیمیزده تانینان “شیدا نونهال” ماراغادان مجلیسه قاتیلمیشدیر. کلاسیک ژانریندا یازان شیدا خانیمین شعر کیتابی «هر نه‌دن یازیرام، سندن دانیشیر» عنوانینی داشییر. شیدانین بو مجلیسده‌کی اوخودوغو شعر، اشتراکچیلارین گور آلقیشلاریلا قارشیلاندی.
شیدا خانیم نونهال ۱۳۵۶ینجی ایلده ماراغا شهرینده دونیایا گؤز آچیبدیر و ایندی‌ایسه حقوق قولوندا اؤیرنجی‌دیر.
آنا تبریزدن دیگر بیر شاعرده مجلیس قوناغی اولموشدور. “شکرانه عالم” تبریزین کیچیک شعرلر موللیفی کیمی تانینان شاعرلریندندیر. «بیر سویوم تانرییا چکیب» عنوانلی کیتابی هایکو شعرلرینین توپلوسودو. او داها آرتیق کیچیک شعرلر موللیفی کیمی تانینسادا، سربست، قوشما و باشقا شعر فورمالارینادا تئز- تئز مراجعت ائدیر. بو فورمالاردا یازدیغی شعرلر توپلوسونو «سوسورام ایچیمی یاغیش آپارسین» آدلاندیریبدیر.
شکرانه عالم ۱۳۵۷ینجی ایلده تبریزده دونیایا گؤز آچیبدیر و ایندیده بو شهرده یاشاییر.
زتجانین تانینمیش قادین شاعری “لیلا کحالی” بو شعر آخشامینا گئج قاتیلسادا، بؤیوک هیجان و ماراقلا شعرینی اشتراکچیلارلا پایلاشدی. مجلیس آپاریجیسی اونو “حؤکومه خانیم بیلوری” نین شعری‌ایله تریبون آرخاسینا دعوت ائتدی. لیلا خانیم کحالی شعرلرینده فلسفی آنلام و دوشونجه‌لر داهادا اؤزونو گؤستریر و بو بلکه‌ده اونون فلسفه‌اوزره آلدیغی تحصیلیندن آسیلیدیر. «من سنی هئچ سئومه دیم» آدلی ابراهیم صدری نین سئچیلمیش شعرلریندن کؤچوردویو اثر پینار نشریاتی طرفیندن یاییلیبدیر. « قولئیبانی» آدلی اوشاق کیتابی ایسه شعر قالیبینده یاییملانان اثرلریندندی. ایندیلیک تورکیه‌نین ییرمینجی یوز ایللیک شاعرلرینین آنتولوژیسینی چاپا حاضیرلاییر . اؤز شعرلری ایسه دؤرو مطبوعاتدا و اینترنت سایتلاریندا ئتز- تئز یاییلیر.
لیلا خانیم کحالی ۱۳۵۶ینجی ایلده زنجان شهرینده دوغولوبدور. فلسفه اوزره عالی تحصیللی‌دیر و رساملیق‌لادا مشغول اولور.
تانینمیش پینار نشریاتی‌نین مدیری شاعر “شریفه جعفری” تهراندا یاشاماغینا رغما یئنه‌ده اؤزونو میانا شاعری کیمی آپاریر. یورولماق بیلمه‌ین ناشر شاعر ایندییه‌دک اون‌لارجا آذربایجان دیلینده کیتابلاری نشر ائدیبدیر. اونلاردان علاوه اؤزوده رامیز روشن, احمد عارف, حسین باقر اوغلو کیمین شاعرلرین اثرلرینی کؤچوروب و چاپا حاضیرلاییبدیر. “من آتامین قیزییام” و “گیزلی محبتیم” عنوانلی شعر توپلولارینین موللیفی‌دیر. مجلیسده اوخودوغو شعری‌ایله بوتون اشتراکچیلاری آلقیش اوچون آیاغا قالدیردی. او بو شعری قیزینا خطابا یازمیشدیر.
شریفه خانیم جعفری ۱۳۵۶ینجی ایلده میانا شهرینده دوغولوبدور و فارس دیلی و ادبیاتی اوزره‌ده متخصص‌دیر.
