بیزیم اوشاقلیق زامانی رسانه‌لر، ارتباطی وساییل آزیدی. چوخ ائولرده تئلویزیون یوخویدی. بعضی ائولرده بیر سینیق رادیو اولاردی؛ اونودا نه اینکی فرستنده زاد گوجسوزییدی، داییم پارازیت بوراخاردی و اخباردان زاددان چوخ کوشولتو ائشیدردیک. خوب، ایندی دئییرسیز بئله‌ بیر وضعیت‌نن میللتین تفرئحی نجور اولاردی.
عرض ائله‌ییم او زامان میللت گونوزلر کوچه‌ده یا توکانلارین، قفه‌لرین قاباغیندا اؤزلرین گونه وئرردیلر و ان بؤیوک سیاسی- اجتماعی، عائیله‌وی مسائلی ائله بو گونه‌ورلرده دانیشیب حل و فصل ائلردیلر. چونکو میللت اوندا قیرخ قات والانلی پرده‌نین دالیندا گیزله‌نیب منیم کیمین گونشدن یازمازدیلار. آخشاملار دا قونشو- قوهوم بیربیرینین ائوینه گئدیب گئجه یاریسیناجا هر دره دن دانیشیب گولردیلر. اوندا بو زهریمار کامپیوتر، گوشی، تلگرام یوخویدو کی میللت اوشاغ بؤیوک باغا کیمین تپیله ایچینه.
بیردنه‌ده اوشاقلیق تفرئحلریمیزدن بیر مشهور کئفلی وارییدی شهریمیزده. ائوی تیکیلن شارابی گؤردو نه بیر ایکی گیلاس ایچه، ائله کوپونده چیمیردی، لول کئفله‌نیردی. بیر یول خبر گلیردی فلانکس سبزه مئیداندا کئفله‌نیب آرخا توشوب. بیز اوشاقلار اتی کسیلمیش کیمین قاچاردیق باخماقا. او ائششک کیمین آرخدا آغناردی، جماعاتدا باخاردی. دای بتر تفرئحمیز وارییدی.
بیردنه‌ده تفرئحلریمیزدن پهلوانا باخماقیدی. جماعت اوسته اوسته دوراردی پهلوان مئیدان اوخویاندا. پهلواندا میللتی چوخ گؤروب اؤزوندن چیخیب گاه ماشین سینه‌سیندن کئچیردردی؛ گاه زینجیر قیراردی؛ گاه مجمعی جیراردی. و آمما لااااپ بؤیوک تفرئحیمیز اگر بیلسه‌نیز نه اییدی؟ قونشولارین ساواشماسی. قدیملر نه اینکی جاماعاتین بیربیریله چوخ ارتباطی وارییدی چوخدا پیرتلاشیب، ساواشیردیلار. ایندی کیمین دئییلدی کی آپارتمانین بیر طبقه‌سینده قونشونون بیری لاپ اؤلسون باشقالارین خبری اولمور.
بعلی؛ گونلرین بیر گونو یای گونون بیری، ناهاری تزه یئمیشیک، هره بیر یئرده هرله‌نیب استراحت ائلیریک؛ لاپبادان های قوپدو. دیک آتیلدیق نه اولوب؟ هره‌میز تای دئیشیک باشماقدان زاددان گئییب قاچدیق کوچه‌یه. ائیییی کوچه دوز شبئه مئیدانی‌دی. ننه‌م بیریندن سوروشدو: آی باجی نه اولوب؟
– نه اولاجاق؛ گولتاج شاصنمین بیر دسته تویوغ جوجه، غاز، هشترخانینا ددت وئریب اؤلدوروب.
ننه م: ویییی باشیما خئیر. نئجه کی باجی؟
– گویا شاصنمین تویوغ جوجه سی هئی گئدیرمیشلر گولتاجین حیطینه. اورانی سیچیب میردارلاییرمیشلار هله هئچ. گولتاجیندا تویوغ جوجه‌سینین دن دوشون الیندن آلیب تؤکورمیشلر قارینلارینا. گولتاج نئچه دؤنه شاصنمه اخطار وئریب تویوغ جوجه‌نی ییغشدیر؛ گویا صنم بو قولاغدان آلیب او بیریسیندن وئریب ائشیگه؛ گولتاج دا حیرصیندن یازیغ حیوانلارا ددت تؤکوب اؤلدوروب . ایندی صنم جسدلری ییغیب تلیسه گئدیر دادگاها شیکایته.
بیز اوشاقلاردا قونشونون ائو جورلاماقا تؤکولن داشلارین اوستونده اوتورمیشیق شئیطانجا بو شیرین ماجرایا قولاق آسیریق. بیر یول «ددان» -یولداشیمیزین بیری- دئدی: اوشاقلار بیلیرسیز نه قئیراق؟ بیز سس سسه: نه ؟!
– دیرناغیمیزی بیر بیرینه سورتک دئیه‌ک: هامی ساواشا/ من تاماشا. اوندا داوا بیتمز، کئف ائله‌ریک.
ایندی سیز فیکیر وئرین اوندا بیزیم نئجه کئفی‌سازلیغیمیزا هله الیمیزده بیر سورمادان زاددان اولسایدی داوا لاپ یاپیشاردی.
آغا دیرناقلاریمیزی سورته‌رک بویلانیب باخیریق گؤرکملی تییاتر صحنه‌سینه. شاه‌صنم خالا چیگینیده بیر تلیس اؤلو تویوق جوجه مئیدان اوخویور. عفت کلامین کامیلن الدن وئریب؛ آغزیندان چیخانی گولتاجین دالیجا چیغیریر. بو حئینیده بیرده گؤردوک گولتاجین کریم آددا بوغو بورما لات، لوطو اوغلو جماعتی سؤکه- سؤکه گلدی مئیدانا. شاصنم خالانین الینده کی تلیسی آلدی؛ زوربا زورونان نئچه دؤنه باشینا توولاییب تولازلادی. غریبه منظره اولموشدو. ددتله قوخوموش حئیوانلار سپه‌لندی کوچه اوزونو. لئش، لئشه دایانیب. گونده کی وورور لاپ قوخویورلار. شاصنم خالادا بو دؤنه هر یئردن الی اوزولموش ددتلی قوشلارین بیر بیر باسیب باغرینا نئجه ظولوم- ظولوم آغلاییر. هردن‌ده قارقیش ائله ییر:« جییارین یانسین کریم/ ننه‌ن ماتمینده اوتورسون کریم/ نئجه صنمین ائوین ییخدیز/ کومه‌نیز داغیلسین/ ائویز ییخیلسین».
هله گولتاج دا؛ معرکه قوروب آروادلارا آند آمان ایچیرکی شاصنم قارا یاخیر؛ من حئیوانلارینا ددت تؤکمه‌میشم. بیزده گولوروک:« به گؤره سن بو قوخویان ددت اییی هاوادان گلیرمی؟!»
خیلاصه بتر گونلریمیز تفرئحلریمیز وارییدی. ایندی آساییش چوخالسادا قدیمده اولان او دیلخوشلوقلار یوخدو. ماشینی یاشام آداملاریدا اوره‌گی سویوق ماشین سایاق ائله‌ییب. صوبح‌دن آخشاما قاش قاباقلی ائله چیرپینیر؛ نهایتده « الی خمیر/ قارنی آج». دوغرودان هارا گئدیر اینسان؟!. پس قینامایین افروزون اوشاقلیغی همشه کی حسرتی‌دیر. هله لیک.