گلمسن گلمه!/ محمد نوری
«موغان اوغلو»نون روحونا ایتحاف
بو اقاقی قوخوسونو ساعاتین یوخوسوندان دردیم
اللرینه
بونو بیل، کپنک‌لر بیله بیلر قاطار هانسی
مزارلیق‌لا آینالارین مسافه‌سینه بوشالتسین
قانادلارینی
گئجه یاریسی بیر شاعیر،
شهرین ایشیغینا توتور خییابانی
آددیملاری ساعات‌لارین یوخوسونا توخونور
شعر
شعر
زومزومه ائدیر آدینی چیچکلرین یادداشیندان
چیینیمه قونور
قوجاغینداکی کپنک‌لر،
بیله بیلمز گونشین گونبزلییی‌دی قودسال
ساچین
و آراز آیریمیندا باشلانیر سارایین ساچ آیریمی
موغان اوغلو
قانادلارینی نه یامان سارایین سسینه ساریدین!
قیزیل پاییز
واراق-واراق شعریمدن اوچدو…