سربست شعر فورماسیندا اثرلر موللیفی کیمی دؤرو مطبوعاتدا چیخیش ائدن گنج شاعر “ساناز موحد”ده اؤز شعرلریندن مجلیس اشتراکچیلارینا اوخودو و آلقیشلار قازاندی. نبی خزری‌نین سئچیلمیش شعرلرینی «ایللر و ساحیللر» عنوانیله چاپا حاضیرلایان ساناز موحد، ۱۳۷۰ینجی ایلده آنا تبریزده دوغولوبدور و ایندی‌ایسه کامپیوتر قولوندا اؤیرنجی‌دیر.
مجلیس اشتراکچیلاری اوچون حاضیرلانان موسیقی پارچالارینین ایکینجی حصه‌سی، آدی سرحدلری آشان مهدی‌پور عائله‌سینه عاید‌ایدیر. “عاشیق سولدوز مهدی‌پور” اؤز ساز ایفاسیلا و خواننده‌لیک قابلیتیله اشتراکچیلارین کؤنوللرینی فتح ائتدی. او یاریم ساعاتا قده‌ر اشتراکچیلاردا ائله هیجان و شنلیک یاراتدی کی، بیر چوخلاری اونو ایاق اوسته ایزله‌دیلر.
مجلیسین ان گنج اشتراکچیسی “آلما موغانلی” اؤز شعرینی اوخوماغا، آذربایجانین مبارز شاعر قیزی مرضیه احمدی اسکویی‌نین آشاغیداکی مصراعلاریلا تریبون آرخاسینا دعوت اولوندو:
گؤزله‌یین گلرم بیرگون یانیزا
هامیمیز بیرله شیب، یولا دوشه ریک
محبتی، عشقی بوتون ائللره
پایلاریق، هامیمیز گؤزل یاشاریق
شعرلرینده موغانین عطرینی داشییان و یاشماق درگیسی‌ایله یاخیندان امکداشلیق ائدن گنج شاعر آلما موغانلی، تهران یونیورسیته‌سینده اؤیرنجی‌دیر و شعرلری تئز- تئز آنا دیللی مطبوعاتدا و اینترنت صحیفه‌لرینده یاییلیر.
آذربایجان قادین شعری آخشامینین سون شعرینی جولفا شهرینده یازیب یارادان شاعر “آرزو مرادی” اوخودو. ۱۳۷۰ینجی گونش ایلینده جولفا شهرینده دوغولموش و ایندی‌ایسه باستان شوناسلیق قولوندا تحصیل آلان آرزو خانیم مرادی‌نین شعرلری داها آرتیق اینترنت اوزه ره و سهند هفته‌لیگینده ایشیق اوزو گؤرور.
بئله‌لیک اوزون ایللر مثلی گؤرونمه‌ین بو شعر و موسیقی آخشامینین سون حصه‌سی‌ده گلیب چاتدی. بو سون حصه‌ایسه اشتراکچیلارا حاضیرلانان خاطره لؤوحه‌لرینین وئریلمه‌سی‌ایدی. بونون اوچون مجلیس آپاریجیلاری طرفیندن ادبی و مدنی جمعیتیمیزده آدلاری حؤرمتله چکیلن شکوفه شکوری(آنا)، مظفر درفشی، حبیب فرشباف، حسین صدیق(دوزگون)، بهروز دولت‌آبادی(چای اوغلو) و کریم مشروطه‌چی(سؤنمز) حاضیرلانان لؤوحه‌لری تقدیم ائتمک اوچون سئن اوستونه دعوت اولوندولار و مجلیسده اشتراک ائدن قادین شاعرلریمیزین هامیسینا خاطره لؤوحه‌لری تقدیم ائتدیلر.
مجلیسین سون آن‌لاری اشتراکچیلارین یادگار اولاراق شکیل‌چکدیرمکلرینه اختصاص وئریلمیشدیر.
مراسیمین حاشیه‌سینده‌کی‌لر:
- مدنی درنک‌لرین کئچمیش اوخشار مراسیملریله مقایسه‌ده، بو مراسیمده اشتراک ائدن قادین‌لارین چوخلوغو گؤزه چارپیردی.
- مراسیمده اشتراک ائدنلرین سایی سالونون توتومونو نظره آلاراق ۴۰۰ نفره یاخین‌ایدی.
- آذربایجانین بیر چوخ شهرلریندن دعوت اولونان شاعرلر، مراسیمین اؤزللیگینی داهادا آرتیرمیشدی.
- مراسیمین بوتون مدیریت ایشلرینی قادین‌لار عهده‌سینه گؤتورموشدو.
- مراسیمین باشلانیشیندا مدینه خانیم گولگونون پوستر شکیلینده چکیلمیش پورتره‌سی حجاب‌سیز اولدوغو اوچون پرابلم یاراندی کی، اشاره اولونان پوستری سالونون ائشیگیندن گؤتورمکله، مسئله آرادان قالدیریلدی.
- مراسیم اجرا اولونان سالونون نزدینده کیتاب سرگیسی‌ده ترتیب ائدیلمیشدیر کی آذربایجان دیلینده نشر اولونان کیتابلاری ساتیشا قویموشدولار.
- بیر نئچه قادین شاعرین اثرلری اؤنجه‌دن یوخلانماغا گؤندریلمه‌دیگی اوچون، مراسیمده اوخونمادی.
- مجلیسده حاضیر اولمایان قادین شاعرلرین شعرلریندن پارچالار، مراسیمین اثناسیندا آپاریجی‌لار طرفیندن اوخونوردو.
- مراسیمده آذربایجان ادبی- مدنی درنک‌لری‌نین او جمله‌دن ساهر ادبی- مدنی درنه‌یی‌نین، اوستاد شیدا انجومنی‌نین، قاراداغ ادبی انجومنی‌نین عضولری، پینار، یاشار و فرزانه یایین ائولری‌نین امکداشلاری، مختلف آنا دیللی نشریاتین و خبر ارگانلاری‌نین نماینده‌لری‌ده گئنیش صورتده اشتراک ائتمیشدیر.
- مجلیسده بیر چوخ آذربایجان ضیالیسی، اجتماعی شخصیت، شاعر و یازیچیسی‌دا اشتراک ائتمیشدیر. او جمله‌دن: خانم مجدفر، مهین خانیم قهرمانیان، شکوه آنا، فریبا وفی، مظفر درفشی، حبیب فرشباف، حسین صدیق، چای اوغلو، سؤنمز، حسین شهرک، حسن ایلدیریم، مرتضی مجدفر، ائلدار موغانلی، محمد خلیلی، اردشیر رستمی، اکبر قاداش، رسول یونان، ائللر، آیریلماز، قنبر سیفی و ….
- مجلیسه قاتیلا بیلمه‌ین قادین شاعرلریمیزین یئر بوشلوقلاری جدی صورتده تاسسوف دوغوروردو. او جمله‌دن فرانک فرید، نیگار خیاوی، سوسن نواده رضی، سپیده رسولی, فرشته رسولی, ندا صمدی، ایشیق، فریبا آفاق، رقیه صفری، فاطمه عبدالجبار، زهرا نظرنژاد، ائلناز اسلاموند و … باشقالارینین مجلیسده اشتراک ائده بیلمه‌دیک‌لری.
- اؤلکه‌دن خارجده یاشایان قادین شاعرلریمیزین او جمله‌دن سحر اردبیلی، لاله جوانشیر، ملیحه عزیزپور و باشقالارینین آدلاری مجلیسده چکیلمک‌له، اون‌لاردا خاطیرلاندیلار.
9 پاسخ
واقعا اشعار خانم ارزو مختاری به دل میشینه. ایشلا همیشه همینجور پر انرژی ادامه بدند.
کئشکه منده اوردا اولسایدیم. بوتون سئودیکلریم اوردایمیشلار. هامیسینا ساغلیق اوزون عؤمور آرزیلاییرام.
کئشکه منده اوردا اولسایدیم. بوتون سئودیکلریم اوردایمیشلار. هامیسینا ساغلیق اوزون عؤمور آرزیلاییرام.
سالاملار وسایقیلار! منیم ده اوره کیم ایستردی بو محفلده اشتراک ائده م چوخ تاسف کی زامان وشرایطین بیلمه میشم
امکلرینیزه ساغلیق………….
سلام حورمتلی ایشتیراک ائدن شاعیرلردن وبو گوزللیکدن ایجلاس قورانلاردان تشکورائدیرم یاشایین
«گوزللینین سوزویوخ؛سکوت ائله مه لی»
نه یازق کی بئلنچی بیر مجلسده اشتراک ائده بیلمه دیک .
سلام/ دوغرودان دا دیرلی و اونودولماز بیر شعر گئجه سی ایمیش. شکیللردن و اوزلرده اولان صمیمت دن بونو آنلاماق اولور. بوتون آذربایجان قادین لارینا باشاریلار آرزیلاییرام.
عزیز دوستلار! تشکورلر.اونودولماز بیر شعر گئجه سی ایدی.